JENESIS 41
41
1Go e pakilina ragi waina natau dua e nopu, naga Faraoh e p̃erea: go p̃a leo, e lawodu pisari noai sara. 2Go p̃a leo, kau larua eu pae noai sara sake umai, waina eu pei tea leom̃atakiana go waina eu m̃anopunopu; go eu ganikani malo vuravura. 3Go p̃a leo, kau larua p̃ota eu pae noai sara sake umai edakugoro ra, waina eu pei tea leosakiana po m̃agura; go eu lawodu pisari kau p̃ota maga wanogoe nadigi ni noai sara. 4Go kau maga waina eu pei tea leosakiana po m̃agura eu gani kau larua waina eu pei tea leom̃atakiana po m̃anopunopu. Go Faraoh e darapa. 5Go e maturu po p̃erea sala kerua: go p̃a leo, m̃okai larua ni korn eu p̃otu sake namalona sikai maau, waina eu p̃arua po p̃ia. 6Go p̃a leo, m̃okai larua, waina eu p̃ola go waina eu pei tea lagaiana ki nalagi ruatu, eu p̃otu sake edakugoro ra. 7Go m̃okai wola maga eu dinomi m̃okai larua waina eu p̃arua po puka. Go Faraoh e darapa, go p̃a leo, e pei nap̃erea sikai. 8Go e pakilina malip̃ogi naga naatana e pari; go e dip̃aki lua po soso tea midiri tapu mamau puti ni Ityipt, go naatam̃oli manumatua mamau puti kakana: go Faraoh e dogorogo paki da nap̃erea aneana; ma tea magi Faraoh noa p̃otae atae ra e dika. 9Go nap̃au ni tea maga waina eu maneana dape lasa munu e pasa ki Faraoh, po naga, Kinau a midoa ki namarinaleosaana aginau maga masoso: 10Faraoh e maeto ki tea suasua aneana maga, po pitua ki nau paki navavaigoroana nasum̃a ki nap̃au ni tea viviatu maga, kinami ma nap̃au ni tea tao maga: 11Go aro p̃erea ki nap̃erea sikai nap̃ogiana sikai maau, kinau go nae; aro dua p̃erea ki tea waina e pataka ni nanoap̃otaeana ni nap̃erea aginami. 12Go natureai sikai e doko sikoti gami doko tokora wanogoe, waina e pei nawora ni Heberu, tea suasua ki nap̃au ni tea viviatu maga; go aro dogorogo paki nia, go nae e maginami noa p̃otae nap̃erea aginami; e maginau go e maneana noa p̃otae pataka ni nap̃erea aginami. 13Go e pakilina, dapala waina e maginami noa p̃otae, e dapala nogoe doko; e piragi au liliu paki naliagu, go nae, e sara ki nia. 14Go Faraoh e dip̃aki lua po soso Yosef, go eu piragi a m̃araverave pae m̃oru umai: go e dum̃ana masi a, po suni oli sugoro aneana maga, po umai paki ekopu punusi Faraoh. 15Go Faraoh e noa ki Yosef, e naga, A po p̃erea ki nap̃erea sikai, go tea noa p̃otae atae a e dika: go a po dogo ko, eu noa naga ku dogo nap̃erea naga p̃a noa p̃otae a. 16Go Yosef e pasadara Faraoh, po naga, E da pei kinau mau: Sup̃e ega wo pasadara natam̃ateana ki Faraoh. 17Go Faraoh e pasa paki Yosef, e naga, Nap̃erea aginau, p̃a leo, a lawodu nadigi ni noai sara asa: 18Go p̃a leo, kau larua waina eu m̃anopunopu po pei tea leom̃atakiana eu pae noai sara sake umai; go eu ganikani malo vuravura: 19Go p̃a leo, kau larua p̃ota eu sake umai edakugoro ra, waina eu manainai po pei tea leosakiana warua po m̃agura, dapala a da punusi seara waina eu sa dakiusi ra navanua mamau ni Ityipt mau: 20Go kau maga waina eu m̃agura po pei tea leosakiana eu gani kau larua vea waina eu m̃anopunopu: 21Eu paki nap̃alauda, go e da pei tea ataeana naga eu paki nap̃alauda mau; ma eu ko pei tea leosakiana doko, dakiusi sala vea. 22Go a darapa. Go a punusi pae nap̃erea aginau, go p̃a leo, m̃okai larua eu p̃otu sake namalona sikai maau, waina eu puka po p̃ia: 23Go p̃a leo, m̃okai larua, waina eu kokolo, po p̃ola, po pei tea lagaiana ki nalagi ruatu, eu p̃otu sake edakugoro ra: 24Go m̃okai wola maga eu dinomi m̃okai larua waina eu p̃ia: go a noa ki tea midiri tapu maga asa; ma tea noakisai au nanoap̃otaeana kakana e dika. 25Go Yosef e noa ki Faraoh, e naga, Nap̃erea ki Faraoh e pei tea sikai maau: tea waina Sup̃e e naga ega mari a, e po noakisai Faraoh asa. 26Kau larua wia eu pei natau larua; go m̃okai larua wia eu pei natau larua: nap̃erea e pei tea sikai maau. 27Go kau larua waina eu m̃agura po pei tea leosakiana waina eu sake umai edakugoro ra eu pei natau larua, go m̃okai larua ma waina eu p̃alo po pei tea lagaiana ki nalagi ruatu; nara euga wo pei natau larua ni navitoloana. 28Tea wanogoe e pei tea waina a noa ki sai Faraoh asa: tea waina Sup̃e e naga ega mari a, e po pisei ki Faraoh asa. 29P̃a leo, natau larua ni navukaana warua euga wo umai usuraki navanua mamau ni Ityipt: 30Go natau larua ni navitoloana euga wo pakilina edakugoro ra; go navukaana mamau ega wo pei tea maliokiana navanua ni Ityipt; go navitoloana ega wo mari sa ki navanua; 31Go navukaana ega wo da pei tea ataeana navanua mau nalakena navitoloana wanogoe waina ega wo dausi a; nalakena nae ega wo p̃arua sa. 32Go Faraoh e paka rua punusi nap̃erea wanogoe, nalakena naleo wanogoe e pei tea lawosokiana ki Sup̃e, go Sup̃e ega wo mari a ega vakilina m̃araverave. 33Go tea wanogoe Faraoh ega laaga naatam̃oli sikai waina e midodoa go waina e manumatua, go ega lawo ki nia ega tap̃au navanua ni Ityipt. 34Faraoh ega mari tea wanogoe, go ega tawona ki tea leo parati ki maga dap̃au navanua, go ega tape namagovai kelima ni navanua ni Ityipt natau larua ni navukaana. 35Go euga vila daua ki navinaga mamau puti ni natau wia maga wanogoe waina euga wo umai, po daua ki korn etano ni nam̃elearu ni Faraoh ega vei navinaga natokoana maga, go euga veani a ega tu. 36Go navinaga wanogoe ega magi navanua pei tea toropusiana doko raki natau larua ni navitoloana, waina euga wo pakilina navanua ni Ityipt; naga navanua ega ta pei tea taeluaana ki navitoloana mau. 37Go tea wanogoe e p̃ia namata ni Faraoh, go namata ni tea suasua aneana mamau puti. 38Go Faraoh e noa ki tea suasua aneana maga, e naga, Tuga wo pap̃ai naata waina e dakiusi tea waia kite? Naatam̃oli waina Naata ni Sup̃e e doko asa. 39Go Faraoh e noa ki Yosef, e naga, Edaku ki Sup̃e e po pisei ki‐go tea mamau puti wanogoe, te naata p̃ota sikai e da doko mau waina e midodoa go waina e manumatua dakiusi ko: 40Nigo p̃a wo dap̃au nasum̃a aginau, go narei aginau mamau puti euga mari ega tapala waina p̃a wo noa e: aga wo p̃arua liu ko malo tasake sikai mau. 41Go Faraoh e noa ki Yosef, e naga, P̃a leo, a po lawo ki‐go ku dap̃au navanua mamau ni Ityipt. 42Go Faraoh e sawolua rig vulusoki aneana m̃elu dua ki nakinina, po sara ki nia nakini ni Yosef, po sugoro e ki sugoro maga ni linen wia, po sara ki namori sikai ni kold nanoana; 43Go e mari a e dasake kariot kerua waina e peani a; go eu pioso pea ki nia, eu naga, Kuga titip̃atua: go e lawo ki nia e dap̃au navanua mamau ni Ityipt. 44Go Faraoh e noa ki Yosef, e naga, Kinau a pei Faraoh, go masale ki‐go te naata sikai ega ta sike nam̃elearuna kite natuana navanua mamau ni Ityipt mau. 45Go Faraoh e soso nagisa ni Yosef ki Safenath‐paneah; go e dua e Asenath natu ni Poti‐fera tea viri ni On ega vei anagoroi. Go Yosef e dave pano pa usuraki navanua ni Ityipt. 46Go Yosef e pei tea ni natau rualima dolu ragi waina e lawodu narae ni Faraoh nawota ni Ityipt. Go Yosef e dave m̃elu dua ki narae ni Faraoh, po surata papule navanua mamau ni Ityipt. 47Go natau larua ni navukaana, natano e dau ki nam̃elearuda pura maga. 48Go e pila daua ki navinaga mamau puti ni natau larua waina eu doko navanua ni Ityipt, po doropusi navinaga wanogoe natokoana maga: navinaga ni navanua, waina e doko dalivirigoro sara natokoana, e doropusi a natokoana maga wanogoe. 49Go Yosef e daua ki korn dakiusi naworaone ni natasi, e p̃arua sa, pa pa e makoto ki naveveana; nalakena e pei tea vevesap̃oana. 50Go natuna naanoai dua ero magi Yosef pakilina e pea ki natau ni navitoloana e umai, waina Asenath natu ni Poti‐fera tea viri ni On e maneana dape ra. 51Go Yosef e soso nagisa ni tea takalapa ki Manasseh: Nalakena, e noa, Sup̃e e po mari au a malio ki namawosaana mamau puti aginau, go ki tea mamau puti ni nasum̃a ki mama. 52Go nagisa ni kerua e soso e ki Efraim: Nalakena Sup̃e e po mari au a pavakawora navanua ni narogokitesaana aginau. 53Go natau larua ni navukaana, waina e doko navanua ni Ityipt, eu nopu. 54Go natau larua ni navitoloana eu atulake umai, dakiusi waina Yosef e pea noa sua e: go navitoloana e doko sara navanua; ma navanua mamau ni Ityipt navinaga e doko asa. 55Go ragi waina navanua mamau ni Ityipt eu pitolo, narei eu kuapioso paki Faraoh raki navinaga: go Faraoh e noa ki naka ni Ityipt mamau puti, e naga, Kuga va punusi Yosef; tea waina ega wo noa ki mu asa, kuga mari a. 56Go navitoloana e doko usuraki narae ni maramana mamau: go Yosef e p̃olagati nasum̃a ni natauakiana mamau puti, po sori paki naka ni Ityipt; go navitoloana e p̃arua navanua ni Ityipt. 57Go tea ni navanua mamau puti eu rumai paki Ityipt punusi Yosef naga euga vakotovi korn; nalakena navitoloana e p̃arua maramana mamau.
Currently Selected:
JENESIS 41: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
