EKSODAS 5
5
1Go Moses go Aaron ero edaku umai, po noa ki Faraoh, ero naga, Yehovah, Sup̃e ki Israel, e noa dapala waia, e naga, P̃a suasua ki narei aginau naga euga vano, naga euga maginau mari nasaisaiana sikai masop̃alo. 2Go Faraoh e naga, Yehovah e pei sei, waina aga rogo parati ki nadaleona naga aga suasua ki Israel naga euga vano? A da atae Yehovah mau, go aga wo da suasua ki Israel naga euga vano mau. 3Go ero naga, Sup̃e ki naworawora ni Heberu, e po sua gami: p̃a suasua ki gami, au pavara ni ko asa, naga auga vano nasurataana ni naaleatia dolu paki masop̃alo, po mari naviriana paki Yehovah Sup̃e aginami; naga ega ta mari gami ki nasasanaana, kite ki lova mau. 4Go nawota ni Ityipt e noa ki da, e naga, Ekasana nimu, Moses go Aaron, koro kakaro narei eu m̃elu dua ki nawosiana adeada maga? Kuga vaki natapetapeana animu maga pano. 5Go Faraoh e naga, P̃a leo, narei ni navanua eu po laapa ragi waia, go koro mari ra eu maromaro m̃elu dua ki natapetapeana adeada maga. 6Go naaleatia wanogoe Faraoh e dip̃aki tea suatoro maga m̃aleoputo ni narei, go tea maraki adeada maga, po naga, 7Kuga ta moro dua narei stro waina euga mari brik maga asa, dakiusi sala vea mau: nara euga vano po dum̃ada madeada pila daua ki stro. 8Go totowo ni brik maga waina eu mari a sala vea, kuga tua ra asa; kuga ta doropusi seara kakana mau: nalakena nara eu doko m̃oli; nalakena tea wanogoe nara eu do kua pioso, po naga, Tuga vano po mari naviriana paki Sup̃e anigida. 9Nawosiana ega madaga ega one naatam̃oli maga wanogoe, go euga wosiwosi asa; go euga ta saralomau navasaana maga ni nasorosoroana mau. 10Go tea suatoro maga ki narei, go tea maraki adeada maga, eu dave pano, go eu pasa ki narei, po naga, Faraoh e noa dapala waia, e naga, Aga wo da dua mu stro mau. 11Nimu kuga vano, kuga tum̃amu manimu dape stro tokora waina ku mariatae pap̃ai a: ma te navatuna ni nawosiana animu ega wo da pei tea tape‐lua‐ana kiana mau. 12Go narei eu pei daperavera usuraki navanua ni Ityipt mamau naga euga vila daua ki nalake maga ega vei stro. 13Go tea suatoro maga eu suatoro ki da, po naga, Kuga mari sua nawosiana animu maga, tea ni naaleatia sikai ega nopu naaleatia kakana, ega takiusi ragi waina stro e doko. 14Go tea maraki maga ni Israel natuna maga, waina tea suatoro maga ki Faraoh eu lawo ki da dap̃au ra, eu pei tea wokatiana, eu naga, Ekasana ku da mari sua nawosiana waina e manimu pei tea tawonakiana ni namari‐brikana nanova go masoso mau, dakiusi sala vea? 15Go tea maraki maga ni Israel natuna maga eu rumai po pioso paki Faraoh, po naga, Ekasana ku mari dapala waia paki tea suasua anigo maga? 16Stro seara e da pei tea vituakiana paki tea suasua anigo maga mau, go eu do noa ki gami, eu naga, Kuga mari brik maga: go p̃a leo, tea suasua anigo maga eu pei tea wokatiana; ma narei anigo eu pei nalakena. 17Ma e naga, Nimu ku doko m̃oli, ku doko m̃oli: nalakena tea wanogoe nimu ku do noa naga, Tuga vano po mari naviriana paki Yehovah. 18Go tea wanogoe kuga vano, po p̃osiwosi; go stro seara ega wo da pei tea vituakiana paki mu mau, ma kuga wo pitua ki totowo ni brik maga. 19Go tea maraki maga ni Israel natuna maga eu punusi naga eu doko sa, ragi waina eu noa naga, Kuga ta doropusi seara ni brik animu maga mau, tea ni naaleatia sikai naaleatia kakana. 20Go eu sua Moses go Aaron, waina ero lawodu naga eroga sua ra, ragi waina eu dave m̃elu dua ki Faraoh: 21Go eu noa ki da, eu naga, Yehovah ega leo punusi mu, po pasa p̃otae; nalakena koro po mari nap̃op̃ogami e p̃oa namata ni Faraoh, go namata ni tea suasua aneana maga, naga koroga vitua ki lova sikai paki nam̃elearuda naga euga mari punue gami. 22Go Moses e liliu pano punusi Yehovah, po naga, Nawota, ekasana ku mari sa ki narei waia? Ekasana ku dip̃aki lua au umai? 23Nalakena pae ragi waina a umai punusi Faraoh naga aga vasa pae nagisam̃a, e do mari sa ki narei waia; go ku da pualua narei anigo ku da pualua kiki ki da mau.
Currently Selected:
EKSODAS 5: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
