MARKO 15
15
1Go tea viri warua maga nara ma tea matua maga go tea midiri maga, go nasaisaiana mamau, eu mari navusum̃akiana sikai m̃araverave malip̃ogi, po soli Yesu, po piragi lua e, po pitua ki nia paki Pilato. 2Go Pilato e pusuusu paki nia, e naga, Nigo ku pei Nawota ki naka ni Yudea kite? Go e pasa dara po noa ki nia, e naga, Nigo ku noa. 3Go tea viri warua maga eu pasadip̃a e naleo laapa. 4Go Pilato e moro pusuusu paki nia, e naga, Ku da pasa dara te navatuna kite? P̃a leo, eu pasa dip̃a ko naleo laapa dapale. 5Ma Yesu e da moro pasa dara te navatuna mau; dapala waina Pilato e maga.
6Go sara nasaisaiana e do madeada peresi tea soliana sikai waina eu datagovi a asa. 7Go sikai e doko nagisana Barabba, e pei tea soliana sikoti tea maga waina eu duleana, waina eu mari namaripunueana natuleanaana wanogoe. 8Go taua ni naatam̃oli maga eu sake pano po pae asa pavarani a naga ega mari ega tapala waina e do madeada mari a. 9Go Pilato e pasa dara ra, po naga, Ku masauna naga aga manimu peresi Nawota ki naka ni Yudea kite? 10Nalakena e atae naga tea viri warua maga eu pitua ki nia nalakena eu doitoi a. 11Ma tea viri warua maga eu pasa paria ki taua ni naatam̃oli maga, naga ega madeada peresi Barabba po da peresi Yesu mau. 12Go Pilato e moro pasa dara po noa ki da, e naga, Nalakena tea wanogoe aga mari nasava paki tea waina ku soso e ki Nawota ki naka ni Yudea? 13Go eu moro pioso, eu naga, P̃a turi a nakau valadagoto. 14Go Pilato e noa ki da, e naga, Ekasava, e mari tea sa nasava? Ma eu pioso p̃arua liu, eu naga, P̃a turi a nakau valadagoto. 15Go Pilato, waina e masauna naga ega mari nap̃op̃o ni taua ni naatam̃oli maga ega wia, e madeada peresi Barabba, po pitua ki Yesu, ragi waina e parati sua e, naga ega vei tea turiana nakau valadagoto.
16Go naatam̃oli ni navakalo maga eu piragi lua e sili paki namasopa ni nasum̃a, waina e pei Peretorio; go eu soso saisai ki taua mamau. 17Go eu sugoro e ki sugoro kovagoro miala kesakesa sikai, go eu piri vauvau ni tea makalikali sikai, po sawa ki nia asa; 18go eu pae asa pasa dodomi a, eu naga, P̃a laelaea, Nawota ki naka ni Yudea! 19Go eu p̃oka nap̃auna ki napati nau sikai, po daniu sa, go eu ditip̃atua po lotu ki nia. 20Go ragi waina eu mari saudoa ki sua e, eu sawo lua sugoro miala kesakesa kiana, po sugoro e ki sugoro aneana maga. Go eu piragi a paki etaku naga euga turi a nakau valadagoto.
21Go eu mari tea sikai waina e surata liu ra, Simon ni Kurene, waina e pae navanua umai, Alexander go Rufo tamada, eu mari a e sikoti ra pano, naga ega tapetape nakau valadagoto aneana. 22Go eu piragi a paki tokora Colcotha, waina e pei tea vasadoaana e pei, Tokora ni nagarai. 23Go eu dua e waine waina eu lip̃aki sari murra asa: ma e da dape a mau. 24Go eu duri a nakau valadagoto, po p̃otae sugoro aneana maga sarasara ra, po nadi ki gole ara, naga euga atae tea waina euga sikasikai dape a. 25Go e pei aura ketolu, go eu duri a nakau valadagoto. 26Go namidiriana ni navasadip̃aana kakana e pei tea midiriana elagi, e pei, NAWOTA KI NAKA NI YUDEA. 27Go eu duri tea tapepavakoto dua ero sikoti a; sikai e du taleva ni matua, go sikai e du taleva ni mawiri. 28Go tea maga waina eu surata liu sa eu pasa sa ki nia, 29eu ligiligi p̃au, po naga, Ei! Nigo waina ku dakai nasum̃a tapu, po davagi a naaleatia dolu, p̃a tum̃am̃a mauti pauri ko, po m̃elu dua ki nakau valadagoto siwo umai. 30Go dapala nogoe tea viri warua maga ma eu mari saudoa ki nia dum̃ada paki da, nara ma tea midiri maga eu mamau, po naga, E mauti pauri tea p̃ota maga; e mari sa dum̃anu mauti pauri a. 31Kristo, Nawota ki Israel, ega m̃elu dua ki nakau valadagoto siwo umai ragi waia, naga tuga vunusi po saralomau. 32Go tea waina ero pei tea turiana sikoti a nakau valadagoto ero pasa sa ki nia.
33Go ragi waina e pei aura kelatesa, namaligo e doko usuraki maramana mamau pa pa paki aura keloveti. 34Go aura keloveti Yesu e pioso ki nadaleo kasua sikai, e naga, Eloi, Eloi, lama sabakthani? Waina e pei tea vasadoaana e pei, Sup̃e aginau, Sup̃e aginau, ekasana ku doropusi au? 35Go te seara ni tea maga waina eu lawodu pisari a, ragi waina eu dogo e, eu naga, Kuga leo, e soso Eliyah. 36Go sikai e sava, po pakavuro nalumulumu sikai ki waine kokona, po dakani a ki napati nau sikai, po dua e naga ega munugi a, po naga, Kuga toro e; tuga vunusi, Eliyah ega wo umai naga ega tape a siwo kite? 37Go Yesu e pitua ki nadaleo kasua sikai, po marodua ki namerona. 38Go nakulukulu liko goro p̃otae ni nasum̃a tapu e mawora pae elagi pa pa paki etano po edua asa. 39Go ragi waina senturio, waina e lawodu pisari a kivea ki nia, e punusi naga e marodua ki namerona dapala nogoe, e naga, Lomau naatam̃oli waia e pei Sup̃e Natuna. 40Go nagoroi maga ma eu doko eu do leo punusi pae uvea: nara seara kakada eu pei Maria ni Macdala, go Maria Yakobo kiki go Yose p̃ilada, go Salome; waina, 41ragi waina e doko Calilea, eu dausi a po maneana suasua; go nagoroi p̃ota laapa waina eu sikoti a sake umai paki Yerusalem.
42Go ragi waina e po pei ragi melu, nalakena e pei ragi ni Namarim̃atakiana, waina e pei naaleatia waina e pea goro sabbath, 43Yosef ni Arimathea e umai, tea vusum̃aki dodomadaganiana sikai, waina nae ma e leogoro namarakiana ki Sup̃e, go e piviari paki ekopu punusi Pilato, po datago nap̃atoko ni Yesu. 44Go Pilato e maga e pe mate sua: go e soso senturio umai punusi a, po pusuusu paki nia, E mate sua pae tuai kite? 45Go ragi waina e atae a ki senturio, e dua Yosef nap̃atokona. 46Go e pakotovi nakulukulu ni linen sikai, go e dape a siwo, po lulugoro e ki nakulukulu ni linen wanogoe, po doropusi a matigo sikai waina e pei tea taeana sua vatu laketoko; go e malulua ki vatu sikai paki namata ni matigo. 47Go Maria ni Macdala go Maria Yose p̃ilana ero leo punusi tokora waina e pei tea toropusiana asa.
Currently Selected:
MARKO 15: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
