NUMBERS 13
13
1Go Yehovah e pasa paki Moses, po naga, 2P̃a tip̃aki lua naatam̃oli maga pano, naga euga leo pavaraka navanua ni Kanaan, waina aga wo dua Israel natuna maga asa: p̃a tip̃aki lua naatam̃oli sikasikai m̃elu sara naworawora ni tamada maga, euga vei tea maraki adeada maga sikasikai sarasara ra. 3Go Moses e dip̃aki lua ra m̃elu dua ki masop̃alo ni Paran pano, pataka ni natip̃akiana ki Yehovah: eu mamau puti pei nap̃au maga ni Israel natuna maga. 4Go tea maga waia eu pei nagisada maga: ni naworawora ni Reuben, Shammua natu ni Sakkur. 5Ni naworawora ni Simeon, Shafat natu ni Hori. 6Ni naworawora ni Yudah, Kaleb natu ni Yefuneh. 7Ni naworawora ni Issakar, Ikal natu ni Yosef. 8Ni naworawora ni Efraim, Hoshea natu ni Nun. 9Ni naworawora ni Benyamin, Palti natu ni Rafu. 10Ni naworawora ni Sebulun, Caddiel natu ni Sodi. 11Ni naworawora ni Yosef, waina e pei naworawora ni Manasseh, Caddi natu ni Susi. 12Ni naworawora ni Dan, Ammiel natu ni Cemalli. 13Ni naworawora ni Asher, Sethur natu ni Mikael. 14Ni naworawora ni Naftali, Nahbi natu ni Vofsi. 15Ni naworawora ni Cad, Ceuel natu ni Maki. 16Tea maga wanogoe eu pei nagisa ni naatam̃oli maga waina Moses e dip̃aki lua ra pano naga euga leo pavaraka navanua. Go Moses e soso Hoshea, natu ni Nun, ki Yoshua. 17Go Moses e dip̃aki lua ra pano naga euga leo pavaraka navanua ni Kanaan, e noa ki da, e naga, Kuga vae napua waia pae taleva ni Sauth, po sake paki tava maga pano: 18Po leo punusi navanua naga e dapale sava; go narei waina eu doko asa doko naga eu pe kasua kite eu pe manainai, eu pe visa maau kite eu pe laapa; 19Go navanua waina eu doko asa doko naga e pe wia kite e pe sa; go natokoana maga waina eu doko asa doko naga eu pe vei tokora ni nam̃enakiana, kite eu pe vei natokoana maga ni p̃aaka; 20Go navanua naga e dapale sava, e pe m̃anopunopu kite e pe m̃agura, mala ni nakau e pe toko asa kite e pe tika. Go kuga viviari, po dape nawa ni navanua seara umai. Go ragi wanogoe e pei ragi ni takavea ni nawa ni vaine. 21Go eu sake pano, po leo pavaraka navanua pae masop̃alo ni Sin pano pa pa liliu Rehob, paki tokora ni nasiliana paki Hamath. 22Go eu pae taleva ni Sauth sake pano, po umai paki Hebron; go Ahiman, Sheshai, go Talmai, Anak natuna maga, eu doko tokora wanogoe doko. (Go Hebron e pei tea tavagiana natau larua sua, go eu moro davagi Soan doko Ityipt). 23Go eu rumai paki nap̃aloa ni Eshkol, po dae kotovi ara sikai ni m̃okai ni nawa ni vaine, go eu pausi a ki nakau vavau sikai; go eu moro dape nawa ni pomekranet seara umai go nawa ni napuliva seara. 24Tokora wanogoe e pei tea sosoana ki nap̃aloa ni Eshkol, nalakena m̃okai waina Israel natuna maga eu dae kotovi a asa. 25Go eu leo pavaraka navanua naaleatia rualima pati, po moro liliu umai. 26Go eu rumai paki Kadesh doko masop̃alo ni Paran punusi Moses, go Aaron, go nasaisaiana mamau ni Israel natuna maga; go eu dape navasaana umai noa ki da asa, go ki nasaisaiana mamau, po pisei ki da nawa ni navanua. 27Go eu noa ki nia, eu naga, Au rumai paki navanua waina ku dip̃aki lua gami pano punusi a, go lomau e sara ki milk go ki honi; go tea waia e pei nawana. 28Ma narei waina eu doko navanua wanogoe doko eu kasua, go natokoana maga eu pei tea p̃aakagoroana, go eu p̃arua: go au moro punusi Anak natuna maga eu doko asa doko. 29Amalek e doko navanua ni Sauth doko: go naworawora ni Heth, go naworawora ni Yebus, go naworawora ni Amor, eu doko tava maga doko: go naworawora ni Kanaan eu doko nadigi ni natasi doko, go nadigi ni Yordan. 30Go Kaleb e mari narei eu punuta narae ni Moses, po naga, Tuga m̃araverave sake pano, po peani a; nalakena tu mariatae marimatua ki nia. 31Ma naatam̃oli maga waina eu mamau pano, eu naga, Tu mari sap̃o sake pano dip̃a narei wanogoe; nalakena nara eu kasua do liu gida. 32Go eu dape narogorogoana sa nalo ni navanua waina eu leo pavaraka asa paki Israel natuna maga, eu naga, Navanua wanogoe, waina au surata asa naga auga leo pavaraka asa, e pei navanua sikai waina e do gani dinomi naatatoko kakana maga; go narei mamau puti waina au punusi ra eu doko asa doko, eu pei naatam̃oli p̃atoko warua. 33Go tokora wanogoe au punusi pule maga, Anak natuna maga: go au punusi naga kinami au dakiusi midiri, go e pei lomau namatada.
Currently Selected:
NUMBERS 13: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
