ESEKIEL 45
45
1Go ragi waina kuga wo dap̃otawotae navanua pae namatarau naga kuga veani pioli ki nia, kuga wo mari masale ki matele sikai ni navanua ega vei tea tapu ki Yehovah, navarauana kakana ega vei kubit tivilia dua manu takuna lima, go naweleweleana kakana kubit tivilia dua: tea mamau puti kakana ega wo dapu. 2Matele kakana sikai ega wo pei tea ni tokora tapu, navarauara kakana ega vei kubit p̃onotia lima, go naweleweleana kakana kubit p̃onotia lima, ega vei palapati; go namalopa sikai naweleweleana kakana kubit rualimalima ega wo dalivirigoro e. 3Go kuga rowogi matele sikai m̃elu natano tapu wanogoe, navarauana kakana ega vei kubit tivilia dua manu takuna lima, go naweleweleana kakana kubit tivilia sikai: go tokora tapu, waina ega vei tokora tapuliu, ega wo doko asa doko. 4Ega wo pei matele tapu ni navanua; ega wo pei agi tea viri maga, tea suasua maga ni tokora tapu, waina eu Paki maladigi ki Yehovah naga euga maneana suasua; go ega wo pei tokora sikai waina nasum̃a adeada maga euga toko asa, go malo tapu sikai waina tokora tapu ega wo doko asa. 5Go matele p̃ota sikai navarauana kakana ega vei kubit tivilia dua manu takuna lima, go naweleweleana kakana kubit tivilia sikai, ega vei agi naworawora ni Levi, tea suasua maga ni nasum̃a tapu, ega vei tea veaniana adeada sikai, waina natokoana adeada maga euga wo doko asa. 6Go kuga wo magi natokoana pasa dawona ki matele sikai naweleweleana kakana ega vei kubit manu lima, go navarauana kakana kubit tivilia dua manu takuna lima, doko nadigi ni matele sikai waina e pei tea marimasalekiana e pei natano tapu: ega wo pei, agi nasum̃a mamau ni Israel. 7Go tea waina e pei agi tea maraki ega wo doko taleva sikai go taleva kerua ni matele ni natano tapu waina e pei tea marimasalekiana go ni matele ni natano waina e pei agi natokoana, ega wo doko kivea ni matele ni natano tapu go kivea ni tea veaniana ni natokoana, doko taleva ni elo musu paki taleva ni elo musu, go doko taleva ni elo sake paki taleva ni elo sake: go navarauana kakana ega vitotowo ma matele maga sikai kakada waina e doko namawota ni kokoi ni elo musu go ni kokoi ni elo sake ni navanua. 8Ega wo pei tea veaniana aneana doko Israel; go tea maraki aglnau maga euga wo da moro diesoki narei aginau mau; ma euga wo suasua ki nasuma ni Israel naga euga veanip̃otawotae navanua ega vae naworaworada maga. 9Yehovah Supe e noa dapala nea, e naga, Ega vei tea lapa, tea maraki maga ni Israel O: kuga toropusi natapepavakotoana go navutiluapavakotoana, go kuga mari naleana ana go namarinaleoleanaana; nasautoga kasua waina ku mari a paki narei aginau ega makoto, Yehovah Sup̃e e noa e. 10Kuga wo peani vatu rowogi leana maga, go efah leana sikai, go bath leana sikai. 11Efah go bath eroga wo pei totowo sikai maau; bath ega wo pataka ni namagovai kerualima sikai ni omer sikai, go efah ega wo pataka ni namagovai kerualima sikai ni omer sikai: narowogiana kakana ega wo dapala omer. 12Go shekel ega wo pei cerah rualima dua: shekel rualima dua, shekel rualima dua tamate lima, shekel rualima sikai tamate lima, euga wo pei mina animu. 13Tea waia e pei navituaana ni naviriana waina kuga wo pitua ki nia; efah sikai namagovai kelatesa kakana ni whiit omer sikai, go kuga wo pitua ki efah sikai namagovai kelatesa kakana ni barle omer sikai: 14Go nalo ni natawonakiana ni naroro, kuga wo pitua ki kekerualima ni bath sikai ni naroro. 15Go shiip natuna sikai melu navata sikai ni shiip p̃onotia dua, sikasikai sarasara ra, m̃elu napega m̃anopunopu maga ni Israel; ega vei navituaana sikai ni flaur, go navituaana tap̃arakiana sikai, go navituaana maga ni natam̃ateana, naga ega madeada mari natap̃augoroana, Yehovah Sup̃e e noa e. 16Narei mamau puti ni navanua euga wo pitua ki tea ni naviriana wanogoe ega vei agi tea maraki ni Israel. 17Go ega wo pei agi tea maraki naga ega vitua ki navituaana tap̃arakiana, go maga, navituaana maga ni flaur, go navituaana takiana maga, doko ragi ni nasaisaiana maga, go ragi maga ni atelagi vau, go ni sabbath maga, go ni nasaisaiana tatutakiana maga mamau puti ni nasum̃a ni Israel: nae ega wo mari mata ki navituaana ni namarinaleosaana, go navituaana ni flaur, go navituaana tap̃arakiana, go navituaana maga ni natam̃ateana, naga ega magi nasum̃a ni Israel mari natap̃augoroana. 18Yehovah Supe e noa dapala nea, e naga, Doko atelagi vea, nakup̃a vea ni atelagi, p̃a tape kau anoai vusavusa sikai tea mamaau p̃ia; go pa mari dautau ki tokora tapu. 19Go tea viri ega tape kovai nada ni navituaana ni namarinaleosaana, po doropusi a ega toko nakautu maga ni nasum̃a tapu, go naweluki pati ni malototoropusi ni wede ni naviriana, go doko nakautu maga ni namatapua ni roara ni maleoputo. 20Go p̃a moro mari a nakup̃a kelarua ni atelagi, nalo ni sara naata waina eu mari naleo sa nalakena namarisap̃oana kite nasalup̃eana: dapala nogoe kuga wo magi nasum̃a tapu mari natap̃augoroana. 21Doko ateligi vea, nakup̃a kerualima sikai tamate pati ni atelagi, kuga vavaigoro navakalauana, nasaisaiana sikai ni naaleatia ega larua; bred waina leven e dika asa ega wo pei tea kaniana. 22Go doko naaleatia wanogoe tea maraki ega wo dum̃ana maneana go magi narei mamau puti ni navanua mari m̃ata ki kau anoai sikai, egavei navituaana sikai ni namarinaleosaana. 23Go doko naaleatia larua ni nasaisaiana, ega wo mari m̃ata ki navituaana tap̃arakiana sikai paki Yehovah, kau anoai larua go shiip anoai larua tea mamaau p̃ia, sara naaleatia sikasikai; go naninani anoai sikai, sikasikai sara naaleatia, egavei navituaana sikai ni namarinaleosaana. 24Go ega wo mari mata ki navituaana sikai ni flaur, efah sikai ni kau anoai sikai sikasikai sarasara ra, go efah sikai ni shiip anoai sikai sikasikai sarasara ra, go naroro hin sikai ni efah sikai sikasikai sarasara ra. 25Doko atelagi kelarua, nakup̃a kerualima sikai tamate lima ni atelagi, doko nasaisaiana, ega wo mari ega vataka sikai naaleatia larua sikasikai sarasara ra; ega wo mari dapala nogoe nalo ni navituaana ni namarinaleosaana, go nalo ni navituaana tap̃arakiana, go, nalo ni navitua ana ni flaur, go nalo ni naroro.
Currently Selected:
ESEKIEL 45: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
