JENESIS 42
42
1Go Yakob e punusi naga korn e doko Ityipt doko, go Yakob e noa ki natuna naanoai maga, e naga, Ekasana ku dum̃amu leo punusi mu? 2Go e naga, P̃a leo, a po dogo naga korn e doko Ityipt doko: kuga siwo paki asa pano, po manigida pakotovi seara pae tokora wanogoe; naga tuga mauri, po da mate mau. 3Go Yosef taina rualima sikai eu siwo pano naga euga vakotovi korn pae Ityipt. 4Ma Benyamin, Yosef taina, Yakob e da dip̃aki lua e sikoti taina maga mau; nalakena e noa, Namarisakiana e pe vakilina ki nia. 5Go Israel natuna maga eu rumai naga euga vakokoto m̃aleoputo ni tea maga waina eu rumai: nalakena navitoloana e doko navanua ni Kanaan. 6Go Yosef e pei tea maramara dap̃au navanua; nae e pei tea waina e sori paki narei mamau puti ni navanua: go Yosef taina maga eu rumai, po kolo suai natano paki nia. 7Go Yosef e punusi taina maga, go e leo atae ra, ma e dum̃ana mari a e pei tea p̃ota paki da, go e pasa ki da tea kasua maga; go e noa ki da, e naga, Ku pae esava umai? Go eu noa, Au pae navanua ni Kanaan umai naga auga vakotovi navinaga. 8Go Yosef e leo atae taina maga, ma nara eu da leo atae a mau. 9Go Yosef e midoa ki nap̃erea maga waina e p̃erea ki da ara, go e noa ki da, e naga, Nimu ku pei tea leo pavaraka maga; ku po umai naga kuga vunusi nam̃alam̃alaana ni navanua. 10Go eu noa ki nia, eu naga, Ee, nawota aginau, ma tea suasua anigo maga eu po umai naga euga vakotovi navinaga. 11Au mamau puti pei naatam̃oli sikai maau natuna maga; au pei tea lomau maga, tea suasua anigo maga eu da pei tea leo pavaraka maga mau. 12Go e noa ki da, e naga, Ee, ma ku po umai naga kuga vunusi nam̃alam̃alaana ni navanua. 13Go eu noa, Kinami tea suasua anigo maga au pei tamataida rualima sikai tamate dua, naatam̃oli sikai maau natuna maga ni navanua ni Kanaan; go p̃a leo, tea takariki e sikoti tamagami doko masoso, go sikai e puoli. 14Go Yosef e noa ki da, e naga, Tea wanogoe e pei tea waina a noa ki sua mu asa, a naga, Ku pei tea leo pavaraka maga: 15Kuga wo pei tea maridogoana tea waia: namauriana ki Faraoh taimu takariki e pe ta umai mau, ku pe wo da dave m̃elu dua ki tokora waia mau. 16Kuga tip̃aki lua sikai kakamu, go ega viragi taimu umai, go nimu kuga wo pei tea soliana, naga navasaana animu maga ega vei tea maridogoana, nalomauana e doko mu kite? Go e pe tika, namauriana ki Faraoh ku pe vei tea leo pavaraka. 17Go e saisai ki da paki navavaigoroana naaleatia dolu. 18Go Yosef e noa ki da naaleatia ketolu, e naga, Kuga mari tea waia, po mauri; kinau a matau ki Sup̃e: 19Ku pe vei tea lomau maga, taimu maga sikai kakada ega vei tea soliana nasum̃a ni navavaigoroana animu; go nimu kuga vano, kuga tape korn agi navitoloana ni nasum̃a animu maga pano: 20Go kuga viragi taimu takariki umai punusi au; go navasaana animu ega wo pei lomau, go kuga wo da mate mau. Go eu mari dapala nogoe. 21Go eu dum̃ada noa ki da, eu naga, Nigida tu pei tea mari naleo sa lomau nalo ni taigida, tu punusi nariesokiana ni naatana, ragi waina e pavara ni gida, go tu da dogo parati ki nia mau; nalakena tea wanogoe nariesokiana waia e po pakilina ki gida. 22Go Reuben e pasadara ra, po naga, A da noa ki mu naga, Kuga ta mari naleo sa paki piakiki kite? Go ku da dogo parati ki nau mau; go ragi waia kuga leo, nadana e pei tea tatagoana. 23Go eu da atae mau naga Yosef e dogo atae ra; nalakena tea vasa doa sikai e doko namawota kakada. 24Go e dum̃ana doa e m̃elu dua ki da pano, po dagi; go e moro liliu umai punusi ra, po pasa ki da, po pualua Simeon m̃elu dua ki da pano, po soli a narae ni namatada. 25Go Yosef e pitip̃aki naga euga vakavuro lasa adeada maga ni korn, go naga euga vitua ki liliua ki m̃ane ki sara naatam̃oli ega vaki sak adeada sarasara ra, go naga euga tua ra navinaga ni napua; go e pei tea mariana dapala nogoe paki da. 26Go eu doropusi korn adeada nam̃adu ni ass adeada maga, po m̃elu dua ki tokora wanogoe pano. 27Go sikai kakada e peresi sak aneana naga ega tua ass aneana nakaniana tokora ni nam̃enakiana, go e punusi m̃ane aneana; go p̃a leo, e doko nawoka ni sak aneana. 28Go e noa ki taina maga, e naga, M̃ane aginau e pei tea vituakiana liliu; go kuga leo, e doko sak aginau: go nap̃op̃oda e pano, go eu m̃anaunau dum̃ada doa ra dum̃ada punusi ra, po noa, Tea waia e pei nasava waina Sup̃e e po mari a paki gida? 29Go eu rumai paki navanua ni Kanaan punusi tamada Yakob, po noakisai a tea mamau puti waina eu pakilina ki da; 30po naga, Naatam̃oli waina, nawota ni navanua, e pasa tea kasua maga paki gami, po mari gami au pei tea leo pavaraka navanua. 31Go au noa ki nia, au naga, Kinami au pei tea lomau maga; au da pei tea leo pavaraka maga mau: 32Kinami au pei tamataida rualima sikai tamate dua, tamagami natuna maga; sikai e puoli, go tea takariki e sikoti tamagami doko masoso navanua ni Kanaan. 33Go naatam̃oli waina, nawota ni navanua, e noa ki gami, e naga, Tea waia aga wo atae asa naga ku pei tea lomau maga; kuga toropusi sikai ni taimu maga ega toko nea sikoti au doko, go kuga tape korn agi navitoloana ni nasum̃a animu maga, go kuga vano: 34Go kuga viragi taimu takariki umai punusi au: go aga wo atae naga ku da pei tea leo pavaraka maga mau, ma naga ku pei tea lomau maga: go aga wo pitua ki taimu paki mu, go kuga wo pakokoto navanua. 35Go ragi waina eu daki sak adeada maga, p̃a leo, tum̃ana ni m̃ane ki sara naatam̃oli e doko sak adeada sarasara ra: go ragi waina nara ma tamada eu punusi tum̃ana maga ni m̃ane, eu mataku. 36Go tamada Yakob e noa ki da, e naga, Ku po mari natugu maga eu puoli ki nau ki namateana: Yosef e puoli, go Simeon e puoli, go kuga wo dape lua Benyamin: tea mamau puti wanogoe eu doko au. 37Go Reuben e noa ki tamana, e naga, A pe ta piragi a umai punusi ko mau, p̃a mari punue natugu naanoai dua: p̃a vitua ki nia paki nam̃elearugu, go aga wo piragi a liliu umai punusi ko. 38Go e noa, Natugu ega wo da siwo sikoti mu pano mau; nalakena taina e mate, go nae e sikina doko: go namarisakiana e pe vakilina ki nia napua waina ku pe vae asa pano, ku pe viragi nalolugu tare e pe siwo ki nasusueana paki Sheol pano.
Currently Selected:
JENESIS 42: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
