ESEKIEL 44
44
1Go e piragi au liliu pae napuani namatapua ni etaku ni tokora tapu, waina e leo paki taleva ni elo sake; go e kokoro doko. 2Go e noa ki nau, e naga, Namatapua waia ega wo kokoro doko, ega wo da pei tea wolagatiana mau, go te naatam̃oli sikai ega wo da sili pae asa mau, nalakena Yehovah Supe ki Israel, nae e sili pae asa; nalakena tea wanogoe ega wo kokoro doko. 3Tea maraki e sikina nae e mariatae do natano tokora wanogoe naga ega kanikani narae ni Yehovah; ega wo sili umai pae napua ni natarataup̃a ni namatapua, po moro dave pano pae napua sikai maau wanogoe. 4Go e piragi au pae napua ni namatapua ni north umai paki kivea ni nasum̃a tapu; go a leo, go p̃a leo, nasamasamaana ni Yehovah e pakavuro nasufrra tapu ki Yehovah: go a dowo dapolosiwo. 5Go Yehovah e noa ki nau, e naga, Naatam̃oli natuna, p̃a lawo ki nap̃op̃om̃a asa, go namatam̃a maga eroga leo punusi a, go nadaligama maga eroga tap̃olaga paki tea mamau puti waina aga wo noa kigo asa nalo ni natawonakiana maga mamau puti ni nasum̃a tapu ki Yehovah, go nalo ni nawotaeana kakana maga mamau puti; go pa leosokisoki mata ki tea maga waina eu patakana naga euga vaki ekopuni nasum̃a tapu, go ki tea maga mamau puti waina euga wo pei tea tip̃agoroana naga euga ta paki ekopuni tokora tapu mau. 6Go p̃a noa ki tea mari p̃auluulu maga, nasum̃a ni Israel nogo, p̃a naga, Yehovah Sup̃e e noa dapala nea, e naga, Nimu nasum̃a ni Israel O, tea mamaragokiana visarasara animu maga euga vei te lapa: 7Nalakena ku piragi umai tea ni nalauna p̃ota maga waina eu da pei tea tovadaviviana nap̃op̃oda mau, go waina eu da pei tea tovadaviviana nap̃okasida mau, naga euga toko ekopu ni tokora tapu aginau, po mari moli ki nia, nasum̃a tapu aginau nogo, ragi waina nimu ku pitua ki naviriana ni navinaga aginau, napeletia go nada. Ku dapiri navasasokiana aginau ki tea mamaragokiana animu maga mamau puti waina ku mari ra. 8Go ku da pavaigoro naleoparatikianani naleo tapu aginau maga mau: ma ku lawo ki tea ni nalauna pota maga naga nara euga vavaigoro naleoparatikiana kakana, doko tokora tapu aginau. 9Nalakena tea wanogoe Yehovah Sup̃e e noa dapala nea, e naga, tea ni nalauna p̃ota maga waina eu doko m̃aleoputo ni Israel natuna maga, waina eu da pei tea tovadaviviana nap̃op̃oda go nap̃okasida mau, te sikai kakada ega wo da sili paki ekopu ni tokora tapu aginau mau. 10Ma naworawora ni Levi waina eu doropusi au, waina eu sasap̃o m̃elu dua ki nau pano po dausi nasup̃e adeada maga, ragi waina Israel eu sasap̃o pano; nara euga wo dum̃ada dapetape navaratiana ni namarinaleotageleana adeada. 11Ma euga wo pei tea suasua maga doko tokora tapu aginau, euga wo dap̃au naleoparatikiana ni namatapua maga ni nasum̃a tapu, po mari nawosiana ni nasuasuaana doko ekopu ni nasum̃a tapu: nara euga wo mari punue tea ni navituaana tap̃arakiana go naviriana agi narei, go euga wo lawodu naraeda naga euga madeada mari nawosiana ni nasuasuaana. 12Nalakena eu pea madeada suasua doko narae ni nasup̃e adeada maga, po pei tea tapilagonaana sikai ni namarinaleotageleana paki nasum̃a ni Israel; nalakena tea wanogoe kinau a sike namelearugu dip̃a ra, Yehovah Sup̃e e noa e, go euga wo dum̃ada dapetape navaratiana ni namarinaleotageleana adeada. 13Go euga wo da umai paki m̃aladigi kinau naga euga maginau suasua nawosiana ki tea viri mau, kite umai paki m̃aladigi ki naleo tapu aginau maga te sikai kakada mau, doko tokora tapu liu: ma euga wo dum̃ada dapetape namaliereana adeada, go navaratiana ni tea mamaragokiana adeada maga waina eu mari ra. 14Ma kinau aga wo mari ra euga vei tea vavaigoro maga ni naleoparatikiana ni nasum̃a tapu, nalo ni nawosiana ni nasuasuaana mamau puti kakana, go nalo ni tea mamau puti waina ega wo pei tea mariana doko asa. 15Ma tea viri maga naworawora ni Levi, Sadok natuna maga, waina eu pavaigoro naleoparatikiana ni tokora tapu aginau ragi waina Israel natuna maga eu sasap̃o m̃elu dua ki nau pano, nara euga wo umai paki maladigi ki nau naga euga maginau suasua; go nara euga wo lawodu naraegu naga euga mari navituaana ni nap̃eletia go nada paki nau, Yehovah Sup̃e e noa e. 16Nara euga wo sili paki ekopu ni tokora tapu agrnau, go euga wo umai paki maladigi ki wede ni naviriana aginau, naga euga maginau suasua, go nara euga wo pavaigoro naleoparatikiana aginau. 17Go ega wo doko naga ragi waina euga wo sili pae namatapua maga ni roara ni m̃aleoputo, euga wo pei tea sugoroana ki tea suniana maga ni linen; euga wo da suni tea suniana sikai ni nam̃au ni shiip mau, ragi waina euga wo mari nawosiana ni nasuasuaana doko namatapua maga ni roara ni m̃aleoputo, go doko ekopu ni nasum̃a tapu. 18Tap̃au vivisiana maga ni linen euga wo doko nap̃auda, go tea vasiana vuru maga ni linen euga wo doko nawareda maga; euga wo da dum̃ada dasoki ra ki te navatuna sikai waina e mari natorotoroana mau. 19Go ragi waina euga tave pano paki roara ni katama pa punusi narei, euga wo sawo lua sugoro adeada maga waina eu suni ra ragi waina eu mari nawosiana ni nasuasuaana, po doropusi ra doko em̃ago tapu maga, go euga wo,suni sugoro p̃ota maga, naga euga ta paka taputapu ki narei ki sugoro adeada maga mau. 20Go euga wo da masi nalolu nap̃auda mau, kite suasua ki naloluda naga ega varau mau, ma euga wo alati kotovi narepu ni nalolu nap̃auda ega sikina. 21Go tea viri maga euga wo da munu waine mau, ragi waina euga sili paki roara ni m̃aleoputo. 22Go euga wo da dawiri nagoroi malepu sikai mau, kite nagoroi sikai waina anawota e doropusi a: ma euga wo dawiri nagoroi atara maga ni nawora ni nasum̃a ni Israel, kite nagoroi malepu sikai waina e pei namalepu ki tea viri sikai. 23Go euga wo pasa pisei ki narei aginau namarip̃otaeana ni tea waina e dapu go ni tea waina e m̃oli, po mari ra euga atae p̃otae tea waina e dautau go tea waina e da dautau mau. 24Go doko navululuana sikai euga wo lawodu naga euga vasap̃otae; euga wo pasap̃otae a ega vataka ni navasap̃otaeana aginau maga: go euga wo pavaigoro nawotaeana aginau maga go natawonakiana aginau maga nalo ni nasaisaiana tatutakiana aginau maga mamau puti; go euga wo pavaigoro sabbath aginau maga euga tapu. 25Go euga wo da paki maladigi ki te nap̃atoko mate sikai mau naga euga tum̃ada mari ra euga loa asa: ma nalo ni tamada, kite pilada, kite natuda naanoai, kite natuda nagoroi, kite tai da, kite gore da waina e da laki mau, nalo ni tea maga wanogoe eu sikida, eu mariatae dum̃ada mari ra euga loa asa. 26Go tea sikai e pe loa asa, e pe wo dum̃ana peve naaleatia ega larua, go edaku ki tea wanogoe ega wo moro dautau. 27Go doko naaleatia waina ega moro paki ekopu ni tokora tapu, doko roara ni maleoputo, naga ega mari nawosiana ni nasuasuaana ekopu ni tokora tapu, ega wo pitua ki navituaana ni namarinaleosaana aneana, Yehovah Sup̃e e noa e. 28Go euga wo da peani te naveaniana mau; kinau a pei tea veanipiolikiana adeada: go kuga wo da dua ra te matele sikai doko Israel mau; kinau a pei matele adeada. 29Euga wo gani navituaana ni flaur, go navituaana ni namarinaleosaana, go navituaana ni natapiriana; go sara naleo tapugoroana doko Israel euga wo pei tea adeada maga. 30Go tea wia lua ni takavea visarasara maga, go naviriana visarasara animu maga mamau puti euga wo pei agi tea viri maga: go kuga wo dua tea viri takavea ni flaur animu, naga navasamatakiana ega toko nasum̃a animu. 31Tea viri maga euga wo da gani te navatuna waina e dumana mate, kite waina e pei tea katip̃oraeana mau, e pe vei manu kite e pe vei nalo tuavati.
Currently Selected:
ESEKIEL 44: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
