LEVITIKO 16
16
1Go Yehovah e pasa paki Moses, edaku ki namateana ki Aaron natuna dua, ragi waina ero disu paki m̃aladigi ki narae ni Yehovah po mate; 2Go Yehovah e noa ki Moses, e naga, P̃a vasa paki taim̃a Aaron, po noa naga ega ta umai sara ragi paki tokora tapu waina e doko ekopu ni tea taugoro‐p̃otae, kivea ki tea tap̃augoro waina e doko elagi ni areka; naga ega ta mate mau: nalakena kinau aga wo pakilina doko napopouru elagi ni tea tap̃augoro. 3Aaron ega wo sili paki tokora tapu pilake tea waia: ega tape kau anoai vusavusa sikai ega vei navituaana ni namarinaleosaana, go shiip anoai sikai ega vei navituaana tap̃arakiana. 4Ega suni sugoro tokop̃ai nawilina ni linen, go ega vasi tea vasiana vuru ni linen, go ega vei tea tasokiana ki tasoki ni linen, go ega suni tap̃au vivisiana ni linen: tea maga waia eu pei tea suniana tapu maga; go ega sarue nap̃atokona ki noai, po suni ra. 5Go ega tape ki nasaisaiana ni Israel natuna maga, naninani anoai dua ega vei navituaana ni namarinaleosaana, go shiip anoai sikai ega vei navituaana tap̃arakiana. 6Go Aaron ega vitua ki kau anoai ni navituaana ni namarinaleosaana, waina e pei aneana, go ega tum̃ana maneana po magi tea ni nasum̃a aneana mari natap̃augoroana. 7Go ega vuati naninani dua, po doropusi ra narae ni Yehovah doko namata ni tap̃aup̃au ni nasaisaiana. 8Go Aaron ega nadi ki gole nalo ni naninani dua wanogoe; gole sikai ega vei agi Yehovah, go gole kerua ega vei agi Asasel. 9Go Aaron ega vitua ki naninani waina gole e magi Yehovah dowo asa, ega vei navituaana ni namarinaleosaana. 10Ma naninani waina gole e magi Asasel dowo asa, ega vei tea toropusiana mauri narae ni Yehovah, naga ega maneana mari natap̃augoroana, go naga ega vei tea veresiana ega magi Asasel pei tea tip̃akiluaana paki masop̃alo pano. 11Go Aaron ega vitua ki kau anoai ni navituaana ni namarinaleosaana waina e pei aneana, go ega tum̃ana maneana go magi tea ni nasum̃a aneana mari natap̃augoroana, go ega mari punue kau anoai ni navituaana ni namarinaleosaana waina e pei tea aneana: 12Go ega tape lasa sikai ni tea ni nap̃o wia ega vura ki nam̃elevara vavaga pae wede ni naviriana narae ni Yehovah, go nam̃elearuna eroga vura ki tea ni nap̃o lolo, tea tuki‐p̃oroworosim̃ataki‐ana, po dape a umai paki ekopu ni tea taugoro‐p̃otae: 13Go ega toropusi tea ni nap̃o lolo ega toko nakapu narae ni Yehovah, naga naasua ni tea ni nap̃o lolo wanogoe ega melugoro tea tap̃augoro waina e doko elagi ni nanoasokisokiana, naga ega ta mate mau: 14Go ega tape kovai nada ni kau anoai, po meseura ki nia ki nakinina paki tea tap̃augoro taleva ni elo sake; go ega meseura ki nada ki nakinina paki kivea ki tea tap̃augoro paka larua. 15Go ega mari punue naninani ni navituaana ni namarinaleosaana waina e pei agi narei, po dape nadana umai paki ekopu ni tea taugoro‐p̃otae, po mari ega tapala waina e pea mari a ki nada ni kau anoai, po meseura ki nia elagi ni tea tap̃augoro, go kivea ki tea tap̃augoro: 16Go ega magi tokora tapu mari natap̃augoroana nalakena naloaana ki Israel natuna maga, go nalakena natapiriana adeada maga, go namarinaleosaana adeada maga mamau puti: go ega magi tap̃aup̃au ni nasaisaiana waina e doko sikoti ra m̃aleoputo ni naloaana adeada maga mari dapala nogoe. 17Go te naata sikai ega ta doko ekopu ni tap̃aup̃au ni nasaisaiana mau pae ragi waina ega sili naga ega mari natap̃augoroana doko tokora tapu, pa pa ega moro dave, edaku ki e po maneana po magi tea ni nasum̃a aneana, go magi taua mamau ni Israel mari sua natap̃augoroana. 18Go ega tave paki katama paki wede ni naviriana waina e doko narae ni Yehovah, po magi wede ni naviriana mari natap̃augoroana; go ega tape kovai nada ni kau anoai, go nada ni naninani, po doropusi a ega toko napati maga ni wede ni naviriana daliviri. 19Go ega meseura ki nada ki nakinina paki asa paka larua, po mari dautau ki nia, po dapugoro e m̃elu dua ki naloaana maga ki Israel natuna maga. 20Go ragi waina ega mari sua natap̃augoroana ni tokora tapu, go tap̃aup̃au ni nasaisaiana, go wede ni naviriana, ega vitua ki naninani mauri: 21Go Aaron ega toropusi nam̃elearuna dua nap̃au ni naninani mauri, po noasai sara namarinaleotageleana maga mamau puti ki Israel natuna maga, go natapiriana adeada maga, go namarinaleosaana adeada maga; go ega toropusi ra euga toko nap̃au ni naninani wanogoe, po dip̃aki lua e pano paki masop̃alo pae nam̃elearu ni naatam̃oli sikai waina e doko raki nia doko: 22Go naninani ega tapetape sara namarinaleotageleana adeada maga paki maso maladi sikai: go ega toropusi naninani ega vaki masop̃alo pano. 23Go Aaron ega sili paki ekopu ni tap̃aup̃au ni nasaisaiana, po sawo lua sugoro maga ni linen, waina e suni ra ragi waina e sili paki tokora tapu, go ega toropusi ra euga toko tokora wanogoe: 24Go ega sarue nap̃atokona ki noai doko tokora tapu sikai, po suni sugoro aneana maga, po dave umai po pitua ki navituaana tap̃arakiana aneana go navituaana tap̃arakiana ki narei maga, po maneana po magi narei mari natap̃augoroana. 25Go ega tap̃ara ki nap̃eletia ni navituaana ni namarinaleosaana wede ni naviriana. 26Go naata waina e peresi naninani dip̃akiluaana paki Asasel, ega sarue sugoro aneana maga, po loloso noai, go edaku ki tea wanogoe ega sili paki tokora ni nam̃enakiana. 27Go kau anoai ni navituaana ni namarinaleosaana, go naninani ni navituaana ni namarinaleosaana, waina e dape nadada umai naga ega mari natap̃augoroana doko tokora tapu, eroga vei tea tapeana pano paki etaku ni tokora ni nam̃enakiana; go euga tap̃ara ki nawilida, go nap̃okasida, go nataeda ki nakapu. 28Go naata waina ega tap̃ara ki da ega sarue sugoro aneana maga, po loloso noai, go edaku ki tea wanogoe ega sili paki tokora ni nam̃enakiana.
29Go ega manimu pei natawonakiana sikai pa pa ega tu mau du: atelagi kelarua, nakup̃a kerualima ni atelagi, kuga vali, go kuga ta mari te nawosiana mau, nimu naatatoko, kite tea ni nalauna p̃ota waina e do m̃enaki‐atatoko sikoti mu: 30Nalakena doko naaleatia waia, natap̃augoroana ega wo manimu pei tea mariana, naga kuga vei tea mari‐dautau‐kiana; kuga wo dautau m̃elu dua ki namarinaleosaana animu maga mamau puti narae ni Yehovah. 31E manimu pei sabbath ni namaromaroana, go kuga vali; e pei natawonakiana sikai pa pa ega tu mau du. 32Go tea viri waina ega vei tea vuvuraikiana go waina ega vei tea tapugoroana naga ega vei tea viri doko oli tamana, nae ega mari natap̃augoroana, go ega suni sugoro maga ni linen, sugoro tapu maga: 33Go ega magi tokora tapu mari natap̃augoroana, go ega magi tap̃aup̃au ni nasaisaiana, po magi wede ni naviriana, mari natap̃augoroana; go ega magi tea viri maga po magi narei maga ni nasaisaiana mamau mari natap̃augoroana. 34Go tea waia ega manimu pei natawonakiana sikai waina ega tu du po du mau du, naga ega magi Israel natuna maga mari natap̃augoroana ega vaka sikai natau sikai nalo ni namarinaleosaana adeada maga mamau puti. Go e mari dapala waina Yehovah e dip̃aki Moses asa.
Currently Selected:
LEVITIKO 16: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
