MARKO 2
2
1Go ragi waina e moro sili paki Kapernaum edaku ki naaleatia seara, e pei tea rogorogokiana naga e doko ekopu ni nasum̃a. 2Go tea laapa eu saisai, dapala waina te namalopa e da moro doko mau, go e da moro doko pisari namata mau: go e pasa ki da navasaana. 3Go eu rumai, eu dape tea sarumate sikai umai punusi a, waina e pei tea tapetapeana pae tea vati. 4Go ragi waina eu mari sa umai paki m̃aladigi ki nia nalakena taua ni naatam̃oli maga, eu maripakasa ki elagi ni nasum̃a tokora waina e doko asa: go ragi waina eu kili sai sua e, eu doro pakitano nawewele waina tea sarumate e one asa one, 5Go Yesu e punusi nasaralomauana adeada po noa ki tea sarumate, e naga, Koto, namarinaleosaana anigo maga eu pei tea midoakikorokoroana. 6Ma tea midiri maga seara kakada eu dasake tokora wanogoe, po midoakiusiusi nap̃op̃oda, 7Ekasana naatam̃oli waia e pasa dapalana? E pasa sa ki: sei e mari atae midoakikorokoro namarinaleosaana maga ma tea sikai maau, 8Sup̃e? Go m̃araverave Yesu, ragi waina e atae pae naatana naga eu midoakiusiusi nap̃alauda dapala nogoe, e noa ki da, e naga, Ekasana ku midoakiusiusi tea maga wanogoe nap̃op̃omu? 9Seve tea e manainai p̃ia, A pe noa ki tea sarumate, Namarinaleosaana anigo maga eu pei tea midoakikorokoroana; kite a pe noa, P̃a tuleana, po dape dakati nawewele anigo, po surata? 10Ma naga kuga atae naga naatam̃oli Natuna e peani naveinawotaana maramana naga ega midoakikorokoro namarinaleosaana maga (e noa ki tea sarumate), 11e naga, A noa ki‐go, P̃a tuleana, p̃a tape dakati nawewele anigo, po paki nasum̃a anigo pano. 12Go e duleana, po m̃araverave dape dakati nawewele, po paki katama narae ni tea maga mamau puti; dapala eu mamau puti saram̃akoto, po samasamani Sup̃e, po naga, Au da punusi tea tapalana sala vea mau.
13Go e moro dave pano po pae elau; go taua mamau ni naatam̃oli maga eu rumai punusi a, go e pasapisei ki da. 14Go ragi waina e do liu pano, e punusi Levi natu ni Alefaio e do dasake tokora ni nasautoga, go e noa ki nia, e naga, P̃a rausi au. Go e duleana po dausi a. 15Go e pakilina, naga e kere one ganikani ekopu ni nasum̃a aneana, go tea tape nasautoga laapa go tea mari naleo sa laapa eu mamau kere one sikoti Yesu go tea vasapiseikiana aneana maga: nalakena tea laapa eu doko, go eu dausi a. 16Go tea midiri maga ni Farisi maga, ragi waina eu punusi naga e ganikani sikoti tea mari naleo sa maga go tea tape nasautoga maga, eu noa ki tea vasapiseikiana aneana maga, eu naga, E ganikani po munu sikoti tea tape nasautoga maga go tea mari naleo sa maga. 17Go ragi waina Yesu e dogo e, e noa ki da, e naga, Tea maga waina eu kasua eu da dapala waina e p̃ia naga euga masau naatam̃oli sikai ni medisine mau, ma tea waina eu sasana eu dapala nogoe: a da umai naga aga soso tea leana maga mau, ma a umai naga aga soso tea marinaleosa maga.
18Go tea vasapiseikiana maga ki Yoane go Farisi maga eu pali doko: go eu rumai po noa ki nia, eu naga, Ekasana tea vasapiseikiana maga ki Yoane go ki Farisi maga eu pali, ma tea vasapiseikiana anigo maga eu da pali mau? 19Go Yesu e noa ki da, e naga, Tea vitawiri tana ri maga eu mari atae susue, ragi waina tea vitawiri e sikoti ra doko kite? Ragi waina eu peani tea vitawiri e sikoti ra doko, eu mari sa pali. 20Ma naaleatia maga euga wo umai, waina tea vitawiri ega wo pei tea tapeluaana kiada, go ragi wanogoe euga wo pali naaleatia wanogoe. 21Te naata sikai e da duri matele sikai ni nakulukulu waina e ko da pei tea marim̃atakiana sugoro tuai mau: eu pe turi a asa nausuvakiana e pe m̃elu dua ki nia, tea vau e pe m̃elu dua ki tea tuai, go namaworaana e pe warua. 22Go te naata sikai e da daki waine vau paki noai ni nawili tuai maga mau: eu pe taki nia paki ara waine e pe mari nawili maga eu pe masai, go waine e pe vuoli, go nawili maga: ma eu daki waine vau paki nawili vau maga.
23Go e pakilina, naga e surata duaduru vanua maga ni korn naaleatia ni sabbath; go tea vasapiseikiana aneana maga eu pae asa surata po lei m̃okai maga ni korn. 24Go Farisi maga eu noa ki nia, eu naga, P̃a leo, ekasana eu mari naaleatia ni sabbath tea waina e da pae nawotaeana mau? 25Go e noa ki da, e naga, Ku ko da peve tea waina David e mari a, ragi waina e dika, po pitolo, nara ma tea maga waina eu sikoti a doko kite? 26Dapala waina e paki roara ni nasum̃a ki Sup̃e ragi waina Abiathar e pei tea viri warua liu, po gani bred tokorae maga, waina e da pae nawotaeana mau naga tea laapa euga kani a, ma e pei tea waina tea viri maga euga sikida gani a, po dua tea maga waina eu sikoti a doko? 27Go e noa ki da, e naga, sabbath e magi naatam̃oli pei tea mariana, go naatam̃oli e da magi sabbath pei tea mariana mau: 28nalakena tea wanogoe naatam̃oli Natuna e pei nawota ni sabbath.
Currently Selected:
MARKO 2: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
