EKSODAS 3
3
1Go Moses e do leo parati ki navata ni shiip go ni naninani ki m̃ona Yethro, tea viri ni Midian: go e piragi navata paki nataku ni masop̃alo, po umai paki tava ki Sup̃e paki Horeb. 2Go agelo ki Yehovah e pakilina ki nia mena ni nakapu pae m̃aleoputo ni nakau makalikali sikai: go e leo punusi, go p̃a leo, nakau makalikali wanogoe e pavaga ki nakapu, go nakau makalikali wanogoe e da pei tea kaniana mau. 3Go Moses e naga, Aga tawasi, po punusi navunusiana warua waia, ekasana nakau makalikali e da aso mau? 4Go Yehovah e punusi naga e dawasi naga ega vunusi, go Sup̃e e pioso paki nia pae m̃aleoputo ni nakau makalikali, po naga, Moses, Moses. 5Go e naga, Kinau nea. Go e naga, P̃a ta umai paki m̃aladigi mau: p̃a sawo lua nam̃elevasiana anigo maga ki nam̃elem̃a maga, nalakena tokora waina ku lawodu asa e pei natano tapu. 6(Go e naga,) Kinau a pei Sup̃e ki tam̃am̃a, Sup̃e ki Abraham, Sup̃e ki Isaak, go Sup̃e ki Yakob. Go Moses e kulugoro naraena, nalakena e mataku leo punusi Sup̃e. 7Go Yehovah e naga, A punusi lomau ki narogokitesaana ki narei aginau waina eu doko Ityipt doko, go a dogo nakuapioso‐ana adeada nalakena tea suatoro ki da maga; nalakena a atae nasusueana adeada maga; 8Go a po siwo umai naga aga vualua ra m̃elu dua ki nam̃elearu ni naka ni Ityipt, go naga aga viragi lua ra m̃elu dua ki navanua wanogoe sake umai paki navanua wia go warua, paki navanua waina e sara ki milk go honi; paki tokora ki naworawora ni Kanaan, go ki naworawora ni Heth, go ki naworawora ni Amor, go ki naworawora ni Peris, go ki naworawora ni Hivah, go ki naworawora ni Yebus. 9Go ragi waia, p̃a leo, nakua‐pioso‐ana ki Israel natuna maga e po umai paki nau: go a punusi nariesokiana waina naka ni Ityipt eu do diesoki ra asa. 10Go ragi waia, p̃a umai go aga wo dip̃aki lua ko pa punusi Faraoh, naga p̃a viragi lua narei aginau Israel natuna maga euga m̃elu dua ki Ityipt umai. 11Go Moses e noa ki Sup̃e e naga, Kinau a pei sei, naga aga va punusi Faraoh, go naga aga viragi lua Israel natuna maga m̃elu dua ki Ityipt umai? 12Go e naga, Nalakena aga wo sikoti ko doko; go tea waia ega wo manigo pei navaivaiana, naga kinau a po dip̃aki lua ko: ragi waina p̃a wo piragi lua sua narei m̃elu dua ki Ityipt umai, kuga wo magi Sup̃e suasua tava waia. 13Go Moses e noa ki Sup̃e, e naga, P̃a leo, ragi waina kinau aga wo umai punusi Israel natuna maga, po noa ki da naga, Sup̃e ki tamamu maga e po dip̃aki lua au umai punusi mu; go euga wo noa ki nau naga, Nagisana sei? Aga wo noa ki da nasava? 14Go Sup̃e e noa ki Moses, e naga, A DOKO WAINA A DOKO: go e naga, P̃a wo noa ki Israel natuna maga ega tapala waia, p̃a naga, A DOKO e po dip̃aki lua au umai punusi mu. 15Go Sup̃e e moro noa ki Moses, e naga, P̃a wo noa ki Israel natuna maga ega tapala waia, p̃a naga, Yehovah, Sup̃e ki tamamu maga, Sup̃e ki Abraham, Sup̃e ki Isaak, go Sup̃e ki Yakob, e po dip̃aki lua au umai punusi mu: tea wanogoe e pei nagisagu pa pa ega tu du po du mau du, go tea wanogoe e pei tea waina aga wo pei tea midoakiana asa pa pa paki sara tagona. 16P̃a vano, po piragi saisai ki tea matua maga ni Israel, po noa ki da naga, Yehovah, Sup̃e ki tamamu maga e po pakilina ki nau, Sup̃e ki Abraham, Sup̃e ki Isaak, go ki Yakob, e naga, A po umai punusi mu lomau, po punusi tea waina e pei tea mariana paki mu Ityipt: 17Go a po naga, Aga wo piragi lua mu m̃elu dua ki narogokitesaana ni Ityipt sake umai paki navanua ki naworawora ni Kanaan, go ki naworawora ni Heth, go ki naworawora ni Amor, go ki naworawora ni Peris, go ki naworawora ni Hivah, go ki naworawora ni Yebus, paki navanua sikai waina e sara ki milk go honi. 18Go euga wo dogo parati ki nadaleom̃a: go p̃a wo umai, nimu ma tea matua maga ni Israel, punusi nawota ni Ityipt, go kuga wo noa ki nia naga, Yehovah, Sup̃e ki naworawora ni Heberu, e po sua gami: go ragi waia p̃a suasua, au pavara ni ko asa, naga auga vano nasurataana ni naaleatia dolu paki masop̃alo, naga auga mari naviriana paki Yehovah Sup̃e aginami. 19Go kinau a atae naga nawota ni Ityipt ega wo da suasua ki mu naga kuga vano mau, go nam̃elearugu e pe kasua asa e pe wo da suasua mau. 20Go aga wo sai ki nam̃elearugu, po atugi Ityipt ki tea ni namagaana mamau puti aginau waina aga wo mari a m̃aleoputo kakana: go edaku ki tea wanogoe ega wo dip̃aki lua mu. 21Go aga wo dua narei waia nasaup̃iaana namata ni naka ni Ityipt: go ega wo pakilina naga, ragi waina kuga wo pano, kuga wo da p̃alo pano mau: 22Ma sara nagoroi euga wo datagovi nagoroi waina eu doko m̃aladigi ki da, go nagoroi waina eu m̃enaki‐atatoko nasum̃a adeada, ki naloriki wia ni silver maga, go ki naloriki wia ni kold maga, go ki tea suniana maga: go kuga wo doropusi ra doko natumu naanoai maga, go natumu nagoroi maga; go kuga wo puti lua ki naka ni Ityipt.
Currently Selected:
EKSODAS 3: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
