MATAIO 27
27
1Go ragi waina e po pei malip̃ogi, tea viri warua maga mamau puti go tea matua maga ni narei eu seke dip̃a Yesu naga euga maripunue a: 2go eu soli a, po piragi lua e, po pitua ki nia paki Pilato tea maramara.
3Ragi wanogoe Yuda, waina e pitua ki nia, ragi waina e punusi naga e pei tea tip̃akotoviana, e midoakidoa, po dape liliua ki matele ni silver rualima dolu wanogoe umai dua tea viri warua maga go tea matua maga asa, po naga, 4A mari naleo sa, a pitua ki nada dautua. Ma eu naga, Kinami auga kasa ki nia? Nigo p̃a leo paki naleo wanogoe. 5Go e nadi ki matele ni silver maga wanogoe paki ekopu ni nasum̃a tapu, po m̃elu pano; go e pano po dum̃ana soli punue a; 6Go tea viri warua maga eu dape matele maga ni silver wanogoe, po naga, E da pae nawotaeana mau naga tuga nadi ki nia paki nalia ni m̃ane ni nasum̃a tapu, nalakena e pei naulu ni nada. 7Go eu pusum̃aki, po pakotovi vanua ki tea mari lasa maga ni naruku ara, naga euga ova ki nam̃enaki maga asa. 8Nalakena tea wanogoe vanua wanogoe e pei tea sosoana ki, Vanua ni nada, pa pa paki naaleatia ni masoso. 9Ragi wanogoe tea waina e pei tea noaana pae profeta Yeremiah e lolomana, e naga, Go eu dape matele ni silver rualima dolu wanogoe, naulu ni tea waina naulu kakana e pei tea noap̃otaeana, waina Israel natuna maga seara kakada eu noap̃otae naulu kakana; 10Go eu pitua ki nia raki vanua ki tea mari lasa maga ni naruku, dapala waina Yehovah e dip̃a ki nau asa.
11Ma Yesu e lawodu narae ni tea maramara: go tea maramara e pusuusu paki nia, e naga, Nigo ku pei Nawota ki naka ni Yudea kite? Go Yesu e noa ki nia, e naga, Nigo ku noa e. 12Go ragi waina tea viri warua maga go tea matua maga eu pasa dip̃a e, e da pasa dara te navatuna mau. 13Ragi wanogoe Pilato e noa ki nia, e naga, Ku da dogo naleo laapa waina eu pasa dip̃a ko ara kite? 14Go e da pasa dara e mau, nalo ni te navasaana sikai mau: dapala waina tea maramara e maga p̃arua. 15Go sara nasaisaiana tea maramara e do magi taua ni naatam̃oli maga peresi tea soliana sikai, waina eu masauna. 16Go ragi wanogoe eu peani tea soliana ataeana sikai, nagisana Barabba. 17Nalakena tea wanogoe ragi waina eu saisai, Pilato e noa ki da, e naga, Ku masauna naga aga manimu peresi sei? Barabba, kite Yesu waina e pei tea sosoana ki Kristo? 18Nalakena e atae naga eu pitua ki nia nalakena eu doitoi a. 19Go ragi waina e dasake malo tasake ni navasap̃otaeana, anagoroi e dip̃aki lua sikai e pa punusi a, po naga, P̃a ta mari naatam̃oli leana wanae te navatuna mau; nalakena a sua naleo laapa masoso pae nap̃erea sikai nalakena nae. 20Ma tea viri warua maga go tea matua maga eu pasadie taua maga ni naatam̃oli naga euga tatago Barabba, po mari punue Yesu. 21Ma tea maramara e pasa dara po noa ki da, e naga, Ku masauna naga aga manimu peresi seve tea ni tea rua wanogoe? 22Go eu naga, Barabba. Pilato e noa ki da, e naga, Go aga mari nasava paki Yesu waina e pei tea sosoana ki Kristo? Eu mamau puti naga, Ega vei tea turiana nakau valadagoto. 23Go e naga, Ekasava, e mari naleo sa nasava? Ma eu pioso p̃arua liu, po naga, Ega vei tea turiana nakau valadagoto. 24Go ragi waina Pilato e punusi naga eu da dogo parati ki nadaleona mau, ma naga navasap̃araiana e pakilina, e dape noai, po pavano narae ni taua ni naatam̃oli maga, po naga, Kinau a dautau ki nada ni naatam̃oli leana waia: nimu kuga leo paki naleo wanogoe. 25Go narei mamau eu pasadara po naga, Nadana ega liko gami, go ega liko natugami maga. 26Ragi wanogoe e madeada peresi Barabba: ma e parati Yesu po pitua ki nia naga ega vei tea turiana nakau valadagoto.
27Ragi wanogoe naatam̃oli ni navakalo maga ki tea maramara eu piragi lua Yesu paki ekopu ni nasum̃a ki nawota, po saisai ki tagona mamau eu rumai punusi a. 28Go eu duatilua kiana, po maneana sawa ki sugoro kovagoro miala sikai. 29Go eu piri vauvau sikai ni tea makalikali maga po sawa ki nia nap̃auna, po sai ki napati nau sikai e doko nam̃elearuna ni matua; go eu ditip̃atua naraena, po marisaudoa ki nia, eu naga, P̃a laelaea, Nawota ki naka ni Yudea! 30Go eu daniu sa, po puati napati nau wanogoe po p̃okati nap̃auna asa. 31Go ragi waina eu marisaudoa ki sua e, eu sawolua sugoro kovagoro wanogoe ki‐ana, po sugoro e ki sugoro aneana maga, po piragi lua e naga euga turi a nakau valadagoto.
32Go ragi waina eu do dave pano, eu pap̃ai naatam̃oli sikai ni Kurene, nagisana Simon: eu marikasua ki naatam̃oli wanogoe naga ega tapetape nakau valadagoto aneana. 33Go ragi waina eu rumai paki tokora sikai waina e pei tea sosoana ki Colcotha, tea wanogoe e pei tea noaana e pei Tokora ni nagarai, 34eu dua e ega munu waine waina e pei tea marisarisariana ki nakokonae: go ragi waina e menae dogo e, e karai munugi a. 35Go ragi waina eu duri sua e nakau valadagoto, eu dum̃ada madeada dap̃otae sugoro aneana maga, po nadi ki gole: 36go eu do natano po pavaigoro e tokora wanogoe. 37Go eu doropusi elagi ki nap̃auna navasadip̃aana kakana waina e pei tea midiriana, e naga, TEA WAIA E PEI YESU NAWOTA KI NAKA NI YUDEA. 38Ragi wanogoe tea tapepavakoto dua ero pei tea turiana nakau valadagoto sikoti a, sikai e du taleva ni matua, go sikai e du taleva ni mawiri. 39Go tea maga waina eu surata liu sa eu pasa sa ki nia, eu ligiligi p̃au, po naga, 40Nigo waina ku dakai nasum̃a tapu, po davagi a naaleatia dolu, p̃a tum̃am̃a mautipauri ko: ku pe vei Sup̃e natuna, p̃a m̃elu dua ki nakau valadagoto siwo umai. 41Dapala nogoe tea viri warua maga ma eu marisaudoa ki nia, nara ma tea midiri maga go tea matua maga, 42eu naga, E mautipauri tea p̃ota maga; e mari sa dum̃ana mautipauri a. E pei Nawota ki Israel; ega m̃elu dua ki nakau valadagoto siwo umai ragi waia, go tuga wo saralomau asa. 43E pavatu Sup̃e; nae e pe masauna ega vualua e ragi waia: nalakena e naga, A pei Sup̃e Natuna. 44Go tea tape pavakoto maga ma, waina ero pei tea turiana nakau valadagoto sikoti a, ero pasapinoa ki nia ki navasaana sikai maau wanogoe.
45Go namaligo e doko usuraki navanua mamau pae aura kelatesa pa pa paki aura keloveti. 46Go pisari aura keloveti Yesu e pioso ki nadaleo kasua sikai, e naga, Eli, Eli, lama sabakthani? Waina e pei, Sup̃e aginau, Sup̃e aginau, ekasana ku doropusi au a doko? 47Go te seara ni tea maga waina eu lawodu tokora wanogoe, ragi waina eu dogo e, eu naga, Naatam̃oli waia e soso Eliyah. 48Go m̃araverave sikai kakada e sava po dape nalumulumu sikai, po pakavuro e ki waine kokona, po dakani a ki napati nau sikai, po dua e naga ega munugi a. 49Go tea p̃ota maga eu naga, P̃a toro e; tuga vunusi Eliyah ega wo umai naga ega mautipauri a kite. 50Go Yesu e moro pioso ki nadaleo kasua sikai, po pitua ki naatana. 51Go kuga leo, nakulukulu taugoro p̃otae ni nasum̃a tapu e pei tea p̃oraeana pae elagi pa pa paki etano po pei edua; go navanua e pei tea duruakiana; go vatu laketoko maga eu pei tea p̃oraeana; 52go matigo maga eu pei tea wolagatiana; go nap̃atoko laapa ni tea tautau maga waina eu maturu sua, eu pei tea sikeana duleana; 53go eu dave m̃elu dua ki matigoda maga edaku ki natuleanaana aneana, po sili paki natokoana tapu, po pakilina ki tea laapa. 54Go senturio, go tea maga waina nara ma nae eu mamau doko pavaigoro Yesu, ragi waina eu punusi naruru wanogoe, go naleo maga waina eu pei tea mariana, eu mataku p̃arua, po naga, Lomau, tea waia e pei Sup̃e Natuna. 55Go nagoroi laapa eu doko tokora wanogoe, eu do leopunusi pae uvea, waina eu dausi Yesu pae Calilea umai, po do maneana suasua: 56nara seara kakada eu pei Maria ni Macdala, go Maria Yakobo go Yose p̃ilada, go Sebedaio natuna naanoai maga p̃ilada.
57Go ragi waina e po pei ragi melu naatam̃oli sogolapa sikai e pae Arimathea umai, nagisana Yosef, waina nae ma e pei tea vasapiseikiana ki Yesu: 58naatam̃oli wanogoe e pano punusi Pilato, po datago nap̃atoko ni Yesu. Ragi wanogoe Pilato e pitip̃aki naga ega vei tea vituakiana. 59Go Yosef e dape nap̃atokona, po lulugoro e ki nakulukulu ni linen tautau sikai, 60po doropusi a e one matigo vau aneana, waina e dae a vatulaketoko: go e malulua ki vatu warua sikai paki namata ni matigo, po pano. 61Go Maria ni Macdala e doko tokora wanogoe, go Maria kerua, ero do natano pisari matigo.
62Go matamai ki nia, waina e pei naaleatia waina e edakugoro naaleatia ni Namarim̃atakiana, tea viri warua maga go Farisi maga eu pei tea saisaikiana umai punusi Pilato, po naga, 63Nawota, au midoa ki nia, naga tea vilasurue waina e noa, ragi waina e ko mauri doko, e naga, Naaleatia dolu euga nopu go aga wo duleana. 64Nalakena tea wanogoe p̃a vitip̃aki naga matigo ega vei tea marisokiana pa pa paki naaleatia ketolu, mase tea vasapiseikiana aneana maga eu pe wo umai po panako e, po noa ki narei, naga E po duleana m̃elu dua ki tea mate maga: go nasorosoroana edaku ega wo sa liu tea vea. 65Pilato e noa ki da, e naga, Ku peani tagona sikai ni tea vavaigoro maga: kuga vano, po mari soki a ega tapala waina ku mari atae. 66Go eu pano, po mari soki matigo, eu pulu soki vatu, tagona ni tea vavaigoro maga eu sikoti ra asa.
Currently Selected:
MATAIO 27: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
