EKSODAS 4
4
1Go Moses e pasadara po naga, Ma p̃a leo, euga wo da saralomau navasaana aginau mau, go euga wo da dogo parati ki nadaleogu mau: nalakena euga wo naga, Yehovah e da pakilina ki‐go mau. 2Go Yehovah e noa ki nia, e naga, Nasava wanae doko nam̃elearum̃a? Go e naga, Tiko sikai. 3Go e naga, P̃a nadi ki nia paki natano. Go e nadi ki nia paki natano, go e po pei m̃aata sikai; go Moses e sava dua ki naraena. 4Go Yehovah e noa ki Moses, e naga, P̃a sai ki nam̃elearum̃a, po puati napuena: (go e sai ki nam̃elearuna, po puasoki a, go e po pei tiko sikai e doko nam̃elearuna:) 5Naga euga saralomau naga Yehovah, Sup̃e ki tamada maga, Sup̃e ki Abraham, Sup̃e ki Isaak, go Sup̃e ki Yakob, e po pakilina ki‐go. 6Go Yehovah e moro noa ki nia, e naga, P̃a sai ki nam̃elearum̃a paki narum̃am̃a. Go e sai ki nam̃elearuna paki narum̃ana: go ragi waina e sai lua e, p̃a leo, nam̃elearuna e po pei lepero, dakiusi sno. 7Go e naga, P̃a moro sai ki nam̃elearum̃a paki narum̃am̃a. (Go e moro sai ki nam̃elearuna paki narum̃ana; go ragi waina e sai lua e m̃elu dua ki narum̃ana, p̃a leo, e moro liliu po dakiusi nap̃okasina p̃ota.) 8Go eu pe wo da saralomau navasaana anigo mau, po da dogo parati ki nadaleo ni navaivaiana vea mau, eu pe wo saralomau nadaleo ni navaivaiana edaku. 9Go ega wo pakilina, eu pe wo da saralomau navaivaiana dua wanogoe mau, po da dogo parati ki nadaleom̃a mau, naga p̃a wo dape noai seara ni noai sara, po daki nia natano garagara: go noai waina p̃a wo dape a m̃elu dua ki noai sara, ega wo pei nada doko natano garagara. 10Go Moses e noa ki Yehovah, e naga, A pavara, Nawota O, kinau a da pei naatam̃oli ni navasaana, sala vea mau, go ragi waina ku po pasa ki sua tea suasua anigo mau: nalakena nawokagu e madaga, go namenagu e madaga. 11Go Yehovah e noa ki nia, e naga, Sei e mari nawoka ni naatam̃oli? Kite sei e mari a e pusa, kite e p̃aro, kite e punusi, kite e kesa? E da pei kinau, Yehovah mau, kite? 12Go tea wanogoe p̃a vano, go kinau aga wo sikoti nawokam̃a doko, po pisei ki‐go tea waina p̃a wo noa e. 13Go e naga, A pavara, Nawota O, p̃a tip̃aki lua pae nam̃elearu ni tea waina p̃a wo dip̃aki lua e. 14Go namaetoana ki Yehovah e pavaga dip̃a Moses, go e naga, Taim̃a Aaron nawora ni Levi e da doko mau, kite? A atae naga nae e pasa p̃ia. Go p̃a leo, nae e dave umai naga ega sua ko: go ragi waina ega wo punusi ko, nap̃op̃ona ega wo laelaea. 15Go p̃a wo pasa ki nia, po doropusi navasaana maga nawokana: go kinau aga wo sikoti nawokam̃a go nawokana doko, po pisei ki mu tea waina koroga wo mari a. 16Go nae ega wo manigo pasa paki narei: go nae ega wo manigo pei nawokam̃a, go nigo p̃a wo maneana pei Sup̃e. 17Go p̃a wo puati tiko waia ega toko nam̃elearum̃a, waina p̃a wo mari navaivaiana maga asa.
18Go Moses e pano po liliu pano punusi m̃ona Yethro, po noa ki nia, e naga, P̃a suasua, a pavara ni ko asa, naga aga vano, go naga aga liliu pano punusi taigu maga waina eu doko Ityipt doko, go naga aga vunusi eu ko mauri doko kite; Go Yethro e noa ki Moses, e naga, P̃a vaki natam̃ateana pano. 19Go Yehovah e noa ki Moses Midian, e naga, P̃a vano, p̃a liliu paki Ityipt pano: nalakena naatam̃oli maga waina eu laaga namauriana anigo eu mate puti. 20Go Moses e puati anagoroi go natuna naanoai dua, po mari ra eu doko ass sikai, go e liliu paki navanua ni Ityipt pano: go Moses e puati tiko ki Sup̃e e doko nam̃elearuna. 21Go Yehovah e noa ki Moses, e naga, Ragi waina p̃a wo liliu paki Ityipt pano, p̃a vunusi naga p̃a mari tea ni namagaana mamau puti narae ni Faraoh waina a po doropusi ra eu doko nam̃elearum̃a: ma kinau aga wo mari nap̃op̃ona ega wo kasua, go ega wo da suasua ki narei maga naga euga vano mau. 22Go p̃a wo noa ki Faraoh, p̃a naga, Yehovah e noa dapala waia, e naga, Israel e pei natugu naanoai, natugu takalapa: 23Go a po noa ki‐go, a naga, P̃a suasua ki natugu naanoai naga ega vano, naga ega maginau suasua; go ku karai suasua ki nia naga ega vano: p̃a leo, kinau aga wo mari punue natum̃a naanoai, natum̃a takalapa. 24Go e pakilina ragi waina e doko napua tokora ni nam̃enakiana, naga Yehovah e sua e, po laaga naga ega mari punue a. 25Go Sipporah e dape vatu makali sikai, po dovae lua nawili vea ni natuna, po nadi natuana asa; go e naga, Nalakena nigo ku pei tea vitawiri aginau ni nada. 26Go e doropusi a e doko. Ragi wanogoe e naga, Tea vitawiri ni nada, nalakena natovadaviviana.
27Go Yehovah e noa ki Aaron, e naga, P̃a vaki masop̃alo pano, naga p̃a sua Moses. Go e pano, po sua e tava ki Sup̃e, po dum̃ili a. 28Go Moses e noa ki Aaron navasaana mamau puti ki Yehovah waina e dip̃aki lua e asa, go navaivaiana mamau puti waina e dip̃aki nia asa. 29Go Moses go Aaron ero pano po piragi saisai ki tea matua mamau puti ni Israel natuna maga: 30Go Aaron e noa navasaana mamau puti waina Yehovah e noa ki Moses asa, po mari navaivaiana maga namata ni narei. 31Go narei eu saralomau: go ragi waina eu dogo naga Yehovah e umai punusi Israel natuna maga, go naga e punusi narogokitesaana adeada, eu kolo po lotu.
Currently Selected:
EKSODAS 4: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
