JENESIS 38
38
1Go e pakilina ragi wanogoe, naga Yudah e siwo pano m̃elu dua ki taina maga, po dawasi punusi naatam̃oli sikai ni Adullam, nagisana Hirah. 2Go tokora wanogoe Yudah e punusi nagoroi sikai natu ni naatam̃oli sikai ni naworawora ni Kanaan waina nagisana e pei Shua; go e piragi a, po pa punusi a. 3Go e diena, po dape piakiki naanoai sikai; go tamana e soso nagisana ki Er. 4Go e moro diena, po dape piakiki naanoai sikai; go p̃ilana e soso nagisana ki Onan. 5Go e moro sokari a po dape piakiki naanoai sikai, po soso nagisana ki Shelah: go tamana e doko Kesib ragi waina p̃ilana e dape a. 6Go Yudah e magi natuna takalapa Er piragi nagoroi sikai, go nagisana e pei Tamar. 7Go Er, Yudah natuna takalapa, e sigisigileo namata ni Yehovah; go Yehovah e mari punue a. 8Go Yudah e noa ki Onan, e naga, P̃a va punusi taim̃a anagoroi, po maneana mari tea waina e one naanoai aneana taina one naga ega mari a, po magi taim̃a mari natuna ega vakilina. 9Go Onan e atae naga natuna wanogoe ega ta pei tea aneana mau; go ragi waina e pa punusi taina anagoroi, e daki nia paki natano, naga ega ta dua taina natuna mau. 10Go tea waina e mari a e sa namata ni Yehovah: go e moro mari punue a. 11Go Yudah e noa ki sulina Tamar, e naga, P̃a ko pei malepu doko po doko nasum̃a ki tamam̃a doko, pa pa natugu Shelah ega wo p̃arua; nalakena e noa, Nae e pe moro mate, dakiusi taina maga. Go Tamar e pano po doko nasum̃a ki tamana doko. 12Go te ragi Shua natuna nagoroi, Yudah anagoroi, e mate; go Yudah e pei tea vasakorokoroana sua, po sake pano punusi tea maga waina eu maneana alati shiip aneana maga Timnah, nara ma tana ri Hirah ni Adullam ero dua. 13Go eu noa ki Tamar, eu naga, P̃a leo, atiam̃a e sake paki Timnah pano naga ega alati shiip aneana maga. 14Go e sawolua sugoro ni navei‐malepu‐ana maga kiana, po dum̃ana kulugoro e ki nakulukulu taugororae aneana, po dum̃ana kulugoro e, po do natano namata‐pua ni Enaim, waina e doko pisari napua waina e paki Timnah; nalakena e punusi naga Shelah e po p̃arua, go e da pei tea vituakiana paki nia naga ega vei anagoroi mau. 15Go Yudah e punusi a, go e midoa ki nia naga e pei nagoroi masausara sikai; nalakena e kulugoro naraena. 16Go e dawasi punusi a e doko pisari napua, po noa, Ita, aga valoti punusi ko, a pavara ni ko asa: nalakena e da atae naga e pei sulina mau. Go e noa, P̃a wo dua au nasava naga p̃a umai punusi au? 17Go e noa, Aga wo manigo dip̃aki lua naninani natuna sikai ni navata ni naninani paloti. Go e noa, P̃a wo dua au nanadisokiana sikai pa pa p̃a wo dip̃aki lua e umai kite? 18Go e noa, Aga tua ko nasava ega vei nanadisokiana? Go e noa, Tea vulusoki anigo go natali anigo, go tiko anigo waina e doko nam̃elearum̃a. Go e dua e ara, po pa punusi a, go e diena pae asa. 19Go e duleana, po pano, po sawolua nakulukulu taugororae kiana, po suni sugoro maga ni navei‐malepu‐ana aneana. 20Go Yudah e dip̃aki lua naninani natuna sikai ni naninani maga pano pae nam̃elearu ni tana ri ni Adullam, naga ega tape nanadisokiana aneana ki nam̃elearu ni nagoroi wanogoe: ma e da pap̃ai a mau. 21Go e pusuusu paki naatam̃oli maga ni tokora aneana, e naga, Nagoroi masausara wai waina e doko Enaim doko pisari napua? Go eu noa, Te nagoroi masausara e da doko nea mau. 22Go e liliu umai punusi Yudah, po noa, A da pap̃ai a mau; go naatam̃oli maga ni tokora waina eu noa, Te nagoroi masausara e da doko nea mau. 23Go Yudah e noa, Ega mauti a, naga tuga ta pei tea dododaoana mau: p̃a leo, a dip̃aki lua naninani natuna waia pano, go ku da pap̃ai a mau. 24Go e pakilina ragi waina atelagi dolu e nopu, naga e pei tea noasaiana paki Yudah, eu naga, Sulim̃a Tamar e po maripele; go p̃a leo, e diena pae namaripeleana. Go Yudah e noa, Kuga viragi a dave, go ega vei tea tap̃arakiana. 25Ragi waina e pei tea viragiana dave, e dip̃aki lua pa punusi atiana, po noa, Kinau a magi naata waina e peani tea maga waia diena: go e noa, P̃a leo atae tea maga waia, a pavara ni ko asa, tea vulusoki, go natali maga, go tiko, eu pei tea ki sei? 26Go Yudah e leo atae ra, po noakisai ra, e naga, E leana liu au; nalakena waia a da pitua ki nia paki natugu Shelah mau. Go e da moro atae a mau te naaleatia. 27Go e pakilina ragi ni navisolaana aneana, naga p̃a leo, nedue ero doko nap̃elena. 28Go e pakilina, ragi waina e pisola, naga sikai e sai ki nam̃elearuna: go nagoroi waina e maneana pisola, e dape nalolu miala sikai po likoti a nam̃elearuna, po noa, Tea waia e pea pakilina. 29Go e pakilina, ragi waina e dosalua nam̃elearuna, naga p̃a leo, taina e pakilina: go e noa, Ekasana ku po dum̃am̃a manigo mari sai? Nalakena tea wanogoe nagisana e pei tea sosoana ki Peres. 30Go taina e edaku pakilina, waina nalolu miala e doko nam̃elearuna: go nagisana e pei tea sosoana ki Serah.
Currently Selected:
JENESIS 38: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
