MARKO 14
14
1Go edaku ki naaleatia dua e pei nasaisaiana ni navakalauana go ni bred waina leven e dika asa: go tea viri warua maga go tea midiri maga eu laaga dapala waina euga vua soki a pae nasorosoroana, po mari punue a: nalakena eu naga, 2Tuga ta mari a ragi ni nasaisaiana mau, mase navasap̃araiana sikai ni narei e pe wo doko.
3Go ragi waina e doko Bethania nasum̃a ki Simon waina e pei lepero, ragi waina e kere one ganikani, nagoroi sikai e umai waina e dape lasa ni naroro sikai ni naroro lolo ni nardo lomau ni naulu laapa; go e mari p̃orae lasa wanogoe, po da ki nia nap̃auna. 4Ma te seara eu doko waina eu maeto po noa dum̃ada paki da, eu naga, Ekasana namaripuolikiana waia ni naroro lolo? 5Nalakena naroro lolo waia e mari atae pei tea soriana raki tea waina e p̃arua liu denario p̃onotia dolu, po pei tea vituakiana paki tea tika maga. Go eu dauruuru dip̃a e. 6Ma Yesu e naga, Kuga toropusi a ega toko; ekasana ku mari a e dogo kite sa? E po mari namariana wia sikai paki nau. 7Nalakena ku peani tea tika maga eu sikoti mu doko sara ragi, go ragi waina ku masauna ku mari atae mari m̃ata ki da: ma ku da peani au sara ragi mau. 8E po mari tea waina e mari atae mari a: e po pea puvurai ki nap̃atokogu raki naovakiana. 9Go lomau a noa ki mu, naga Tokora waina narogorogoana wia e pe wo pei tea rogorogokiana asa usuraki maramana mamau, tea waina nagoroi waia e po mari a tea wanogoe ma ega wo pei tea noaana asa naga nae ega vei tea midoakilagatiana asa.
10Go Yuda Iskariote, tea sikai ni tea rualima sikai tamate dua, e pano punusi tea viri warua maga naga ega vitua ki nia paki da. 11Go nara, ragi waina eu dogo e, eu laelaea, po sai naga euga tua e m̃ane. Go e laaga ragi wia naga ega vitua ki nia paki da.
12Go naaleatia vea ni bred waina leven e dika asa, ragi waina eu mari punue navakalauana, tea vasapiseikiana aneana maga eu noa ki nia, eu naga, Seve tokoro ku masauna naga auga vaki asa po marim̃ataki naga p̃a kani navakalauana asa? 13Go e dip̃aki lua edua ni tea vasapiseikiana aneana maga, po noa ki da, e naga, Koroga vaki natokoana, go naatam̃oli sikai waina e dape noai ni naruku sikai ni noai ega wo sua mu: koroga rausi a; 14go tokora waina ega wo sili asa, koroga noa ki talakea ni nasum̃a, koroga naga, Tea Vasapiseiki e naga, Em̃ago ni nam̃enakiana aginau wai, waina aga kani navakalauana asa, sikoti tea vasapiseikiana aginau maga? 15Go ega wo pisei ki mu em̃ago warua ni elagi sikai, waina sara naleo eu doko asa, go waina e pei tea marim̃ataki‐sua‐ana: go tokora wanogoe koroga manigida mari m̃ataki asa. 16Go tea vasapiseikiana ero pano, po umai paki natokoana, po pap̃ai dapala waina e noa ki da asa: go ero mari m̃ata ki navakalauana.
17Go ragi waina e po pei ragi melu, e umai nara ma tea rualima sikai tamate dua eu mamau. 18Go ragi waina eu kere one po do ganikani, Yesu e naga, Lomau a noa ki mu, naga Nimu sikai ega wo pitua ki nau, nae waina e ganikani sikoti au. 19Eu pae asa susue, po noa ki nia sikai go sikai, eu naga, Kinau kite? 20Go e noa ki da, e naga, E pei sikai ni tea rualima sikai tamate dua, nae waina e doko sikoti au lasa. 21Nalakena naatam̃oli Natuna e pano lomau dapala waina e pei tea midiriana asa: ma ai ki naatam̃oli waina naatam̃oli Natuna e pei tea vituakiana pae asa! Naatam̃oli wanogoe e pe ta pakilina mau e pe wia ki nia.
22Go ragi waina eu do ganikani, e dape bred, go ragi waina e pasa m̃ata ki sua, e dovap̃orae a, po dua ra, po naga, Kuga tape: tea waia e pei nap̃atokogu. 23Go e dape lasa munu sikai, go ragi waina e pasadodom̃ata ki sua, e dua ra: go eu mamau puti munu seara kakana. 24Go e noa ki da, e naga, Tea waia e pei nadagu ni navasasokiana, waina e magi tea laapa pei tea takiana. 25Lomau a noa ki mu, naga Aga wo da moro munu nawa ni vaine seara mau, pa pa paki naaleatia waina aga wo munugi a tea vau namarakiana ki Sup̃e.
26Go ragi waina eu lega sua nalegaana sikai eu dave paki tava ni Oliva pano.
27Go Yesu e noa ki da, e naga, Kuga wo mamau puti pei tea mariana kuga tapilagona: nalakena e pei tea midiriana, Aga wo atugi tea leo paratiki shiip, go shiip euga wo pei tea taperaverakiana. 28Ma edaku ki aga vei tea sikeana duleana, aga wo pea ki mu paki Calilea pano. 29Ma Petero e noa ki nia, e naga, Tea maga mamau puti eu pe vei tea mariana euga tapilagona, ma kinau a pe ta dapilagona mau. 30Go Yesu e noa ki nia, e naga, Lomau a noa ki‐go, naga nigo masoso, p̃ogi waia, ragi waina toa ega ko da paka rua dare mau, p̃a wo paka tolu pasa goro au. 31Ma e pasa kasua p̃arua, e naga, E pe one au one naga aga mate sikoti ko, a pe wo da pasa goro ko mau. Go eu mamau puti noa dapala nogoe.
32Go eu rumai paki tokora sikai nagisana Cethsemane: go e noa ki tea vasapiseikiana aneana maga, e naga, Kuga to natano tokora waia, ragi waina aga tapasavasa. 33Go e piragi lua Petero go Yakobo go Yoane eu sikoti a pano, go e pae asa maga p̃arua, po dogo kite sa p̃arua. 34Go e noa ki da, e naga, Naatagu e susue p̃arua pa pa paki namateana: kuga toko nea, po do leleo goro. 35Go e pa dua ki da malo kiki, po dowo paki natano, po dapasavasa naga aura wanogoe, e pe va dua ki atae, ega va dua ki nia pano. 36Go e naga, Abba, Mama, nigo ku mari atae mari sara naleo; p̃a tape lua lasa munu waia kiagu: ma ega ta pei tea waina kinau a masauna mau, ma ega vei tea waina nigo ku masauna. 37Go e umai po pap̃ai ra eu maturu, go e noa ki Petero, e naga, Simon, ku maturu? Ku mari sa leleo goro aura sikai maau? 38Kuga leleo goro po dapasavasa, naga kuga ta paki namaridogoana mau: naatamu e suasua lomau, ma nap̃okasimu e manainai. 39Go e moro pano, po dapasavasa, po noa navasaana maga wanogoe sikai maau. 40Go e moro umai po pap̃ai ra eu maturu, nalakena namatada eu madaga p̃arua; go eu da atae tea waina euga vasa dara e asa mau. 41Go e umai sala ketolu po noa ki da, e naga, Kuga to maturu ragi waia, po maromaro: e pei tea lapa; aura e po umai; kuga leo, naatam̃oli Natuna e pei tea vituakiana paki nam̃elearu ni tea mari naleo sa maga. 42Kuga tuleana, tuga vano: kuga leo, tea waina e pitua ki nau e pei m̃aladigi.
43Go m̃araverave, ragi waina e ko do pasa, Yuda, sikai ni tea rualima sikai tamate dua, e umai, nara ma taua sikai ni naatam̃oli maga eu mamau, eu puati lova go naap̃e, eu m̃elu tea viri warua maga go tea midiri maga go tea matua maga umai. 44Go tea waina e pitua ki nia e dua sua ra navaivaiana sikai, e naga, Tea waina aga wo dum̃ili a e pei nae; kuga vua soki a, po piragi lua kasua ki nia. 45Go ragi waina e umai, e umai punusi a m̃araverave, po naga, Rabbi; go e dum̃idum̃ili a. 46Go eu nadi ki nam̃elearuda asa, po pua soki a. 47Ma tea sikai ni tea maga waina eu lawodu pisari a e sai lua lova aneana, po atugi tea suasua ki tea viri warua liu, po dae lua nadaligana. 48Go Yesu e pasa dara po noa ki da, e naga, Ku po dave umai, dapala a pei tea tape pavakoto sikai, ku pua lova go naap̃e naga kuga vua soki au kite? 49Sara naaleatia a sikoti mu roara ni nasum̃a tapu a do pasa piseiki, go ku da pua soki au mau: ma tea waia e pei tea mariana naga navasaana midiriana maga euga lolomana. 50Go eu mamau puti doropusi a e doko, po sava pano.
51Go natureai sikai eu mamau dausi a pano, waina e m̃alam̃ala pei tea kulugoroana ki nakulukulu ni linen sikai: 52go eu pua soki a; ma e doropusi nakulukulu ni linen e doko, po m̃alam̃ala sava pano.
53Go eu piragi lua Yesu pano punusi tea viri warua liu: go nae go tea viri warua maga mamau puti go tea matua maga go tea midiri maga eu mamau saisai. 54Go Petero e dausi a uvea, pa pa e sili paki namasopa ni nasum̃a ki tea viri warua liu; go e do natano sikoti tasiga maga, po datalai namarama ni nakapu. 55Go tea viri warua maga go nasaisaiana mamau eu laaga nanoasokisokiana dip̃a Yesu naga euga mari punue a; go eu da pap̃ai a mau. 56Nalakena tea laapa eu noasokisoki sorosoro dip̃a e, go nanoasokisokiana adeada maga eu da pataka sikai mau. 57Go te seara eu duleana, po noasokisoki sorosoro dip̃a e, 58po naga, Kinami au dogoe e naga, Kinau aga wo dakai nasum̃a tapu waia waina e pei tea mariana ki nam̃elearu maga, go ragi ni naaleatia dolu aga wo davagi tea p̃ota sikai asa waina ega ta pei tea mariana ki nam̃elearu maga mau. 59Go nanoasokisokiana adeada e dapala nogoe ma e da pataka sikai mau. 60Go tea viri warua liu e duleana m̃aleoputo, po pusuusu paki Yesu, e naga, Ku da pasa dara te navatuna kite? Tea maga waia eu noasokisoki dip̃a ko nasava? 61Ma e punuta, po da pasa dara te navatuna mau. Tea viri warua liu e moro pusuusu paki nia, po noa ki nia, e naga, Nigo ku pei Kristo, Tea Vasap̃iakiana Natuna kite? 62Go Yesu e naga, Kinau a pei nae: go kuga wo punusi naatam̃oli Natuna ega wo doko pisari nam̃elearu ni matua ni nakasuaana, po do umai pilake napopouru maga ni nakoroatelagi. 63Go tea viri warua liu e puap̃orae sugoro aneana maga, po naga, Tuga moro kasa ki tea noasokisoki maga? 64Ku po dogo navasasakiana: nimu ku midoa ki nasava? Go eu mamau puti dip̃akotovi a naga e pei tea waina ega mate. 65Go te seara eu pae asa daniu sa, po p̃augoro namatana, po dip̃a e, po noa ki nia, eu naga, P̃a vasa pua: go tasiga maga eu piragi a ki natapagiana maga.
66Go ragi waina Petero e doko etano namasopa ni nasum̃a, nagoroi atara maga ki tea viri warua liu sikai kakada e umai; 67go ragi waina e punusi Petero e datalai, e leo punusi a, po naga, Nigo ma ku sikoti tea ni Nasareth, Yesu. 68Ma e pasagoro, po naga, A da atae a mau, go a da midoaki atae tea waina ku noa e mau: go e dave paki nawosaia pano; go toa e dare. 69Go nagoroi atara e punusi a, po moro pae asa noa ki tea maga waina eu lawodu pisari a, e naga, Tea waia e pei sikai kakada. 70Ma e moro pasa goro e. Go edaku ki ragi kiki tea maga waina eu lawodu pisari a eu moro noa ki Petero, eu naga, Lomau ku pei sikai kakada; nalakena ku pei tea ni Calilea sikai. 71Ma e pae asa pasa sa ki, po pivisa, e naga, A da atae naatam̃oli wanogoe waina ku noa e mau. 72Go m̃araverave toa e dare sala kerua. Go Petero e midoaki navasaana waina Yesu e noa ki nia asa, e naga, Ragi waina toa ega ko da paka rua dare mau, p̃a wo paka tolu pasa goro au. Go e midoaki paratiki nia, po do dagi.
Currently Selected:
MARKO 14: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
