MARKO 6
6
1Go e m̃elu dua ki tokora wanogoe pano; go e umai paki navanua aneana; go tea vasapiseikiana aneana maga eu dausi a; 2Go ragi waina e po pei sabbath, e atulake navasapiseikiana ekopu ni nasum̃a ni nasaisaiana; go tea laapa eu dogo e po saram̃akoto, po naga, Naatam̃oli waia e peani tea maga waia eu pae esava? Go, Namanumatuaana waina e pei tea vituakiana paki naatam̃oli waia e pei nasava, go nawosiana kasua dapalana maga waina eu pei tea mariana pae nam̃elearuna maga? 3Nae e da pei mataisau, natu ni Maria, go tai ni Yakobo, go ni Yose, go ni Yuda, go ni Simon kite? Go gorena maga eu da doko tokora waia sikoti gida kite? 4Go eu dapilagona nalo kakana. Go Yesu e noa ki da, e naga, Profeta sikai e da dika nadodomadaganiana mau, ma e dika asa navanua aneana, go m̃aleoputo ni namatarau aneana maga, go nasum̃a aneana sikida. 5Go e mari sa mari te nawosiana kasua seara tokora wanogoe, ma e doropusi nam̃elearuna maga tea sasana seara eu pisa maau, po maripauri ra. 6Go e maga nalakena eu da saralomau mau.
Go e surata papule natokoana kiki maga daliviri po do pasapiseiki.
7Go e soso tea rualima sikai tamate dua eu rumai punusi a, po atulake dip̃aki lua ra eu duarua; go e dua ra naveinawotaana dap̃au naatana loa maga; 8go e pasa soki ra naga euga ta dape te navatuna raki napua mau, ma tiko sikai ega sikina; euga ta dape navinaga mau, kite nala ni nakaniana mau, kite m̃ane paki nap̃alau ni tasoki adeada mau, ma naga euga vasi sandal maga: 9go, e naga, Kuga ta suni sugoro dua mau. 10Go e noa ki da, e naga, Tokora waina ku pe vaki ekopu ni nasum̃a sikai asa, kuga toko nasum̃a wanogoe pa pa kuga m̃elu dua ki tokora wanogoe pano. 11Go tokora waina e pe ta piragi mu mau, go waina eu pe ta dogo mu asa mau, ragi waina kuga m̃elu dua ki tokora wanogoe pano, kuga meseura ki nam̃otam̃ota waina e doko etano ni nam̃elemu naga ega vei nanoasokisokiana sikai paki da. 12Go eu pano, po dogorogo naga naatam̃oli maga euga midoaki doa. 13Go eu mari dimon laapa eu dave pano, po puvurai ki tea sasana laapa ki naroro, po maripauri ra.
14Go Herod nawota e dogo e; nalakena nagisana e pei tea ataeana sua: go e naga, Yoane tea Bapetiso e po duleana m̃elu dua ki tea mate, go nalakena tea wanogoe tea kasua maga wanogoe eu do p̃osiwosi asa. 15Ma tea p̃ota seara eu naga, E pei Eliyah. Go tea p̃ota seara eu naga, E pei profeta sikai, dapala profeta maga sikai kakada. 16Ma Herod, ragi waina e dogo e, e naga, Yoane, waina kinau e daekotovi nap̃auna, e po duleana. 17Nalakena Herod e dip̃aki lua po pua soki Yoane, po soli a nasum̃a ni navavaigoroana nalakena Herodia, nagoroi ki taina Filipo: nalakena e dawiri a. 18Nalakena Yoane e do noa ki Herod, e naga, E da pae nawotaeana mau naga p̃a veani nagoroi ki taim̃a. 19Go Herodia e pilosi a, po masauna naga ega mari punue a; go e mari sa mari a; 20nalakena Herod e matau ki Yoane, e atae naga e pei naatam̃oli leana go e dautau, go e pavaigoro e. Go ragi waina e dogo e, e dodoputuaki p̃arua; go e laelaea dogo e. 21Go ragi waina naaleatia wia sikai e umai, waina e pei naaleatia ni navakilinaana aneana Herod e magi tasiga aneana maga, go tea maraki manu maga, go tea warua maga ni Calilea mari nakaniana sikai; 22go ragi waina Herodia natuna nagoroi e umai paki ekopu po sale, Herod go tea maga waina eu mamau kere one ganikani eu midoa ki m̃ata ki nia; go nawota e noa ki koroi kiki wanogoe, e naga, P̃a tatagovi au tea waina ku masauna, go aga wo dua ko asa. 23Go e pivisa paki nia, e naga, Tea waina p̃a wo datagovi au asa, aga wo dua ko asa, pa pa paki namagovai ni namarakiana aginau. 24Go e dave pano, po noa ki p̃ilana, e naga, Aga tatago nasava? Go e naga, Nap̃au ni Yoane Bapetiso. 25Go e sava umai paki ekopu m̃araverave punusi nawota, po datago, e naga, A masauna naga p̃a tua au ragi waia ega toko siloa warua sikai, nap̃au ni Yoane Bapetiso. 26Go nawota e susue p̃arua; ma nalakena navivisaana maga go tea maga waina eu kere one ganikani, e mataku dip̃adoa e. 27Go nawota e m̃araverave dip̃aki lua naatam̃oli navakalo sikai ni tea maga waina eu doko raki nia doko, po dip̃a ki nia naga ega tape nap̃auna umai: go e pano po daekotovi nap̃auna ekopu ni nasum̃a ni navavaigoroana, 28po dape nap̃auna umai e doko siloa warua sikai, po dua koroi kiki wanogoe asa; go koroi kiki wanogoe e dua p̃ilana asa. 29Go ragi waina tea vasapiseikiana aneana maga eu dogo e, eu rumai po dape dakati nap̃atokona, po doropusi a e one matigo sikai.
30Go apostolo maga eu saisai umai punusi Yesu; go eu dogorogo paki nia naleo maga mamau puti, tea maga waina eu mari a, go tea maga waina eu pasapiseiki nia. 31Go e noa ki da, e naga, Kuga umai kuga vei nimu mau paki maso p̃alo sikai, po maromaro ragi kiki. Nalakena tea laapa eu do umai po do pano, go eu da peani ragi wia waina euga kanikani asa. 32Go eu porau paki maso p̃alo sikai pano eu pei nara mau. 33Go narei eu punusi ra eu pano, go tea laapa eu leoatae ra, go eu sava nam̃eleda pae natokoana maga mamau puti paki tokora wanogoe pano, po do liu ra. 34Go e paki euta po punusi taua warua sikai ni naatam̃oli maga, go e maritadodomi ra, nalakena eu dakiusi shiip waina eu dika tea leoparati ki da: go e atulake pasapisei ki da naleo laapa. 35Go ragi waina naaleatia e po pano p̃arua, tea vasapiseikiana aneana maga eu rumai punusi a, po naga. Tokora waia e pei maso p̃alo, go naaleatia e po pano p̃arua: 36p̃a tip̃aki lua ra, naga euga vaki navanua maga go natokoana kiki maga daliviri, po dum̃ada madeada pakotovi te navatuna euga kani a. 37Ma e pasadara po noa ki da, e naga, Nimu kuga tua ra naga euga kanikani. Go eu noa ki nia, eu naga, Auga vano po pakotovi navinaga pataka ni denario p̃onotia rua, po dua ra naga euga kanikani kite? 38Go e noa ki da, e naga, Ku peani bred pisa? Kuga va punusi. Go ragi waina eu atae, eu naga, Elima, go naika dua. 39Go e dip̃a ki da naga euga mamau puti doko natano nam̃enau malakesa euga vei tagona maga. 40Go eu do natano eu pei ovara maga, p̃onotia go p̃onotia, go rualima lima go rualima lima. 41Go e dape bred lima go naika dua wanogoe, go e leo sake paki nakoroatelagi, po pasam̃ataki, po p̃oraworae bred maga wanogoe; go e do dua tea vasapiseikiana maga naga euga toropusi naraeda; go naika dua wanogoe e duri dua puti ra ara. 42Go eu mamau puti ganikani, po puka. 43Go eu pilae matele maga, eu pei nala rualima sikai tamate dua eu pura, go matele maga ni naika dua wanogoe eu mamau. 44Go tea maga waina eu gani bred wanogoe eu pei naanoai manu lima.
45Go e m̃araverave pasa die tea vasapiseikiana aneana maga naga euga vagi rarua, go naga euga vea pano paki taleva kerua paki Bethsaida, ragi waina nae ega tip̃aki lua taua ni naatam̃oli maga. 46Go ragi waina e dule ki sua ra, e paki tava pano naga ega tapasavasa. 47Go ragi waina e maligo, rarua e doko m̃aleoputo ni natasi, go nae e sikina doko euta. 48Go e punusi ra eu mawosa ki navaluseana, nalakena nalagi e sau pae kivea ki da, go e umai punusi ra, e surata natasi, e pei navavaigoroana kevati ni nap̃ogiana; 49go e naga ega liu ra pano: ma ragi waina eu punusi a e surata natasi, eu midoa ki nia naga e pei naatana sikai, go eu kua; nalakena eu mamau puti punusi a, po m̃anaunau asa. 50Ma e pasa ki da m̃araverave, po noa ki da, e naga, Kuga marasike: E pei kinau; kuga ta mataku mau. 51Go e pagi rarua punusi ra; go nalagi e mate: go eu saram̃akoto p̃arua nap̃alauda; 52nalakena eu da midoaki atae nalo ni bred wanogoe mau, ma nap̃op̃oda e kasua doko.
53Go ragi waina eu duagoto sua, eu rumai paki navanua paki Cennesaret, po diroa ki vatu. 54Go ragi waina eu m̃elu dua ki boti umai, narei eu leoatae a m̃araverave, 55po sava pasara navanua mamau wanogoe daliviri, po atulake dapetape pasara tea sasana maga eu one naweweleda one, tokora waina eu dogo naga e doko asa. 56Go tokora waina e pe vaki asa, natokoana kiki maga, kite natokoana warua maga, kite navanua maga, eu doropusi tea sasana maga malo ni navakokotoana maga, po pavarani a naga euga kisidogo narepu ni sugoro aneana; go tea maga waina eu kisidogo e eu pei tea maripauriana.
Currently Selected:
MARKO 6: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
