ESEKIEL 43
43
1Go e piragi au paki namatapua waina e leo paki taleva ni elo sake: 2Go p̃a leo, nasamasamaana ni Sup̃e ki Israel e pae taleva ni elo sake umai: go nadaleoana e dakiusi nasaruruana ni noai laapa: go maramana e pei tea maramalagatiana ki nasamasamaana aneana. 3Go navunusiana waina a punusi a, e dakiusi navunusiana waina, a punusi a ragi waina e umai naga ega mari puoli ki natokoana; go e dakiusi navunusiana waina a punusi a nadigi ni noaisara Kebar: go a dowo dap̃olosiwo. 4Go nasamasamaana ni Yehovah e pae napua ni namatapua waina e leo paki taleva ni elo sake umai paki ekopu ni nasum̃a tapu. 5Go naatana e dape au sake, po piragi au paki, ekopu ni roara ni m̃aleoputo; go p̃a leo, nasamasamaana ni Yehovah e pakavuro nasum̃a tapu. 6Go a dogo nadaleo ni tea sikai waina e pasa paki nau m̃elu ekopu ni nasufrta tapu; go naatam̃oli sikai e lawodu nadigigu. 7Go e noa ki nau, e naga, Naatam̃oli natuna, tokora waia e pei tokora waina malo tasake aginau e doko asa, go tokora waia e pei tokora waina nam̃ele natuagu ero lawodu asa, e pei tokora waina aga wo doko asa doko m̃aleoputo ni Israel natuna maga pa pa ega tu mau du: go nasum̃a ni Israel euga wo da moro mari nagisagu tapu ega vei tea m̃oli mau, nara kite nawota adeada maga, ki namaripeleana adeada, go ki napatoko mate maga ni nawota adeada maga, tokora vakilagi adeada maga; 8Eu lawo ki tea tuasila adeada nadigi ni tea tuasila aginau, go ki nakautu adeada nadigi ni nakautu aginau, go te navatuna e dika namawota kakagu go kakada, ma p̃aaka sikai e sikina; go eu mari nagisagu tapu e pei tea m̃oli ki tea mam̃aragokiana adeada maga waina eu mari ra: nalakena tea wanogoe kinau a mari puoli ki da doko namaetoana aginau. 9Sala waia euga toropusi namaripeleana adeada maga, go nap̃atoko mate maga ni nawota adeada maga, euga toko uvea ki nau, go aga wo doko m̃aleoputo kakada doko pa pa ega tu mau du. 10Nigo naatam̃oli natuna, p̃a visei ki tea ni nasum̃a ni Israel nasum̃a tapu waia, naga euga maliere namarinaleotageleana adeada maga: go euga rowogi naleopunusiana kakana. 11Go eu pe maliere tea mamau puti waina eu mari a, p̃a mari naleopunusiana ni nasum̃a tapu ega vei tea ataeana paki da, go naleodawonakiana kakana, go tokora ni natavepanoana kakana maga, go tokora ni nasiliumaiana kakana maga, naleopunusiana kakana mamau; go p̃a mari natawonakiana kakana maga mamau puti, go nawotaeana kakana maga mamau puti euga vei tea ataeana paki da, go p̃a midiri a doko tusi sikai namatada: naga euga vavaigoro po mari pataka ni nawotaeana kakana maga mamau puti, go ni natawonakiana kakana maga mamau puti. 12Tea waia e pei nawotaeana nalo ni nasum̃a tapu: nap̃au ni tava kokoi kakana mamau daliviri ega wo pei tea tapuliu. P̃a leo, tea waia e pei nawotaeana nalo ni nasum̃a tapu. 13Go tea maga waia eu pei narowogiana maga ni wede ni naviriana pae kubit maga: (kubit wanogoe e pei kubit sikai go naweleweleana sikai ni nam̃elearu ni naatamoli) laketano kakana navakilagiana kakana ega wo pei kubit sikai, go naweleweleana kubit sikai, go navivi ni nadigina daliviri nakisitotowoana sikai: tea wanogoe ega wo pei laketano ni wede ni naviriana. 14Go pae laketano kakana waina e doko natano go pakilagi paki malototoropusi vea, ega wo pei kubit ega rua, go naweleweleana kubit ega sikai; go pae malototoropusi vea paki malototoropusi kerua, ega wo pei kubit euga vati, go naweleweleana kubit ega sikai. 15Go elagi ki wede ni naviriana ega wo pei kubit pati; go pae wede ni naviriana pakilagi, napati euga vati. 16Go tokora waina euga mari nakapu asa elagi ki wede ni naviriana, navarauana kakana ega wo pei kubit rualima sikai tamate dua, go naweleweleana kakana kubit rualima sikai tamate dua, ega wo pei p̃alapati. 17Go malototoropusi navarauana kakana ega wo pei kubit rualima sikai tamate pati, go naweleweleana kakana kubit rualima sikai tamate pati, ega wo pei p̃alapati; go nadigina daliviri ega wo pei namagovai ni kubit sikai; go laketano kakana ega wo pei kubit sikai daliviri; go napua vavadu kakana maga euga wo leo paki taleva ni elo sake. 18Go e noa ki nau, e naga, Naatam̃oli natuna, Yehovah Sup̃e e noa dapala nea, e naga, tea maga waia eu pei natawonakiana maga nalo ni wede ni naviriana, ragi waina euga wo mari a naga euga vitua ki navituaana tap̃arakiana maga asa, go naga euga meseura ki nada asa. 19Doko naaleatia wanogoe pa tua tea viri maga naworawora ni Levi, waina eu pei tea ni nawora ni Sadok, go waina eu doko m̃aladigi ki nau naga euga maginau suasua, Yehovah Sup̃e e noa e, p̃a tua ra kau anoai vusavusa sikai ega vei navituaana sikai ni namarinaleosaana. 20Go p̃a tape kovai nada kakana po doropusi a paki napati pati ni wede ni naviriana, go paki naweluki pati ni malo totoropusi, go paki nadigina daliviri: dapala nogoe p̃a wo mari dautau ki nia po maneana mari natapaugoroana. 21Go p̃a tape kau anoai ni navituaana ni namarinaleosaana, go ega wo pei tea tap̃arakiana tokora waina e maneana pei tea tawonakiana asa nasum̃a tapu, etaku ni tokora tapu. 22Go doko naaleatia kerua p̃a vitua ki naninani anoai sikai tea mamaau p̃ia, ega vei navituaana sikaini namarinaleosaana; go euga wo mari dautau ki wede ni naviriana, dapala waina eu mari dautau ki nia ki kau anoai. 23Ragi waina p̃a mari dautau ki sua e, p̃a vitua ki kau anoai vusavusa sikai tea mamaau p̃ia, go shiip anoai sikai tea mamaau p̃ia m̃elu navata. 24Go pa tape ra umai paki m̃aladigi narae ni Yehovah, go tea viri maga euga meseura ki natasimena ara, go euga vitua ki da eroga vei navituaana tap̃arakiana sikai paki Yehovah. 25Naaleatia larua p̃a mari mata ki naninani sikai ega vei navituaana sikai ni namarnaleosaana, sikasikai sara naaleatia: go euga vaka sikai mari mata ki kau anoai vusavusa sikai, go shiip anoai sikai tea mamaau p̃ia m̃elu navata. 26Naaleatia larua euga wo magi wede ni naviriana mari natap̃augoroana, po mari dautau ki nia; dapala nogoe euga wo pakavuro e. 27Go ragi waina euga wo pakavuro naaleatia maga wanogoe, ega wo pakilina doko naaleatia kelatolu go edaku ki nia, naga tea viri maga euga wo manimu pitua ki navituaana tap̃arakiana animu maga, go navituaana ni natam̃ateana animu maga, doko wede ni naviriana; go aga wo saup̃ia ki mu, Yehovah Sup̃e e noa e.
Currently Selected:
ESEKIEL 43: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
