MARKO 3
3
1Go e moro paki ekopu ni nasum̃a ni nasaisaiana; go naatam̃oli sikai e doko asa waina nam̃elearuna e lologara. 2Go eu leo parati ki nia, e pe maripauri a naaleatia ni sabbath; naga euga vasa dip̃a e. 3Go e noa ki naatam̃oli waina nam̃elearuna e lologara, e naga, P̃a tuleana paki m̃aleoputo. 4Go e noa ki da, e naga, E pae nawotaeana naga tuga mari euga wia naaleatia ni sabbath, kite naga tuga mari euga sa? Naga tuga mautipauri namauriana sikai, kite naga tuga mari punue? 5Ma eu punuta. Go e leo pilialia ara ki namaetoana, e susue nalakena nakasuaana ni nap̃op̃oda, go e noa ki naatam̃oli wanogoe, e naga, P̃a sai ki nam̃elearum̃a. Go e sai ki nia: go nam̃elearuna e pei tea mariana e moro p̃ia. 6Go Farisi maga eu dave pano, go m̃araverave nara ma naatam̃oli maga ki Herod eu seke dip̃a e, naga euga mari punue a.
7Go Yesu go tea vasapiseikiana aneana maga eu paki natasi pano: go taua warua sikai ni naatam̃oli waina eu pae Calilea eu dausi a; 8go tea maga waina eu pae Yudea, go Yerusalem, go Idumea, go taleva kerua ni Yordan, go tokora maga daliviri Tair go Sidon, taua warua sikai, ragi waina eu dogo tea warua maga waina e mari ra, eu rumai punusi a. 9Go e noa ki tea vasapiseikiana aneana maga, naga rarua kiki sikai ega toko raki nia nalakena taua ni naatam̃oli maga, naga euga ta sogosogoni a mau: 10nalakena e mari pauri sua tea laapa; dapala tea maga waina eu sua tea ni navaratiana maga eu dietie a naga euga kisidogo e. 11Go naatana loa maga, ragi waina eu leo punusi a, eu dowo pakitano naraena, po pioso, eu naga, Nigo ku pei Sup̃e Natuna. 12Go e pasasoki p̃arua ki da naga euga ta mari a ega vei tea ataeana mau.
13Go e sake paki tava pano, po soso tea maga waina nae e dum̃ana masau ra: go eu pa punusi a. 14Go e mari rualima sikai tamate dua, naga euga sikoti a doko, go naga ega tip̃aki lua ra naga euga rogorogo, 15po peani naveinawotaana naga euga mari dimon maga euga tave pano: 16go Simon e salagisana ki Petero; 17go Yakobo natu ni Sebedaio, go Yoane Yakobo taina; go nara e salagisada ki Boanerces, waina e pei, tovae Natuna maga: 18go Anderea, go Filipo, go Bartolomaio, go Mataio, go Toma, go Yakobo natu ni Alefaio, go Tadaio, go Simon Kananaio, 19go Yuda Iskariote, waina e pitua ki nia.
20Go e umai paki ekopu ni nasum̃a sikai. Go taua ni naatam̃oli maga eu moro saisai umai, dapala eu mari sa gani navinaga. 21Go ragi waina namatarau aneana maga eu dogo e, eu pano naga euga vuasoki a: nalakena eu naga, E daratara. 22Go tea midiri maga waina eu pae Yerusalem siwo umai eu naga, E peani Beelsebub, po mari dimon maga eu dave pano pae nawota ki dimon maga. 23Go e soso ra umai punusi a, po noa ki da pae naluluakia maga, e naga, Satan e mari atae mari Satan ega tave pano dapale sava? 24Go nalauna sikai e pe vei tea tap̃otaeana dum̃ana dip̃a e, nalauna wanogoe e mari sa du. 25Go nasum̃a sikai e pe vei tea tap̃otaeana dum̃ana dip̃a e, nasum̃a wanogoe ega wo mari sa du. 26Go Satan e pe tuleana dum̃ana dip̃a e, po pei tea tap̃otaeana, e mari sa du, ma e pe nopu. 27Ma te naata, e pe ta soli tea kasua mau, e mari sa paki ekopu ni nasum̃a ki tea kasua, po dape pavakoto naloriki aneana maga; ma e pe vea soli a, ega wo edaku dape pavakoto nasum̃a aneana. 28Lomau a noa ki mu, naga Namarinaleosaana adeada maga mamau puti euga wo magi naatam̃oli natuda maga pei tea midoakikorokoroana, go navasasakiana adeada maga waina eu pe wo pasa sa ki ara: 29ma naata waina e pe wo pasa sa ki dip̃a Naatana Tapu ega wo da dape namidoakikorokoroana mau pa pa ega tu mau du, ma sogi ni namarinaleosaana sikai waina e du mau du ega wo doko asa: 30nalakena eu naga, E peani naatana loa sikai.
31Go p̃ilana go taina maga eu rumai; go eu lawodu katama, po dip̃aki lua pa punusi a, po soso e. 32Go taua sikai ni naatam̃oli maga eu do natano dalivirigoro e: go eu noa ki nia, eu naga, P̃a leo, p̃ilam̃a go taim̃a maga katama eu laaga ako. 33Go e pasa dara ra, po naga, Sei e pei p̃ilagu go taigu maga? 34Go e leo pilialia paki tea maga waina eu do natano dalivirigoro e, po naga, Kuga leo, p̃ilagu go taigu maga! 35Nalakena naata waina e pe wo mari namasauana ki Sup̃e, nae e pei taigu, go goregu, go p̃ilagu.
Currently Selected:
MARKO 3: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
