MATAIO 26
26
1Go e pakilina, ragi waina Yesu e mari sua navasaana maga mamau puti wanogoe, naga e noa ki tea vasapiseikiana aneana maga, e naga, 2Ku atae naga edaku ki naaleatia dua go ega wo pei nasaisaiana ni navakalauana, go naatam̃oli Natuna ega wo pei tea vituakiana naga ega vei tea turiana nakau valadagoto. 3Ragi wanogoe tea viri warua maga, go tea matua maga ni narei eu pei tea saisaikiana paki namasopa ni nasum̃a ki tea viri warua liu, waina e pei tea salagisaana ki Kaiafas; 4go eu pei taua seke naga euga vuasoki Yesu ki nasorosoroana, po mari punue a. 5Ma eu naga, Tuga ta mari a ragi ni nasaisaiana mau, naga navasap̃araiana ega ta pakilina m̃aleoputo ni narei mau.
6Go ragi waina Yesu e doko Bethania, ekopu ni nasum̃a ki Simon waina e pei lepero, 7nagoroi sikai e umai punusi a, waina e dape lasa ni naroro sikai ni naroro lolo ni naulu laapa, go e daki nia nap̃auna, ragi waina e kere one ganikani. 8Ma ragi waina tea vasapiseikiana maga eu punusi a, eu midoaki sa ki nia po naga, Ekasana namarisakiana waia? 9Nalakena naroro lolo waia e mari atae pei tea soriana raki tea warua, po pei tea vituakiana paki tea tika maga. 10Ma Yesu e atae a po noa ki da, e naga, Ekasana ku mari nagoroi waia e dogokitesa? Nalakena e po mari namariana wia sikai paki nau. 11Nalakena ku peani tea tika maga eu sikoti mu doko sara ragi; ma ku da peani au sara ragi mau. 12Nalakena nae e daki naroro lolo waia nap̃atokogu, e mari a naga ega marim̃ata ki nau raki naovakiana. 13Lomau a noa ki mu, naga Tokora waina narogorogoana wia waia e pe wo pei tea rogorogokiana asa maramana mamau, tea waina nagoroi waia e po mari a tea wanogoe ma ega wo pei tea noaana naga nae ega vei tea midoakilagatiana asa.
14Ragi wanogoe tea sikai ni tea rualima sikai tamate dua, waina e pei tea salagisaana ki Yuda Iskariote, e pano punusi tea viri warua maga, 15po naga, Ku suasua naga kuga tua au nasava, go aga wo pitua ki nia paki mu? Go eu maneana dowogi matele ni silver rualima dolu. 16Go pae ragi wanogoe pa pa e laaga ragi wia naga ega vitua ki nia paki da.
17Go naaleatia vea ni bred waina leven e dika asa, tea vasapiseikiana maga eu rumai punusi Yesu, po naga, Seve tokora ku masauna naga auga manigo mari m̃ataki asa naga p̃a kani navakalauana asa. 18Go e naga, Kuga vaki natokoana pano punusi naatam̃oli sikai, go kuga noa ki nia, kuga naga, Tea Vasapiseiki e naga, Ragi aginau e pei m̃aladigi; aga mari navakalauana nasum̃a anigo, kinami ma tea vasapiseikiana aginau maga auga mamau. 19Go tea vasapiseikiana maga eu mari dapala waina Yesu e dip̃a ki da asa; go eu marim̃ata ki navakalauana. 20Go ragi waina e maligo, e doko natano ganikani sikoti tea vasapiseikiana rualima sikai tamate dua; 21go ragi waina eu do ganikani, e naga, Lomau a noa ki mu, naga sikai kakamu ega wo pitua ki nau. 22Go eu susue p̃arua, po pae asa noa ki nia sara naata sikasikai, eu naga, E pei kinau, Nawota, kite? 23Go e pasadara po naga, Tea waina e doko nam̃elearuna lasa sikoti au, nae ega wo pitua ki nau. 24Naatam̃oli Natuna e do pano lomau, dapala waina e pei tea midiriana nalo kakana: ma ai ki naatam̃oli waina naatam̃oli Natuna e pei tea vituakiana pae asa! Naatam̃oli wanogoe e pe ta pakilina mau e pe wia ki nia. 25Go Yuda, waina e pitua ki nia, e pasadara po naga, E pei kinau, Rabbi, kite? E noa ki nia, e naga, Ku pasa gara. 26Go ragi waina eu do ganikani, Yesu e dape bred, po pasam̃ataki, po p̃oraworae a; go e dua tea vasapiseikiana maga, po naga, Kuga tape, kuga kanikani; tea waia e pei nap̃atokogu. 27Go e dape lasa munu sikai, po pasadodom̃ataki, po dua ra, po naga, Kuga mamau puti munugi a; 28nalakena tea waia e pei nadagu ni navasasokiana vau, waina e magi tea laapa pei tea takiana paki namidoakikorokoroana ni namarinaleosaana maga. 29Ma a noa ki mu, naga Aga wo da munu seara ni nawa waia ni vaine mau, pae ragi waia pa pa paki naaleatia waina aga wo munugi a sikoti mu tea vau namarakiana ki Tamagu.
30Go ragi waina eu lega sua nalegaana sikai, eu dave paki tava ni Oliva pano.
31Ragi wanogoe Yesu e noa ki da, e naga, Nimu kuga wo mamau puti pei tea mariana kuga tapilagona nalo kakagu p̃ogi waia: nalakena e pei tea midiriana, e naga, Aga wo atugi tea leo paratiki shiip, go shiip ni navata euga wo pei tea taperaverakiana. 32Ma edaku ki aga wo pei tea sikeana duleana, aga wo pea ki mu paki Calilea pano. 33Ma Petero e pasa dara po noa ki nia, e naga, Tea maga mamau puti eu pe tapilagona nalo kakam̃a, ma kinau aga wo da dapilagona te nap̃ogi mau. 34Yesu e noa ki nia, e naga, Lomau a noa ki‐go, naga p̃ogi waia, ragi waina toa ega ko da dare mau, p̃a wo paka tolu pasa goro au. 35Petero e noa ki nia, e naga, E pe vei naga aga mate sikoti ko, a pe wo da pasagoro ko mau. Go tea vasapiseikiana maga mamau puti eu noa dapala nogoe.
36Ragi wanogoe Yesu ma nara eu mamau umai paki tokora sikai waina nagisana e pei Cethsemane, go e noa ki tea vasapiseikiana aneana maga, e naga, Kuga to natano tokora waia, ma kinau aga ko paki tokora wanana po dapasavasa. 37Go e piragi lua Petero go Sebedaio natuna dua eu sikoti a pano, go e atulake susue po dogokitesa p̃arua. 38Ragi wanogoe e noa ki da, e naga, Naatagu e susue p̃arua, pa pa taga mate: kuga toko nea, po do leleogoro sikoti au. 39Go e paki uvea kiki, po dowo dap̃olosiwo, po dapasavasa, po naga, Mama O, lasa munu waia e pe va dua ki atae, ega va dua ki nau pano: ma ega ta dapala waina kinau a masauna mau, ma ega tapala waina nigo ku masauna. 40Go e umai punusi tea vasapiseikiana maga, po pap̃ai ra eu maturu, go e noa ki Petero, e naga, Nasava, ku dika nakasuaana naga kuga leleogoro sikoti au aura sikai kite? 41Kuga leleogoro po dapasavasa, naga kuga ta dowo paki namaridogoana mau: naatamu e suasua lomau, ma nap̃okasimu e manainai. 42E moro pano sala kerua, po dapasavasa, po naga, Mama aginau O, tea waia e pe mari sa liu au pano, ma naga aga munugi a, namasauana anigo ega vei tea mariana. 43Go e moro umai po pap̃ai ra eu maturu, nalakena namatada eu madaga. 44Go e moro doropusi ra eu doko, po pano, po dapasavasa sala ketolu, po moro noa navasaana sikai maau wanogoe. 45Ragi wanogoe e umai punusi tea vasapiseikiana maga, po noa ki da, e naga, Kuga to maturu ragi waia, po maromaro: kuga leo, aura e pei m̃aladigi, go naatam̃oli Natuna e pei tea vituakiana paki nam̃elearu ni tea marinaleosa maga. 46Kuga tuleana, tuga vano: kuga leo, tea waina e pitua ki nau e doko m̃aladigi.
47Go ragi waina e ko do pasa, kuga leo, Yuda, tea sikai ni tea rualima sikai tamate dua, e umai, go taua warua ni naatam̃oli eu sikoti a umai, eu puati lova go naap̃e, eu m̃elu tea viri warua maga go tea matua maga ni narei. 48Go tea waina e pitua ki nia e dua ra navaivaiana sikai, e naga, Tea waina aga wo dum̃ili a, e pei nae: kuga vua soki a. 49Go e m̃araverave umai punusi Yesu, po naga, P̃a laelaea, Rabbi; go e dum̃idum̃ili a. 50Go Yesu e noa ki nia, e naga, Tagu, nalo ni waina ku umai. Ragi wanogoe eu rumai po doropusi nam̃elearuda Yesu, po puasoki a. 51Go kuga leo, sikai ni tea maga waina eu sikoti Yesu e sai ki nam̃elearuna, po sailua lova aneana, po dae tea suasua ki tea viri warua liu, po dae lua nadaligana. 52Ragi wanogoe Yesu e noa ki nia, e naga, P̃a sai ki lova anigo liliu paki naliana: nalakena tea maga waina eu puati lova euga wo mate ki lova. 53Ku midoa ki nia naga a mari sa pavarani Tamagu ragi waia, go nae e pe wo maginau dip̃akilua umai agelo maga tea laapa liu lecione rualima sikai tamate dua kite? 54Ma waina e pe tapala nogoe navasaana midiriana maga eu pe lolomana dapale sava, waina eu noa naga e one asa one naga ega tapala waia? 55Aura wanogoe Yesu e noa ki taua maga ni naatam̃oli, e naga, Nimu ku pua lova go naap̃e naga kuga vua soki au dapala waina ku pe umai dip̃a tea tape pavakoto sikai? Sara naaleatia a dasake ekopu ni nasum̃a tapu po do pasapiseiki, go ku da puasoki au mau. 56Ma tea mamau waia e po pakilina, naga navasaana midiriana maga ki profeta maga euga lolomana. Ragi wanogoe tea vasapiseikiana maga mamau puti eu doropusi a e doko, po sava pano.
57Go tea maga waina eu pua soki Yesu eu piragi lua e paki nasum̃a ki Kaiafas tea viri warua liu, tokora waina tea midiri maga go tea matua maga eu pei tea saisaikiana asa. 58Ma Petero e dausi a uvea, pa pa paki namasopa ni nasum̃a ki tea viri warua liu, po sili paki asa, po do natano sikoti tasiga maga, naga ega vunusi namatap̃agona edaku. 59Go tea viri warua maga go nasaisaiana mamau eu laaga nanoasokisokiana sorosoro dip̃a Yesu, naga euga maripunue a; 60go eu da pap̃ai a mau, go tea noasokisoki sorosoro laapa eu rumai. 61Ma edua ero edaku umai, po naga, Naatam̃oli waia e naga, A mari atae dakai nasum̃a tapu ki Sup̃e, po davagi a naaleatia dolu. 62Go tea viri warua liu e duleana, po noa ki nia, e naga, Ku da pasadara te navatuna mau kite? Nara ero noasokisoki dip̃a ko nasava? 63Ma Yesu e punuta doko. Go tea viri warua liu e noa ki nia, e naga, A mari ko p̃a vivisa pae Sup̃e mauri, naga p̃a noa ki gami asa, nigo ku pei Kristo, Natu ni Sup̃e kite? 64Yesu e noa ki nia, e naga, Nigo ku po noa e: ma a noa ki mu, naga Pae ragi waia pa pa kuga wo punusi naatam̃oli Natuna ega wo doko pisari nam̃elearu ni matua ni nakasuana, po do umai doko napopouru maga ni nakoroatelagi. 65Ragi wanogoe tea viri warua liu e pua p̃orae sugoro aneana maga, po naga, E po pasasaki: tuga moro kasa ki tea noa sokisoki maga? Kuga leo, ku po dogo navasasakiana ragi waia: nimu ku midoa ki nasava? 66Eu pasa dara po naga, E pei tea waina ega mate. 67Ragi wanogoe eu daniu naraena po dip̃a e: go seara eu dapagi a, 68po naga, P̃a vasapua paki gami, Kristo, tea waina e p̃okati ko e pei sei?
69Ma Petero e doko katama namasopa ni nasum̃a: go nagoroi atara sikai e umai punusi a, po naga, Nigo ma ku sikoti Yesu tea ni Calilea. 70Ma e pasagoro e narae ni tea mamau puti, po naga, A da atae tea waina ku noa e mau. 71Go ragi waina e dave paki nawosaia pano, nagoroi atara p̃ota sikai e punusi a, po noa ki tea maga waina eu du tokora wanogoe, e naga, Naatam̃oli waia ma e sikoti Yesu ni Nasareth. 72Go e moro pasagoro e pilake navivisaana sikai, po naga, A da atae naatam̃oli wanogoe mau. 73Go edaku ki ragi kiki tea maga waina eu lawodu eu rumai po noa ki Petero, eu naga, Lomau nigo ma ku pei sikai kakada; nalakena navasaana anigo ma e mari ko ku doko lina. 74Ragi wanogoe e atulake naga ega vasasaki po pivisa, po naga, A da atae naatam̃oli wanogoe mau. 75Go m̃araverave toa e dare. Go Petero e midoaki navasaana waina Yesu e noa e, e naga, Ragi waina toa ega ko da dare mau, p̃a wo paka tolu pasagoro au. Go e paki katama po dagi p̃arua.
Currently Selected:
MATAIO 26: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
