MARKO 7
7
1Go Farisi maga, go te seara ni tea midiri maga, eu saisai punusi a, eu pae Yerusalem umai, 2po punusi naga seara ni tea vasapiseikiana aneana maga eu gani navinaga adeada ki nam̃elearuda loa, waina e pei, eu da pei tea vavanokiana mau. 3Nalakena Farisi maga, go tea ni Yudea maga mamau puti, eu pe ta pavano m̃ata ki nam̃elearuda maga mau, eu pe ta ganikani mau, eu dape soki navasaana vituakiana ki tea ni tagona tuai maga: 4go ragi waina eu pae malo ni navakokotoana umai, eu pe ta loloso mau, eu pe ta ganikani mau: go tea p̃ota laapa eu doko, waina eu dape ra naga euga tape soki ra, nasarueana ni lasa munu maga, go ni pot maga, go ni lasa ni brass maga. 5Go Farisi maga go tea midiri maga eu pusuusu paki nia, eu noa, Ekasana tea vasapiseikiana anigo maga eu da surata pae navasaana vituakiana ki tea ni tagona tuai maga mau, ma eu gani navinaga adeada ki nam̃elearuda loa? 6Go e noa ki da, E naga, Isaiah e pea noasai gara nalo kakamu nakalep̃o maga, dapala waina e pei tea midiriana,
Narei waia eu dodomadagani au ki nagoleda,
Ma nap̃op̃oda eu madu uvea kinau.
7Ma eu lotu ki p̃alo ki nau,
Eu pasapiseiki navasapiseikiana maga waina eu pei natip̃akiana maga ki naatam̃oli maga.
8Ku doropusi natip̃akiana ki Sup̃e, po dapesoki navasaana vituakiana ki naatam̃oli maga. 9Go e noa ki da, e naga, Ku dip̃a doa p̃ia ki natip̃akiana ki Sup̃e, naga kuga rogo parati ki navasaana vituakiana animu. 10Nalakena Moses e naga, P̃a dodomadagani tamam̃a go p̃ilam̃a; go, Tea waina e pasa sa ki tamana kite p̃ilana, ega mate namateana kakana: 11ma nimu ku naga, Naatam̃oli sikai e pe noa ki tamana kite p̃ilana, e pe naga, Tea aginau waina ku naga p̃a wo p̃ia asa e pei Korban, waina e pei, Tea vituakiana paki Sup̃e; 12ku pe ta moro suasua ki nia naga ega magi tamana kite p̃ilana mari te navatuna mau; 13ku mari navasaana ki Sup̃e e pei tea m̃oli ki navasaana vituakiana animu, waina ku pitua ki nia: go tea tapala nogoe laapa ku mari ra. 14Go e moro soso taua ni naatam̃oli maga umai punusi a, po noa ki da, e naga, Kuga mamau puti dogo au, po midoaki atae: 15te navatuna sikai waina e pae etaku ni naatam̃oli po paki nap̃alauna, e da mari atae mari a e loa mau: ma naleo maga waina eu dave naatam̃oli pano eu pei tea waina eu mari naatam̃oli e loa. 16(Te naata e pe vilake nadaliga naga ega rogo, ega rogo.) 17Go ragi waina e paki ekopu ni nasum̃a m̃elu dua ki taua ni naatam̃oli maga, tea vasapiseikiana aneana maga eu pusuusu paki nia ki naluluakia wanogoe. 18Go e noa ki da, e naga, Nimu ma ku pei tea midoaki sap̃o dapalana kite? Ku da midoakiatae mau, naga sara naleo waina eu pae etaku po paki nap̃alau ni naatam̃oli, eu mari sa mari a e loa; 19nalakena eu da sili paki nap̃op̃ona mau, ma eu sili paki nap̃elena, po moro m̃elu paki etaku? E mari navinaga maga mamau puti eu dautau. 20Go e naga, Tea waina e dave naatam̃oli pano, tea wanogoe e mari naatam̃oli e loa. 21Nalakena namidodoana maga waina eu sa, eu dave pae nap̃op̃o ni naatam̃oli maga, namaripeleana maga, navanakoana maga, namaripunueana maga, 22namaripeleana ki tea vitawiri go ki tea laki maga, namatam̃aguraana maga, nasigisigileoana maga, nasorosoroana, namasausauana, namatasaana, navasasakiana, nalomadagaana, namanumatavusaana: 23tea sa maga mamau puti wanogoe eu dave pae nap̃alauna, po mari naatam̃oli e loa.
24Go e duleana m̃elu dua ki tokora wanogoe, po paki navanua ni Tair go Sidon pano. Go e paki ekopu ni nasum̃a sikai, po da masauna mau naga te naata ega atae a: go e mari sa doko loku. 25Ma m̃araverave nagoroi sikai, waina natuna nagoroi kiki e peani naatana loa sikai, e dogo nalo kakana, po umai, po dowo pakitano pisari nam̃elena maga. 26Go nagoroi wanogoe e pei tea ni Hellas, go tea ni Sirofoinisia pae namatarau aneana. Go e pavarani a naga ega mari dimon ega tave m̃elu dua ki natuna nagoroi pano. 27Go e noa ki nia, e naga, Paikirikiri maga euga vea puka: nalakena e da p̃ia mau naga euga tape navinaga ki piakirikiri maga po nadi ki nia dua koria maga asa. 28Ma e pasadara po noa ki nia, e naga, Ioro, Nawota: koria maga ma narukuruku ni wede eu gani navero ni navinaga ki piakirikiri maga. 29Go e noa ki nia, e naga, Nalakena navasaana wanogoe p̃a vano; dimon e po dave m̃elu dua ki natum̃a nagoroi pano. 30Go e paki nasum̃a aneana pano, po pap̃ai piakiki e one nawewelena, go dimon e dave m̃elu dua ki sua e pano.
31Go e moro m̃elu dua ki navanua ni Tair pano, po umai duaduru Sidon paki natasi ni Calilea, duaduru m̃aleoputo ni navanua ni Dekapolis. 32Go eu piragi tea p̃aro sikai umai punusi a, waina e pasa kite sa; go eu pavarani a naga ega toropusi nam̃elearuna asa. 33Go e piragi a pano m̃elu dua ki taua ni naatam̃oli maga paki malo daki sikai, po sai ki nakinina paki nadaligana maga, go e daniu, po kisidogo namenana; 34go e leosake paki nakoroatelagi, po dotorosova, po noa ki nia, e naga, Effatha, waina e pei, P̃a masai. 35Go nadaligana ero masai, go natali ni namenana e pei tea veresiana, go e pasa masai. 36Go e pasa parati ki da naga euga ta noa ki te naata asa mau: e pasa parati ki p̃arua ki da asa, ma nara eu dogorogo ki p̃arua ki nia e p̃arua liu sa. 37Go eu saram̃akoto p̃arua liu, po naga, E po mari m̃ata ki naleo maga mamau puti: e mari tea p̃aro eu dorogo, go tea vei pusa eu pasa.
Currently Selected:
MARKO 7: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
