MATAIO 16
16
1Go Farisi maga go Sadduki maga eu rumai po maridogo e, po datagovi a naga ega visei ki da navaivaiana sikai ega vae nakoroatelagi umai. 2Ma e pasadara po noa ki da, e naga, Ragi waina e po pei ragi melu ku naga, Elo ega wo dara: nalakena nakoroatelagi e miala. 3Go malip̃ogi, ku naga, Usa ega wo p̃owo masoso: nalakena nakoroatelagi e miala loa. Ku leop̃otae atae narae ni nakoroatelagi; ma ku da leop̃otae atae navaivaiana maga ni ragi maga mau. 4Tagona sa go maripele eu datago navaivaiana sikai; go te navaivaiana sikai ega wo da pei tea vituakiana paki da mau, ma navaivaiana ni Yonah ega sikina. Go e doropusi ra eu doko, po pano.
5Go tea vasapiseikiana maga eu rumai paki taleva kerua ni elau, go eu malio ki bred. 6Go Yesu e noa ki da, e naga, Kuga vunusi po matamatua ki leven ki Farisi maga go ki Sadduki maga. 7Go eu dum̃ada pusum̃aki paki da, po naga, Nalakena tu da dape te bred seara mau. 8Go Yesu e atae a po naga, Tea saralomau kiki maga, ekasana ku dum̃amu pusum̃aki paki mu nalakena ku da peani te bred seara mau? 9Ku ko da midoaki atae mau, po da midoaki bred lima ni manu lima, go nala pisa waina ku dape dakati ra? 10Go bred larua ni manu pati, go nalasai pisa waina ku dape dakati ra? 11Ekasana ku da midoaki atae mau naga a da pasa ki mu nalo ni bred mau? Ma kuga matamatua ki leven ki Farisi maga go ki Sadduki maga. 12Ragi wanogoe eu midoakiatae naga e da noa naga euga matamatua ki leven ni bred mau, ma naga euga matamatua ki navasapiseikiana ki Farisi maga go ki Sadduki maga.
13Go ragi waina Yesu e umai paki tokora maga ni Kaisarea Filippi, e pusuusu paki tea vasapiseikiana aneana maga, po naga, Naatam̃oli maga eu noa naga naatam̃oli Natuna e pei sei? 14Go eu naga, Te seara eu naga, Yoane Bapetiso; te seara, Eliyah: go tea p̃ota seara, Yeremiah, kite profeta maga sikai kakada. 15E noa ki da, e naga, Ma nimu ku noa naga kinau a pei sei? 16Go Simon Petero e pasadara po naga, Nigo ku pei Kristo, Natu ni Sup̃e mauri. 17Go Yesu e pasadara po noa ki nia, e naga, Ku maro pa Simon Bar‐Yonah: nalakena nap̃okasi go nada ero da maripakasa ki nia paki‐go mau, ma Tamagu waina e doko nakoroatelagi e mari a. 18Go kinau ma a noa ki‐go, naga nigo ku pei Petero, go vatu laketoko wanogoe aga wo davagi ekalesia aginau asa; go namatapua maga ni Hades euga wo da marimatua ki nia mau. 19Aga wo dua ko tea viloki maga ni namarakiana ni nakoroatelagi: go tea waina p̃a wo solisoki a maramana ega wo pei tea solisokiana nakoroatelagi: go tea waina p̃a wo peresi a maramana ega wo pei tea veresiana nakoroatelagi. 20Ragi wanogoe e pasa parati ki tea vasapiseikiana maga naga euga ta noa ki te naata mau naga nae e pei Kristo.
21Pae ragi wanogoe Yesu e atulake naga ega visei ki tea vasapiseikiana aneana maga, naga e one asa one naga ega vaki Yerusalem pano, go naga ega sua narogokitesaana laapa pae tea matua maga go tea viri warua maga go tea midiri maga, go naga ega vei tea maripunueana, go naga ega vei tea sikeana ega tuleana naaleatia ketolu. 22Go Petero e puati a, po atulake naga ega vasakasua ki nia, po naga, Sup̃e ega dodomi ko, Nawota: tea wanogoe ega wo da pakilina ki‐go mau. 23Ma e dum̃ana doa e, po noa ki Petero, e naga, P̃a vaki natakugu pano, Satan, ku pei tea tapilagonaana aginau: nalakena ku da midoa ki m̃ata ki naleo maga ki Sup̃e mau, ma ku midoa ki m̃ata ki naleo maga ki naatam̃oli. 24Ragi wanogoe Yesu e noa ki tea vasapiseikiana aneana maga, e naga, Te naata e pe masauna naga ega edakugoro au umai, ega tum̃ana pasagoro e, go ega tape dakati tea valadagoto aneana, go ega rausi au. 25Nalakena naata waina e pe masauna naga ega mauti pauri namauriana aneana ega wo dape puoli ki nia: go naata waina e pe wo dape puoli ki namauriana aneana nalakena kinau ega wo pap̃ai a. 26Nalakena naatam̃oli sikai ega wo p̃ia asa nasava waina e pe talua maramana mamau po dape puoli ki naatana? Kite naatam̃oli sikai ega wo pitua ki nasava naga ega taulua naatana asa. 27Nalakena naatam̃oli Natuna ega wo umai pilake nasamasamaana ki Tamana nara ma agelo aneana maga euga wo mamau umai; go ragi wanogoe ega wo lagati dua sara naatam̃oli euga sikasikai ega vae namariana adeada. 28Lomau a noa ki mu, naga Tea maga waina eu lawodu nea te seara kakada eu doko, waina euga wo da katidogo namateana mau, pa pa euga wo punusi naatam̃oli Natuna ega to umai namarakiana aneana.
Currently Selected:
MATAIO 16: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
