JENESIS 40
40
1Go e pakilina edaku ki naleo maga wanogoe, naga tea suasua ki nawota ni Ityipt waina e maneana dape lasa munu, go tea suasua waina e maneana dao, ero mari nawota adeada nawota ni Ityipt e maeto ki da. 2Go Faraoh e maeto p̃arua ki tasiga dua aneana, nap̃au ni tea maga waina eu maneana dape lasa munu, go nap̃au ni tea maga waina eu maneana dao. 3Go e pitua ki da paki navavaigoroana nasum̃a ki nap̃au ni tea viviatu maga, paki nasum̃a ni p̃aaka, tokora waina Yosef e pei tea soliana asa. 4Go nap̃au ni tea viviatu maga e pasa parati ki Yosef ara, go e madeada suasua: go ero doko navavaigoroana naaleatia seara. 5Go ero p̃erea ki nap̃erea sikai ero dua, sikai e p̃erea ki nap̃erea aneana go kerua e p̃erea ki nap̃erea aneana, nap̃ogiana sikai maau, ero dua p̃erea pataka ni nanoap̃otaeana ni nap̃erea adeada, nap̃au ni tea tape lasa munu maga, go nap̃au ni tea tao maga ki nawota ni Ityipt, waina ero pei tea soliana nasum̃a ni p̃aaka. 6Go Yosef e sili umai punusi ra malip̃ogi, po leo punusi ra, go p̃a leo, ero susue. 7Go e pusuusu paki tasiga dua ki Faraoh waina ero sikoti a doko navavaigoroana nasum̃a ki nawota aneana, e noa, Ekasana naraemu ero sa masoso? 8Go ero noa ki nia, ero naga, Aro po p̃erea ki nap̃erea sikai, go tea noa p̃otae atae a e dika. Go Yosef e noa ki da, e naga, Nanoap̃otaeana maga e da pei tea ki Sup̃e kite? Koroga rogorogo ki nia paki nau, a pavara ni mu asa. 9Go nap̃au ni tea tape lasa munu maga e dogorogo ki nap̃erea aneana paki Yosef, po noa ki nia, e naga, Nap̃erea aginau, p̃a leo, vaine sikai e doko naraegu asa; 10Go vaine wanogoe arana dolu eu doko asa: go e dapala e siria, po pum̃a; go m̃okai maga kakana eu dau ki nawana mami maga: 11Go lasa munu ki Faraoh e doko nam̃elearugu; go a dape nawana maga, po m̃oli a paki lasa munu ki Faraoh, go a pitua ki lasa munu paki nam̃elearu ni Faraoh. 12Go Yosef e noa ki nia, e naga, Tea waia e pei nanoap̃otaeana kakana: arana dolu eu pei naaleatia dolu; 13M̃ogi dolu Faraoh ega wo sike nap̃aum̃a, po piragi ko liliu paki naliam̃a: go p̃a wo pitua ki lasa munu ki Faraoh paki nam̃elearuna, dapala waina ku mari a sala vea waina ku pei tea maneana dape lasa munu asa. 14Ma p̃a midoa ki nau ragi waina p̃a wo doko p̃ia, go p̃a mari nadodomiana paki nau, a pavara ni ko asa, po dogorogo ki nau paki Faraoh, po piragi lua au m̃elu dua ki nasum̃a waia: 15Nalakena a pei tea vanakoana lomau m̃elu dua ki navanua ki naworawora ni Heberu: go tokora waia a da mari te navatuna mau waina e pei nalakena eu doropusi au a doko m̃oru. 16Ragi waina nap̃au ni tea tao maga e punusi naga nanoap̃otaeana e p̃ia, e noa ki Yosef, e naga, Kinau ma a p̃erea, go p̃a leo, nala dolu ni nakoau tare e doko nap̃augu: 17Go nala ni elagi mau sara navinaga taoniana agi Faraoh eu doko asa; go manu eu gani a m̃elu dua ki nala waina e doko nap̃augu. 18Go Yosef e pasadara, po naga, Tea waia e pei nanoap̃otaeana kakana: nala dolu eu pei naaleatia dolu; 19M̃ogi dolu Faraoh ega wo sike nap̃aum̃a m̃elu dua ki‐go pano, po sara ki‐go nakau; go manu euga wo gani nap̃okasim̃a m̃elu dua ki‐go pano. 20Go e pakilina m̃ogi dolu ki nia, waina e pei naaleatia ni navakilinaana ki Faraoh, naga e magi tea suasua aneana mamau puti mari nakaniana sikai: go e sike nap̃au ni nap̃au ni tea maneana dape lasa munu maga, go nap̃au ni nap̃au ni tea maneana dao maga, m̃aleoputo ni tea suasua aneana maga. 21Go e piragi nap̃au ni tea maneana dape lasa munu maga liliu paki nawosiana aneana; go e pitua ki lasa munu paki nam̃elearu ni Faraoh; 22Ma e sara ki nap̃au ni tea maneana dao maga: dakiusi waina Yosef e madeada noa p̃otae. 23Ma nap̃au ni tea tape lasa munu maga e da midoa ki Yosef mau, ma e malio ki nia.
Currently Selected:
JENESIS 40: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
