JENESIS 39
39
1Go Yosef e pei tea viragiana siwo paki Ityipt pano; go Potifar, tasiga sikai ki Faraoh, nap̃au ni tea viviatu maga, naatam̃oli ni Ityipt sikai, e pakotovi a paki nam̃elearu ni naworawora ni Ishmael, waina eu piragi a siwo paki tokora wanogoe pano. 2Go Yehovah e sikoti Yosef doko, go e pei naatam̃oli waina e disu p̃ia; go e doko nasum̃a ki nawota aneana, naatam̃oli ni Ityipt wanogoe. 3Go nawota aneana e punusi naga Yehovah e sikoti a doko, go naga Yehovah e mari sara naleo waina e mari a e disu p̃ia. 4Go Yosef e pap̃ai nasaup̃iaana namatana, go e maneana suasua: go e mari a e pei tea leo parati ki dap̃au nasum̃a aneana, go sara naleo waina e peani ra e pitua ki da paki nam̃elearuna. 5Go e pakilina naga Yehovah e pasa m̃ata ki nasum̃a ki naatam̃oli ni Ityipt wanogoe nalakena Yosef, e pae ragi waina e mari a e pei tea leo parati ki ekopu ni nasum̃a aneana, go dap̃au tea mamau puti waina e peani ra; go navasam̃atakiana ki Yehovah e doko tea mamau puti waina e peani ra, nasum̃a go vanua. 6Go e doropusi tea mamau puti waina e peani ra eu doko nam̃elearu ni Yosef; go e da atae te navatuna waina e sikoti a doko mau, e atae navinaga waina e gani a sikai mau. Go Yosef e pei tea lom̃atakiana nap̃atokona go naraena. 7Go e pakilina edaku ki naleo maga wanogoe, naga nawota aneana anagoroi e leo punusi Yosef; go e noa, P̃a one sikoti au. 8Ma e karai, po noa ki nawota aneana anagoroi, e naga, P̃a leo, nawota aginau e da atae sikoti au tea waina e doko ekopu ni nasum̃a mau, go tea mamau puti waina e peani ra e po pitua ki da paki nam̃elearugu; 9Te naata e da dap̃au au nasum̃a waia mau; go e da mauti au te navatuna mau, ma e mauti au ako sikai mau, nalakena ku pei anagoroi: go aga mari nasigisigileoana warua wanogoe, po mari naleo sa paki Sup̃e dapale sava? 10Go e pakilina, ragi waina e do pasa ki Yosef sara naaleatia, naga e da dogo parati ki nia, naga ega one pisari a, kite naga ega toko sikoti a mau. 11Go e pakilina naaleatia sikai ni ragi wanogoe, naga e paki ekopu ni nasum̃a naga ega mari nawosiana aneana; go naatam̃oli maga ni nasum̃a sikai kakada e da doko ekopu mau. 12Go e puati a ki sugoro aneana, po noa, P̃a one sikoti au: go e doropusi sugoro aneana e doko nam̃elearuna, po sava pano, po paki katama. 13Go e pakilina, ragi waina e punusi naga e po doropusi sugoro aneana e doko nam̃elearuna, po sava paki katama pano, 14Naga e kuapioso paki naatam̃oli maga ni nasum̃a aneana, po pasa ki da, po naga, Kuga vunusi, e po piragi naatam̃oli sikai nawora ni Heberu umai paki ekopu punusi gida naga ega mari saudoa ki gida; e umai paki ekopu punusi au naga ega one sikoti au, go a kuapioso ki nadaleogu warua: 15Go e pakilina, ragi waina e dogo naga a sike nadaleogu po kuapioso, naga e doropusi sugoro aneana e doko pisari au, po sava pano, po paki katama. 16Go e doropusi sugoro aneana e doko pisari au, pa pa nawota aneana e umai paki nasum̃a aneana. 17Go e pasa ki nia dapala navasaana maga waia, e naga, Tea suasua nawora ni Heberu, waina ku piragi a umai punusi gami, e umai paki ekopu punusi au naga ega mari saudoa ki nau: 18Go e pakilina, ragi waina a sike nadaleogu po kuapioso, naga e doropusi sugoro aneana e doko pisari au, po sava paki katama pano. 19Go e pakilina, ragi waina nawota aneana e dogo navasaana maga ki anagoroi, waina e noa ki nia asa, po naga, Tea suasua anigo e mari dapala nogoe paki nau; naga namaetoana aneana e pavaga. 20Go nawota ki Yosef e puati a, po pitua ki nia paki nasum̃a ni nasolisoliana, tokora waina tea soliana maga ki nawota eu pei tea soliana asa: go e doko tokora wanogoe nasum̃a ni nasolisoliana. 21Ma Yehovah e sikoti Yosef doko, po sai ki nadodomiana paki nia, po dua e nasaup̃iaana namata ni nawota ni nasum̃a ni nasolisoliana. 22Go nawota ni nasum̃a ni nasolisoliana e pitua ki tea soliana mamau puti waina eu doko nasum̃a ni nasolisoliana paki nam̃elearu ni Yosef; go sara naleo waina eu mari a tokora wanogoe, nae e pei tea waina e mari a. 23Nawota ni nasum̃a ni nasolisoliana e da leo punusi te navatuna waina e doko nam̃elearuna mau, nalakena waia Yehovah e sikoti a doko; go tea waina nae e mari a, Yehovah e mari a e disu p̃ia.
Currently Selected:
JENESIS 39: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
