LEVITIKO 14
14
1Go Yehovah e pasa paki Moses, po naga, 2Tea waia ega vei nawotaeana nalo ni tea vei lepero doko naaleatia ni namari‐dautaukinia‐ana: ega vei tea viragiana umai punusi tea viri: 3Go tea viri ega tave pano paki etaku ni tokora ni nam̃enakiana; go tea viri ega leousiusi a, go p̃a leo, waina nasasanaana ni navei‐lepero‐ana ki tea vei lepero e pe apu; 4Ragi wanogoe tea viri ega vitip̃aki naga euga magi naata waina ega vei tea mari‐dautau‐kiana dape umai manu mauri go dautau eroga rua, go nakau sidar, go tea miala, go hussop: 5Go tea viri ega vitip̃aki naga euga mari punue manu dua wanogoe sikai kakada ega toko lasa ni naruku elagi ni noai tautau: 6Go ega tape manu mauri pilake nakau sidar, go tea miala, go hussop, go ega pupugi ra ma manu mauri, nada ni manu waina e pei tea maripunueana sua, elagi ni noai tautau: 7Go ega meseura ki nada paka larua paki naata waina ega vei tea mari‐dautaukiana m̃elu dua ki nasasanaana ni navei‐leperoana, po noasai naga e dautau, go ega veresi manu mauri ega vano. 8Go naata waina ega vei tea maridautaukiana ega sarue sugoro aneana maga, po karo lua naloluna, go ega loloso noai, go ega wo dautau: go edaku ki tea wanogoe ega umai paki tokora ni nam̃enakiana, ma ega ko madoko etaku ni tap̃aup̃au aneana doko naaleatia larua. 9Go ega wo doko nakup̃a kelarua naga ega karo lua nalolu nap̃auna, go nalolu nasina, go navasumatana maga, naloluna mamau puti ega vei tea karoluaana: go ega sarue sugoro aneana maga, go ega sarue nap̃atokona ki noai, go ega wo dautau. 10Go nakup̃a kelatolu ega tape shiip natuna tea anoai eroga rua, tea mamaau p̃ia, go shiip natuna tea goroi sikai ni natau sikai, tea mamaau p̃ia, go namagovai dolu m̃elu kekerualima ni flaur wia, ega vei navituaana ni flaur, tea sarisariana pilake naroro, go lasa sikai ni naroro. 11Go tea viri waina ega mari dautau ki nia, ega lawo ki naata waina ega vei tea mari‐dautau‐kiana, go tea mamau puti wanogoe, euga tu narae ni Yehovah, doko namata ni tap̃aup̃au ni nasaisaiana: 12Go tea viri ega vuati shiip natuna anoai sikai, po pitua ki nia ega vei navituaana sikai ni natapiriana, go lasa ni naroro, po salesalea ki da euga vei navituaana salesaleakiana sikai narae ni Yehovah: 13Go ega mari punue shiip natuna anoai doko tokora waina eu do mari punue navituaana ni namarinaleosaana go navituaana tap̃arakiana asa, doko tokora tapu: nalakena navituaana ni natapiriana e dapala navituaana ni namarinaleosaana, e pei agi tea viri: e pei tea tapu warua liu: 14Go tea viri ega tape kovai nada ni navituaana ni natapiriana, go tea viri ega toropusi a ega toko namatap̃ago ni nadaliga ni matua ni naata waina ega vei tea mari‐dautau‐kiana, go kini lapa ni nam̃elearuna ni matua, go kini lapa ni nam̃elena ni matua: 15Go tea viri ega tape kovai naroro waina e doko lasa, po daki nia paki aneana nam̃elearuna ni mawiri: 16Go tea viri ega pupugi nakinina ni matua ki naroro waina e doko nam̃elearuna ni mawiri, go ega meseura ki naroro ega vaka larua ki nakinina, narae ni Yehovah: 17Go tea viri ega tape kovai naroro waina e doko nam̃elearuna, po doropusi a ega toko namatap̃ago ni nadaliga ni matua ni naata waina ega vei tea mari‐dautau‐kiana, go kini lapa ni nam̃elearu ni matua, go kini lapa ni nam̃elena ni matua, doko nada ni navituaana ni natapiriana: 18Go tea viri ega tape naroro waina e doko nam̃elearuna, po daki nia nap̃au ni naata waina ega vei tea mari‐dautau‐kiana: go tea viri ega maneana mari natap̃augoroana narae ni Yehovah. 19Go tea viri ega vitua ki navituaana ni namarinaleosaana, po magi naata waina ega vei tea mari‐dautau‐kiana mari natap̃augoroana, nalakena naloaana aneana; go edaku ki nia ega mari punue navituaana tap̃arakiana: 20Go tea viri ega vitua ki navituaana tap̃arakiana, go navituaana ni flaur, wede ni naviriana: go tea viri ega maneana mari natap̃augoroana, go ega wo dautau.
21Go waina e pe vei tea tika, go naleo aneana e pe ta patakana mau, go ega tape shiip natuna anoai sikai ega vei navituaana ni natapiriana, tea salesaleakiana, naga ega maneana mari natap̃augoroana, go kekerualima sikai ni efah ni flaur wia, tea sarisariana pilake naroro, ega vei navituaana ni flaur, go lasa sikai ni naroro; 22Go taroa dua, kite tokopea vusavusa dua, pataka ni tea waina e mariatae dape a; go sikai ega vei navituaana ni namarinaleosaana, go kerua ega vei navituaana tap̃arakiana. 23Go nakup̃a kelatolu ega viragi ra umai punusi tea viri raki namaridautau‐ki‐nia‐ana, paki namata ni tap̃aup̃au ni nasaisaiana, narae ni Yehovah. 24Go tea viri ega tape shiip natuna ni navituaana ni natapiriana, go lasa ni naroro, go tea viri ega salesalea ki da ega vei navituaana salesaleakiana narae ni Yehovah: 25Go ega mari punue shiip natuna ni navituaana ni natapiriana, go tea viri ega tape kovai nada ni navituaana ni natapiriana, po doropusi a ega toko namatap̃ago ni nadaliga ni matua ni naata waina ega vei tea mari‐dautau‐kiana, go kini lapa ni nam̃elearuna ni matua, go kini lapa ni nam̃elena ni matua: 26Go tea viri ega taki kovai naroro paki aneana nam̃elearuna ni mawiri: 27Go tea viri ega meseura ki naroro waina e doko nam̃elearuna ni mawiri ki nakinina ni matua paka larua narae ni Yehovah: 28Go tea viri ega tape kovai naroro waina e doko nam̃elearuna, po doropusi a nam̃atapago ni nadaliga ni matua ni naata waina ega vei tea mari‐dautau‐kiana, go kini lapa ni nam̃elearuna ni matua, go kini lapa ni nam̃elena ni matua, doko tokora waina nada ni navituaana ni natapiriana e doko asa: 29Go tea viri ega taki naroro waina e doko nam̃elearuna nap̃au ni naata waina ega vei tea mari‐dautau‐kiana, naga ega maneana mari natap̃augoroana narae ni Yehovah. 30Go ega vitua ki taroa sikai, kite tokopea vusavusa sikai, pataka ni tea waina e mariatae dape a; 31Sikai ega vei navituaana ni namarinaleosaana, go kerua ega vei navituaana tap̃arakiana, pilake navituaana ni flaur: go tea viri ega magi naata waina ega vei tea maridautau‐kiana mari natap̃augoroana narae ni Yehovah. 32Tea waia e pei nawotaeana nalo ni naata waina e peani nasasanaana ni navei‐lepero‐ana, waina e da mariatae pitua ki navituaana maga raki namari‐dautaukiniaana.
33Go Yehovah e pasa paki Moses go paki Aaron, 34po naga, Ragi waina kuga vakilina navanua ni Kanaan, waina a dua mu asa ega vei naveaniana sikai, go aga toropusi nasasanaana ni navei‐lepero‐ana ega toko nasum̃a sikai ni navanua ni naveaniana animu; 35Ragi wanogoe tea waina e pei talakea ni nasum̃a wanogoe ega umai punusi tea viri, po naga, A punusi naga e dakiusi nasasanaana sa sikai e doko nasum̃a: 36Go tea viri ega vitip̃aki naga euga vea daraku ekopu nasum̃a, pea ki tea viri ega sili po punusi nasasanaana, mase tea mamau puti waina eu doko nasum̃a eu pe vei tea mariana eu pe loa: go edaku ki nia tea viri ega wo sili po leousiusi nasum̃a: 37Go ega leousiusi wotu ni nasasanaana, go p̃a leo, waina wotu e pe sawarawara mamalakesa kite mimiala doko namalo maga ni nasum̃a, go naleopunusi‐ana kakana e pe vakipua liu namalo ni nasum̃a; 38Ragi wanogoe tea viri ega tave m̃elu dua ki nasum̃a paki namata, go ega kokoro p̃onoti nasum̃a naaleatia larua: 39Go tea viri ega moro umai nakup̃a kelarua, po moro leousiusi a: go p̃a leo, waina wotu ni nasasanaana e pe soka peravera namalo maga ni nasum̃a; 40Ragi wanogoe tea viri ega vitip̃aki naga euga tape lua vatu maga waina nasasanaana e doko ara, po nadi ki da paki tokora sikai waina e loa etaku ni natokoana: 41Go ega noa naga euga karo nap̃irikia ni ekopu ni nasum̃a daliviri, go euga taki lua nam̃otam̃ota ni laime waina euga karo lua e paki tokora loa sikai etaku ni natokoana: 42Go euga tape vatu p̃ota maga po doropusi ra doko nalia ni vatu vea maga wanogoe; go euga tape naruku p̃ota po moro puluti nasum̃a asa. 43Go waina nasasanaana sa e pe moro liliu umai, po gani nasum̃a, edaku ki vatu maga eu po pei tea tapeluaana, go edaku ki nakaro‐pakasa‐kiana ni nasum̃a, go edaku ki navuluti‐sokiana; 44Ragi wanogoe tea viri ega moro umai po moro leousiusi a, go p̃a leo, waina nasasanaana e pe moro soka peravera nasum̃a, nae e pei nasasanaana ni navei‐lepero‐ana waina e sa liu waina e doko nasum̃a: e loa. 45Go ega rakai nasum̃a, vatu kakana maga, go nakau kakana maga, go napuluvulusoki mamau puti ni nasum̃a; go ega tape lua ra m̃elu dua ki natokoana paki tokora loa sikai. 46Go naata waina e pe sili paki nasum̃a ragi mamau puti waina e pei tea kokoro‐p̃onoti‐ana, nae ma ega wo loa pa pa paki ragi melu mau. 47Go naata waina e pe one ekopu ni nasum̃a, ega sarue sugoro aneana maga; go naata waina e pe kanikani ekopu ni nasum̃a, ega sarue sugoro aneana maga. 48Go waina tea viri e pe sili umai po leousiusi a, go p̃a leo, nasasanaana e pe ta disu peravera nasum̃a mau, edaku ki nasum̃a e po pei tea vulutiana; ragi wanogoe tea viri ega noasai naga nasum̃a e dautau, nalakena nasasanaana e po apu. 49Go ega tape manu dua, go nakau sidar, go tea miala, go hussop, raki namari‐dautau‐ki‐ana ni nasum̃a: 50Go ega mari punue manu sikai doko lasa ni naruku waina noai tautau e doko asa: 51Go ega tape nakau sidar, go hussop, go tea miala, go manu mauri, po pupugi ra nada ni manu maripunueana, go noai tautau, po meseura ki nia nasum̃a paka larua: 52Go ega mari dautau ki nasum̃a ki nada ni manu go ki noai tautau, go ki manu mauri, go ki nakau sidar, ki hussop, go ki tea miala: 53Ma ega veresi manu mauri ega m̃elu dua ki natokoana pano paki namalasi: dapala nogoe ega magi nasum̃a mari natap̃augoroana: go ega wo dautau.
54Tea waia e pei nawotaeana nalo ni nasasanaana ni navei‐lepero‐ana visarasara maga, go nalo ni napukupukuraana; 55Go nalo ni nasasanaana ni navei‐lepero‐ana doko sugoro, go doko nasum̃a; 56Go nalo ni natoputopuana, go ni navakarago, go ni wotu maranirani: 57Tea waia e pei nawotaeana nalo ni nasasanaana ni navei‐lepero‐ana: naga ega visei ki ragi waina e loa, go ragi waina e dautau.
Currently Selected:
LEVITIKO 14: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
