MATAIO 15
15
1Ragi wanogoe Farisi seara go tea midiri seara eu pae Yerusalem umai punusi a, 2eu naga, Ekasana tea vasapiseikiana anigo maga eu dapiri navasaana vituakiana ki tea ni tagona tuai maga? Nalakena eu da pavano mau ragi waina eu naga euga kani navinaga. 3Go e pasadara po noa ki da, e naga, Ekasana nimu ma, ku dapiri natip̃akiana ki Sup̃e nalakena navasaana vituakiana animu? 4Nalakena Sup̃e e naga, P̃a dodomadagani tamam̃a go p̃ilam̃a: go tea waina e pasa sa ki tamana kite p̃ilana, ega mate ki namateana kakana. 5Ma nimu ku naga, Naata waina e pe noa ki tamana kite p̃ilana, e pe naga, Tea waina ku pe vei tea silaeana asa pae au e pei navituaana sikai paki Sup̃e; e pe wo da dodomadagani tamana mau. 6Go ku mari navasaana ki Sup̃e e pei tea m̃oli nalakena navasaana vituakiana animu; 7Nakalep̃o maga, Isaiah e pea noasai gara nalo kakamu, e naga,
8Narei waia eu dodomadagani au ki nagoleda:
Ma nap̃op̃oda e madu uvea ki nau.
9Ma eu lotu ki p̃alo ki nau.
Eu do pasapisei ki navasapiseikiana waina eu pei natip̃akiana maga ki naatam̃oli.
10Go soso taua ni naatam̃oli maga eu rumai punusi a, go e noa ki da, e naga, Kuga rogo, po midoaki atae: 11Tea waina e sili paki nawokana e da mari naatam̃oli e loa mau; ma tea waina e dave m̃elu dua ki nawokana, tea wanogoe e mari naatam̃oli e loa. 12Ragi wanogoe tea vasapiseikiana maga eu rumai, po noa ki nia, eu naga, Ku atae naga Farisi maga eu maeto ragi waina eu dogo navasaana wanogoe kite? 13Ma e pasadara po naga, Sara tea lawoana, waina Tamagu ni nakoroatelagi e da lawo ra mau, euga wo pei tea vakuluaana. 14Kuga toropusi ra euga doko: eu pei tea maraki kesa maga pae napua. Go tea kesa e pe maraki tea kesa, ero pe wo dua dowo paki m̃orutano sikai. 15Go Petero e pasadara po noa ki nia, e naga, P̃a noakip̃otae gami naluluakia wanogoe. 16Go e naga, Nimu ma ku ko pei tea midoaki sap̃o kite? 17Ku da midoaki atae mau naga sara naleo waina eu sili paki nawoka ni naatam̃oli eu paki nap̃elena pano, po moro m̃elu paki etaku? 18Ma tea maga waina eu dave nawokana pano eu pae nap̃op̃ona umai; go tea maga wanogoe eu mari naatam̃oli e loa. 19Nalakena tea maga waia eu pae nap̃op̃ona, namidodoana sa maga, namaripunueana maga, namaripeleana ki tea vitawiri go tea laki maga, namaripeleana ki tea p̃ota maga, navanakoana maga, nanoasokisokiana sorosoro maga, navasasakiana maga: 20tea maga wanogoe eu pei tea maga waina eu mari naatam̃oli e loa: ma naatam̃oli e pe kanikani go e pe ta pea pavano mau e pe ta loa asa mau.
21Go Yesu e dave m̃elu dua ki tokora wanogoe, po m̃elu paki tokora maga ni Tair go Sidon pano. 22Go kuga leo, nagoroi ni Kanaan sikai e dave pae kokoi maga wanogoe umai, po pioso, e naga, Nawota O, natu ni David, p̃a dodomi au; natugu nagoroi e pei dimon pa te pa sa. 23Ma e da pasadara e te navasaana sikai mau. Go tea vasapiseikiana aneana maga eu rumai po pavarani a, eu naga, P̃a tip̃aki lua e; nalakena e do pioso dausi gida. 24Ma e pasadara po naga, A pei tea tip̃akiluaana umai punusi shiip sasap̃o ni nasum̃a ni Israel eu sikida. 25Ma e umai po lotu ki nia, po naga, Nawota, p̃a dodomi au. 26Ma e pasadara po naga, E da p̃ia mau naga euga tape navinaga ki piakirikiri maga po nadi ki nia dua koria maga asa. 27Ma e naga, Ioro, Nawota, nalakena koria maga ma eu do gani navero maga waina eu pevera pae wede ki talakeada. 28Ragi wanogoe Yesu e pasadara po noa ki nia, e naga, Nagoroi O, nasaralomauana anigo e p̃arua, ega manigo pei tea mariana ega tapala waina ku masauna. Go natuna nagoroi e pei tea maripauriana pae aura wanogoe pa pa.
29Go Yesu e m̃elu dua ki tokora wanogoe pano, po umai paki m̃aladigi ki natasi ni Calilea; go e sake paki tava pano, po dasake tokora wanogoe. 30Go taua warua maga ni naatam̃oli eu rumai punusi a, eu piragi tea vei pito maga, tea kesa maga, tea vei pusa maga, tea vei gole maga, go tea p̃ota laapa eu sikoti ra umai, go eu doropusi ra pisari nam̃elena; go e maripauri ra: 31dapala waina taua ni naatam̃oli maga eu maga, ragi waina eu punusi tea vei pusa maga eu do pasa, tea vei gole maga eu po pei tea mamaau, go tea vei pito maga eu do surata, go tea kesa maga eu do leosai: go eu samasamani Sup̃e ki Israel.
32Go Yesu e soso tea vasapiseikiana aneana maga eu rumai punusi a, go e naga, A maritadodomi taua ni naatam̃oli, nalakena eu sikoti au doko naaleatia dolu go eu da peani te navatuna waina euga kani a mau: go a da masauna mau naga aga tip̃aki lua ra euga vali doko, eu pe matekimala napua. 33Go tea vasapiseikiana maga eu noa ki nia, eu naga, Tuga veani bred malo p̃alo waia ega vae esava naga taua warua dapala tea waia euga kanikani dawosa? 34Go Yesu e noa ki da, e naga, Ku peani bred pisa? Go eu naga, E larua, go naika kirikiri pisa maau. 35Go e dip̃aki taua ni naatam̃oli maga naga euga to natano; 36go e dape bred larua wanogoe go naika maga wanogoe; go e dapasavasa dodom̃ataki po p̃oraworae, po pitua paki tea vasapiseikiana maga, go tea vasapiseikiana maga eu pitua paki taua maga ni naatam̃oli maga. 37Go eu mamau puti ganikani, po dawosa: go eu pilae matele maga waina eu dupele po pai ra, eu pei nalasai larua, eu pura puti. 38Go tea maga waina eu ganikani eu pei naanoai manu pati, nagoroi go piakirikiri eu sokari ra. 39Go e dip̃aki lua taua maga ni naatam̃oli, po pagi boti, go e umai paki kokoi maga ni Macadan.
Currently Selected:
MATAIO 15: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
