LEVITIKO 15
15
1Go Yehovah e pasa paki Moses go Aaron, 2po naga, Koroga vasa paki Israel natuna maga, po noa ki da, po naga, Waina naata sikai e pe veani nasaraana sikai waina e sara m̃elu nap̃atokona, nae e pe loa nalakena nasaraana aneana. 3Go tea waia e pei nawotaeana nalo ni naloaana aneana ni nasaraana aneana: nap̃atokona e pe sara ki nasaraana aneana, kite nap̃atokona e pe wono ki nasaraana aneana, ma e pe vei naloaana aneana. 4Te nawewele waina tea waina e peani nasaraana e pe one asa, e po loa: go te naleo waina e pe tasake asa, e po loa. 5Go te naata e pe kisidogo nawewele aneana, ega sarue sugoro aneana maga, po loloso noai, go e po loa pa pa paki ragi melu mau. 6Go te naata e pe tasake doko tokora waina tea waina e peani nasaraana e pea dasake doko asa, ega sarue sugoro aneana maga, po loloso noai, go e po loa pa pa paki ragi melu mau. 7Go te naata e pe kisidogo nap̃atoko ni tea waina e peani nasaraana, ega sarue sugoro aneana maga, po loloso noai, go e po loa pa pa paki ragi melu mau. 8Go waina tea waina e peani nasaraana e pe taniu paki naata waina e dautau; ragi wanogoe ega sarue sugoro aneana maga, po loloso noai, go e po loa pa pa paki ragi melu mau. 9Go te sawagoro nam̃adu ni ass waina naata waina e peani nasaraana e pe sakesaake asa, e po loa. 10Go te naata e pe kisidogo te navatuna sikai waina e pea doko etano ki nia, ega wo loa pa pa paki ragi melu mau: go naata waina e pe tapetape naleo maga wanogoe, ega sarue sugoro aneana maga, po loloso noai, go e po loa pa pa paki ragi melu mau. 11Go naata waina e peani nasaraana e pe ta pavano noai mau, go e pe kisidogo te naata, naata wanogoe ega sarue sugoro aneana maga, po loloso noai, go e po loa pa pa paki ragi melu mau. 12Go tea waina e peani nasaraana, e pe kisidogo lasa ni naruku, lasa wanogoe ega vei tea marip̃oraeana: kite e pe vei lasa ni nakau, ega vei tea sarue‐lua‐ana ki noai. 13Go ragi waina tea waina e peani nasaraana e po pei tea mari‐dautau‐kiana m̃elu dua ki nasaraana aneana, ragi wanogoe ega tum̃ana peve parati ki nakup̃a larua raki namari‐dautau‐ki‐nia‐ana, go ega sarue sugoro aneana maga; go ega sarue nap̃atokona ki noai tautau, go ega wo dautau. 14Go nakup̃a kelatolu, ega maneana tape taroa dua, kite tokopea vusavusa dua umai, paki narae ni Yehovah, paki namata ni tap̃aup̃au ni nasaisaiana, po dua tea viri asa: 15Go tea viri ega vitua ki da, sikai ega vei navituaana ni namarinaleosaana, go kerua ega vei navituaana tap̃arakiana; go tea viri ega maneana mari natap̃augoroana narae ni Yehovah nalo ni nasaraana aneana.
16Go waina naata sikai e pe veani nasua tare aneana e pe m̃elu asa, ragi wanogoe ega sarue nap̃atokona mamau ki noai, go e po loa pa pa paki ragi melu mau. 17Go sara sugoro go sara nawili waina nasua tare e puluti a, euga vei tea sarueana ki noai, go eu po loa pa pa paki ragi melu mau. 18Go nagoroi ma, waina naanoai wanogoe e pe one sikoti a, nara ma naanoai eroga wo dua loloso noai, go ero po loa pa pa paki ragi melu mau.
19Go waina nagoroi sikai e pe veani nasaraana sikai, go nasaraana aneana m̃elu nap̃atokona e pe vei nada, ega toko p̃aova aneana nakup̃a larua pataka ni nakup̃a maga ni namamaragokiana: go naata waina e kisidogo e, e po loa pa pa paki ragi melu mau. 20Go sara naleo waina e one asa doko ragi ni namamaragokiana aneana eu po loa: go sara naleo ma waina e dasake ara eu po loa. 21Go naata waina e kisidogo nawewele aneana, ega sarue sugoro aneana maga, po loloso noai, go e po loa pa pa paki ragi m̃elu mau. 22Go naata waina e pe kisidogo te navatuna waina nagoroi wanogoe e dasake asa, ega sarue sugoro aneana maga, po loloso noai, go e po loa pa pa paki ragi melu mau. 23Go e pe kisidogo nawewele kite te navatuna waina e dasake asa, naata waina e kisidogo e, e po loa pa pa paki ragi melu mau. 24Go waina naanoai sikai e pe one sikoti nagoroi, go tea mamaragokiana ki nagoroi e pe liko asa, e po loa, go ega wo loa nakup̃a larua; go nawewele waina e pe one asa, e po loa. 25Go waina nagoroi sikai e pe veani nasaraana ni nada aneana, go e pe sara naaleatia laapa waina e da pei ragi ni natoko‐p̃aova‐ana aneana mau, kite e pe veani nasaraana aneana e pe liu ragi ni natoko‐p̃aovaana aneana; sara naaleatia waina e do sara, e po loa, dakiusi naaleatia maga ni natoko‐p̃aova‐ana aneana: e po loa. 26Te nawewele waina e pe one asa ni sara naaleatia ni nasaraana aneana, e pe wo dakiusi nawewele ni p̃aova aneana: go te navatuna waina e pe tasake asa, e po loa, dakiusi naloaana ni namamaragokiana aneana. 27Go naata waina e pe kisidogo naleo maga wanogoe e po loa, go ega sarue sugoro aneana maga, po loloso noai, go e po loa pa pa paki ragi melu mau. 28Ma waina e po pei tea mari‐dautau‐kiana m̃elu dua ki nasaraana aneana, ragi wanogoe ega wo dum̃ana peve parati ki naaleatia larua, go edaku ki tea wanogoe ega wo dautau. 29Go nakup̃a kelatolu, ega wo dape taroa dua, kite tokopea vusavusa dua, po piragi ra umai punusi tea viri, paki namata ni tap̃aup̃au ni nasaisaiana. 30Go tea viri ega vitua ki sikai ega vei navituaana ni namarinaleosaana, go kerua ega vei navituaana tap̃arakiana; go tea viri ega maneana mari natap̃augoroana narae ni Yehovah nalo ni nasaraana ni naloaana aneana. 31Dapala nogoe kuga vavaigoro Israel natuna maga euga tautau m̃elu dua ki naloaana adeada; naga euga ta mari tokora tapu aginau waina e doko m̃aleoputo kakada ega loa mau, po mate naloaana adeada. 32Tea waia e pei nawotaeana nalo ni naata waina e peani nasaraana sikai, go nalo ni naata waina nasua tare aneana e m̃elu asa, waina e loa asa; 33Go nalo ni nagoroi waina e sua namasakiana aneana, go nalo ni naata waina e peani nasaraana sikai, go nalo ni nagoroi go nalo ni naanoai waina e one sikoti a, waina e loa.
Currently Selected:
LEVITIKO 15: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
