MARKO 5
5
1Go eu rumai paki taleva kerua ni natasi, paki navanua ki naka ni Cerasa. 2Go ragi waina e m̃elu dua ki sua rarua umai, m̃araverave naatam̃oli sikai waina e peani naatana loa sikai e sua e, e pae matigo maga umai, 3waina e peani malo tokoana aneana matigo maga: go te naata sikai e da moro mari atae soli a mau, e da mari atae a ki namori ni vatu sikai mau; 4nalakena e paka laapa pei tea soli‐sua‐ana ki tea moti nam̃elena maga go ki namori ni vatu maga, go namori ni vatu maga eu pei tea vuakotoviana pae asa, go tea moti nam̃elena maga eu pei tea marikotokotoviana: go te naata sikai e da kasua mau naga ega mari a ega matemate. 5Go sara ragi, p̃ogi go aleati, e doko matigo maga go tava maga, e do pioso po do dum̃ana dovae a ki vatu maga. 6Go ragi waina e punusi Yesu pae uvea, e sava po kolo suai natano paki nia; 7go e pioso ki nadaleo kasua sikai, po naga, Aga kasa ki‐go, Yesu, Natu ni Sup̃e Vakilagi Mau? A pavarani ko pae Sup̃e, naga p̃a ta mari au aga vitinu mau. 8Nalakena e noa ki nia, e naga, P̃a tave umai, naatana loa, m̃elu dua ki naatam̃oli wanae pano. 9Go e pusuusu paki nia, e naga, Nagisam̃a sei? Go e noa ki nia, e naga, Nagisagu Lecion; nalakena au laapa. 10Go e pavarani p̃arua ki nia naga ega ta dip̃aki lua ra m̃elu dua ki navanua wanogoe pano mau. 11Go navata warua sikai ni wago eu doko tokora wanogoe eu do ganikani taleva ni tava. 12Go eu pavarani a, po naga, P̃a tip̃aki lua gami auga sili wago, naga auga vaki nap̃alauda. 13Go e suasua ki da. Go naatana loa maga eu dave umai, po paki nap̃alau ni wago maga: go navata e sava siwo napatira paki natasi, eu alagoro pei manu dua; go eu suapunu natasi. 14Go tea maga waina eu do pagani ra eu sava pano, po dogorogo ki nia natokoana, go navanua. Go eu rumai naga euga vunusi tea waina e pakilina e pei nasava? 15Go eu rumai punusi Yesu, po leo punusi tea waina e pei dimon e do natano, e pei tea sugoroana po midodoa p̃ia, nae waina e peani lecion: go eu mataku. 16Go tea maga waina eu punusi a eu dogorogo ki nia paki da dapala waina e pakilina ki tea waina e pei dimon, go nalo ni wago maga. 17Go eu atulake pavarani a naga ega m̃elu dua ki navanua adeada pano. 18Go ragi waina e naga ega vagi rarua, tea waina e pea pei dimon e pavarani a naga ega sikoti a doko. 19Go e da suasua ki nia mau, ma e noa ki nia, e naga, P̃a vaki nasum̃a anigo pano punusi namatarau anigo maga, po noa ki da tea warua maga waina Nawota e po manigo mari a, go naga e dodomi ko. 20Go e pano, po atulake dogorogo Dekapolis ki tea warua maga waina Yesu e maneana mari a: go naatam̃oli maga mamau puti eu maga.
21Go ragi waina Yesu e moro duagoto sua pae rarua paki taleva kerua, taua warua sikai ni naatam̃oli maga eu saisai punusi a: go e doko elau. 22Go sikai ni tea maraki maga ni nasum̃a ni nasaisaiana e umai, nagisana Yairo; go ragi waina e punusi a, e dowo pakitano pisari nam̃elena, po pavarani p̃arua ki nia, po naga, 23Natugu nagoroi kiki e m̃aladigi mate: A pavarani ko, naga p̃a umai po doropusi nam̃elearum̃a maga asa, naga ega vei tea maripauriana po mauri. 24Go e sikoti a pano; go taua warua sikai ni naatam̃oli maga eu dausi a, go eu sogosogoni a.
25Go nagoroi sikai, waina e dape nada varau natau rualima sikai tamate dua, 26go waina e sua navitinuana laapa pae naatam̃oli ni medisine laapa, go waina e sori naleo maga mamau puti waina e peani ra, po da p̃ia asa mau, ma e do sa p̃arua, e dogo tea maga nalo ni Yesu, 27go e umai sari taua ni naatam̃oli maga paki natakuna, po kisidogo sugoro aneana. 28Nalakena e naga, A pe kisidogo sugoro aneana maga, a pe wo pei tea maripauriana. 29Go m̃araverave namata noai ni nadana e dap̃a; go e atae a nap̃atokona naga e pei tea maripauriana m̃elu dua ki navaratiana wanogoe. 30Go m̃araverave Yesu, waina e atae nap̃alauna naga nakasuana wanogoe e po dave m̃elu dua ki nia pano, e dum̃ana doa e m̃aleoputo ni taua ni naatam̃oli maga, po naga, Sei e kisidogo sugoro aginau? 31Go tea vasapiseikiana aneana maga eu noa ki nia, eu naga, Ku punusi taua ni naatam̃oli maga eu do sogosogoni ko, go ku naga, Sei e kisidogo au? 32Go e leo pilialia naga ega vunusi naata waina e mari tea wanogoe. 33Ma nagoroi wanogoe waina e mataku po duruuru, waina e atae tea waina e po maneana pei tea mariana, e umai po dowo pakitano naraena, po noa ki nia nalomauana mamau. 34Go e noa ki nia, e naga, Lei, nasaralomauana anigo e po maripauri ko; p̃a vaki natam̃ateana pano, go p̃a wia m̃elu dua ki navaratiana anigo.
35Ragi waina e ko do pasa, seara eu pae nasum̃a ki tea maraki ni nasum̃a ni nasaisaiana umai, po naga, Natum̃a nagoroi e mate: ekasana ku ko do mari Tea Vasapiseiki ki navitinuana? 36Ma Yesu e sara tea p̃alo navasaana wanogoe, po noa ki tea maraki ni nasum̃a ni nasaisaiana, e naga, P̃a ta mataku mau, p̃a saralomau sikai maau. 37Go e da suasua ki te naata mau naga ega rausi sikoti a, ma e suasua ki Petero, go Yakobo, go Yoane Yaboko taina eu sikida. 38Go eu rumai paki nasum̃a ki tea maraki ni nasum̃a ni nasaisaiana; go e leo punusi nawaraiana sikai, go tea maga waina eu dagi po lalagaarova p̃arua. 39Go ragi waina e paki ekopu, e noa ki da, e naga, Ekasana ku p̃arai, po dagi? Piakiki e da mate mau, ma e maturu. 40Go eu muru ki nia. Ma nae, ragi waina e mari ra eu mamau puti paki katama, e piragi lua piakiki tamana go p̃ilana go tea maga waina eu sikoti a doko, po sili paki tokora waina piakiki e one asa. 41Go e puati nam̃elearu ni piakiki, po noa ki nia, e naga, Talitha kumi; waina e pei tea vasadoaana, e pei, Koroi kiki, a noa ki‐go, P̃a tuleana. 42Go koroi kiki e duleana m̃araverave, po surata; nalakena e pei tea ni natau rualima sikai tamate dua. Go eu m̃araverave saram̃akoto ki nasaram̃akotoana warua. 43Go e pasa parati ki p̃arua ki da naga te naata ega ta atae tea wanogoe mau: go e pitip̃aki naga euga tua e te navatuna ega kani a.
Currently Selected:
MARKO 5: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
