PAKI HEBERU MAGA 9
9
1Ma navasasokiana vea ma e peani natawonakiana maga ni nalotuana go tokora tapu kakana, tokora tapu ni maramana waia. 2Nalakena tap̃aup̃au sikai e pei tea mariana, tea vea, waina nakau ni nasulu e doko asa, go wede, go bred tokorae; tap̃aup̃au wanogoe e pei tea sosoana ki tokora Tapu. 3Go ekopu ni tea taugoro kerua, tap̃aup̃au waina e pei tea sosoana ki tokora Tapu liu; 4waina e peani lasa ni tea ni nap̃o wia ni kold sikai, go areka ni navasasokiana, tea vulutigoroana sara tokora kakana ki kold, waina lasa ni kold sikai waina e pai manna e doko asa; go tiko ki Aaron waina e do siria, go tea welewelea dua ni navasasokiana; 5go elagi ki nia kerub dua ni nasamasamaana waina ero do melugoro tea tap̃augoro; nalo ni naleo maga wanogoe au da mari atae noa sikasikai ki da ragi waia. 6Ma ragi waina naleo maga wanogoe eu pei tea marim̃atakisuaana dapala nogoe, tea viri maga eu do paki ekopu ni tap̃aup̃au vea sara ragi, eu do mari nasuasuaana maga; 7ma tea viri warua liu e sikina paki ekopu ni kerua, paka sikai natau sikai, e da masale ki nada mau, waina e do pitua ki nia nalakena nae, go nalakena nasasap̃oana maga ki narei. 8Naatana Tapu e do paivai ki tea waia, naga napua paki tokora tapu e ko da pei tea mariana e doko lina mau, ragi waina tap̃aup̃au vea e ko lawodu; 9waina e pei naluluakia sikai raki ragi waina e doko ragi waia; waina pae asa navituaana maga go naviriana maga eu do pei tea vituakiana, waina eu mari sa mari tea lotu e p̃ialua nalo ni natum̃ana‐ataeana, 10eu pei natawonakiana maga ni nap̃okasi sikai maau, doko navinaga maga go noai munuana maga go nasarueana visarasara maga, waina eu pei tea toropusiana doko ara pa pa paki ragi ni namarileanakiana.
11Ma Kristo waina e umai tea viri warua liu sikai ni naleo wia maga waina euga wo umai, e pae tap̃aup̃au waina e p̃arua liu go waina e p̃ia liu tea vea, waina e da pei tea mariana ki nam̃elearu maga mau, tea wanogoe e pei, e da pei tea ni natawonakiana waia mau, 12go e da pae nada ni pili maga go ni pulu maga mau, ma e pae nadana, paka sikai maau sili paki ekopu ni tokora tapu, po pap̃ai natauluaana waina e du mau du. 13Nalakena nada ni pili maga go ni pulu maga, go natanoapu ni kau natuna nagoroi sikai waina e pei tea meseurakiana paki tea maga waina eu pei tea mariana eu loa, e pe maridautau paki natautauana ni nap̃okasi: 14p̃arua liu ki nia pa nada ni Kristo, waina e pae Naatana waina e du mau du dum̃ana pitua ki nia e pei tea mamaau paki Sup̃e, ega wo mari natum̃amuatae‐mu‐ana ega tautau m̃elu dua ki nawosiana mate maga naga kuga magi Sup̃e mauri suasua! 15Go nalakena tea wanogoe e pei tea vae namawota ni navasasokiana vau sikai, naga, pae namateana sikai raki natauluaana ni natapiriana maga waina eu doko ragi ni navasasokiana tuai, tea maga waina eu pei tea sosoana euga tape nasaiana ni tea veaniana waina e du mau du. 16Nalakena tokora waina naporoakiana sikai e doko asa e one asa one naga namateana ki tea waina e poroa ki ega vei tea viragiana umai. 17Nalakena naporoakiana sikai e kasua nalo ni tea mate: nalakena e da kasua te ragi mau ragi waina tea poroa ki e ko mauri doko. 18Go nalakena tea wanogoe navasasokiana vea e da pei tea veakotokotomauana masale ki nada mau. 19Nalakena ragi waina sara natip̃akiana eu pei tea vasasuaana pae Moses paki narei mamau pae nawotaeana, e dape nada ni pulu vusavusa maga wanogoe go ni pili maga wanogoe, pilake noai go nam̃au ni shiip miala kalakala go hussop, po meseura ki nia paki tusi go paki narei mamau, 20po naga, Tea waia e pei nada ni navasasokiana waina Sup̃e e pitip̃aki asa paki mu. 21Go tap̃aup̃au go naloriki maga mamau puti ni nasuasuaana e meseura ki nada paki da dapala nogoe. 22Go m̃aladigi naleo maga mamau puti eu pei tea maridautaukiana ki nada pae nawotaeana, go masale ki nataki‐nada‐ana namidoakikorokoroana e da doko mau.
23Nalakena tea wanogoe e one asa one naga tea viseikiana maga ni naleo maga waina eu doko nakoroatelagi maga euga vei tea maridautaukiana ki tea maga wanogoe, ma naleo maga ni nakoroatelagi nara euga vei tea maridautaukiana ki naviriana maga waina eu p̃ia liu tea maga wanogoe. 24Nalakena Kristo e da sili paki tokora tapu sikai waina e pei tea mariana ki nam̃elearu maga mau, waina e dakiusi naatulakeana ni tea lomau; ma e sili paki nakoroatelagi, naga ega manigida pakilina narae ni Sup̃e ragi waia: 25go e da sili paki asa naga ega vaka laapa dum̃ana pitua ki nia mau; dakiusi waina tea viri warua liu e sili paki ekopu ni tokora tapu sara natau pilake nada ni tea p̃ota maga; 26nalakena e pe tapala nogoe e pe one asa one naga ega vaka laapa sua navitinumateana pae nanadi‐kilaketano‐ana ni maramana pa pa: ma ragi waia e paka sikai maau pakilina ragi edaku ni ragi varau maga naga ega mari puoli ki namarinaleosaana pae natum̃anapituaki‐niaana naga ega vei naviriana. 27Go dakiusi waina e magi naatam̃oli maga pei tea tawonakiana naga euga vaka sikai mate, go edaku ki tea wanogoe navasap̃otaeana; 28dapala nogoe Kristo ma, waina e paka sikai pei tea vituakiana sua naga ega tapetape namarinaleosaana maga ki tea laapa, ega wo pakilina sala kerua, masale ki namarinaleosaana, ki tea maga waina eu do leogoro asa, paki mamautipauriana.
Currently Selected:
PAKI HEBERU MAGA 9: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
