EKSODAS 30
30
1Go p̃a mari wede sikai ni natap̃arakiana ni tea ni nap̃o wia: p̃a mari a ega vei tea ni nakau akasia. 2Kubit sikai ega vei navarauana kakana, go kubit sikai naweleweleana kakana; ega vei p̃alavati: go kubit dua ega vei navakilagiana kakana: napati kakana maga euga vei tea sikai maau ma nae. 3Go p̃a kalutigoro e ki kold tautau, elagi kakana, go nalakena maga daliviri, go napati kakana maga; go p̃a maneana mari navivina sikai ni kold daliviri. 4Go p̃a maneana mari rig ni kold ega rua etano ni navivina, eroga toko vidina dua, p̃a mari ra eroga toko navidina dua; go eroga wo pei nalia maga ni tea vavau maga waina euga vausi a ara. 5Go p̃a mari tea vavau maga eroga vei tea ni nakau akasia, go p̃a vulutigoro ra ki kold. 6Go p̃a toropusi a ega toko narae ni tea taugorop̃otae waina e dau pisari areka ni nanoasokisokiana, narae ni tea tap̃augoro waina e dap̃augoro nanoasokisokiana, tokora waina toroga wo saisai asa. 7Go Aaron ega tap̃ara ki tea ni nap̃o wia ni nasei lolo maga asa: ega tap̃ara ki nia sara malip̃ogi, ragi waina e mari m̃ata ki nasulu maga. 8Go ragi waina Aaron e sawa ki dokoni nasulu maga ragi melu, ega tap̃ara ki nia, tea ni nap̃o wia sikai ni sara ragi narae ni Yehovah usuraki tagona animu maga. 9Kuga ta pitua ki tea ni nap̃o wia p̃ota seara asa mau, go ki naviriana tap̃arakiana seara asa mau, go ki navituaana ni navinaga seara asa mau; go kuga ta daki navituaana takiana seara asa mau. 10Go Aaron ega mari natap̃augoroana doko napati kakana maga ega vaka sikai natau sikai: ega maneana mari natap̃augoroana ki nada ni naviriana ni namarinaleosaana ni natap̃augoroana maga ega vaka sikai natau sikai usuraki tagona animu maga: nae e pei tea tapu p̃arua liu ki Yehovah.
11Go Yehovah e pasa paki Moses, po naga, 12Ragi waina ku dape naveveana ni Israel natuna maga, pae tea kakada maga waina eu pei tea veveana, ragi wanogoe sara naatam̃oli euga vitua ki naulu sikai ni natap̃augoro‐naatada‐ana paki Yehovah ragi waina ku peve ra; naga te naatugiana sikai ega ta doko m̃aleoputo kakada mau, ragi waina ku peve ra. 13Euga vitua ki tea waia, tea mamau puti waina eu duagoto paki tea veveana maga, namagovai ni shekel sikai ega sikasikai sarasara ra, pae shekel ni tokora tapu: (Cerah rualima dua eu pei shekel sikai:) namagovai ni shekel sikai ega vei navituaana sikai paki Yehovah. 14Tea mamau puti waina eu duagoto paki tea veveana maga, pae tea ni natau rualima dua go pakilagi, euga vitua ki navituaana ki Yehovah. 15Tea vei sogolapa ega ta pitua ki tea warua liu sa mau, go tea tika ega ta pitua ki tea kiki liu namagovai ni shekel mau, ragi waina eu pitua ki navituaana ki Yehovah, naga ega magi naatamu maga mari natap̃augoroana. 16Go p̃a tape silver ni natap̃augoroana maga ki Israel natuna maga, go p̃a vitua ki nia paki nasuasuaana ni tap̃aup̃au ni nasaisaiana; naga ega magi Israel natuna maga pei namidoakilagatiana sikai narae ni Yehovah, naga ega magi naatamu maga mari natap̃augoroana.
17Go Yehovah e pasa paki Moses, po naga, 18P̃a mari tea vavano sikai ni brass, go laketano kakana ni brass, naga euga vavano asa: go p̃a toropusi a namawota ni tap̃aup̃au ni nasaisaiana go ni wede ni naviriana, go p̃a toropusi noai asa. 19Go Aaron go natuna maga euga vavano ki nam̃elearuda go ki natuada asa: 20Ragi waina eu paki ekopu ni tap̃aup̃au ni nasaisaiana euga vavano ki noai, naga euga ta mate mau; kite ragi waina eu rumai paki m̃aladigi ki wede ni naviriana naga euga suasua, naga euga tap̃ara ki naviriana sikai pae nakapu paki Yehovah: 21Go euga vavano ki nam̃elearuda go ki natuada, naga euga ta mate mau: go ega vei natawonakiana sikai paki da pa pa ega tu du po du mau du, paki nia go paki naworaworana usuraki tagona adeada maga.
22Go Yehovah e pasa paki Moses, po naga, 23Go nigo p̃a tape paloti paki‐go nap̃au ni tea ni nap̃o wia maga, ni murra sara shekel p̃onotia lima, go ni sinamon lolo namagovai ni tea wanogoe, p̃onotia dua go rualima lima, go ni kalamo lolo p̃onotia dua go rualima lima, 24Go ni kassia p̃onotia lima, pae shekel ni tokora tapu, go ni naroro oliva hin sikai: 25Go p̃a mari a ega vei naroro ni navuvuraiana tapu sikai, naroro lolo sariana sikai, nawosiana ki tea mari naroro lolo mataisau: ega vei naroro ni navuvuraiana tapu sikai. 26Go p̃a vuvurai ki tap̃aup̃au ni nasaisaiana asa, go areka ni nanoasokisokiana, 27Go wede ni naloriki kakana mamau puti, go nakau ni nasulu go naloriki kakana maga, go wede ni natap̃arakiana ni tea ni nap̃o wia, 28Go wede ni naviriana tap̃arakiana go naloriki kakana mamau puti, go tea vavano go laketano kakana. 29Go p̃a tapugoro ra, naga euga tapu p̃arua liu: sara naleo waina eu kisidogo ra euga tapu. 30Go p̃a vuvurai ki Aaron go natuna maga, po dapugoro ra, naga euga maginau suasua nawosiana ki tea viri. 31Go p̃a vasa paki Israel natuna maga, po naga, Tea wanogoe ega vei naroro ni navuvuraiana tapu aginau sikai usuraki tagona animu maga. 32Ega ta pei tea takiana paki nap̃okasi ni naatam̃oli mau, go kuga ta mari tea takiusi a pae totowo kakana mau: nae e dapu, go ega vei tea tapu aginau. 33Naata waina e sari seara dakiusi a, go naata waina e doropusi seara kakana te naatam̃oli p̃ota sikai, ega vei tea taeluaana m̃elu dua ki narei aneana.
34Go Yehovah e noa ki Moses, e naga, P̃a tape paloti paki‐go nasei lolo maga, nataf, go onuha, go helebenah; nasei lolo maga go libano tautau: totowo sikai ega sarasara ra; 35Go p̃a mari a ega vei tea ni nap̃o wia, naroro lolo sikai nawosiana ki tea mari naroro lolo mataisau, tea sapuriana ki natasimena, tea tautau, tea tapu: 36Go p̃a tuki p̃oroworosi seara kakana ega vei nam̃otam̃ota, go p̃a toropusi seara kakana narae ni nanoasokisokiana ekopu ni tap̃aup̃au ni nasaisaiana, tokora waina toroga wo saisai asa: ega vei tea tapu p̃arua liu animu. 37Go tea ni nap̃o wia wanogoe waina p̃a mari a, kuga ta dum̃amu manimu mari seara pae totowo kakana mau: ega vei tea tapu anigo agi Yehovah. 38Naata waina ega wo mari tea takiusi a, naga ega sidogo e, ega vei tea taeluaana m̃elu dua ki narei aneana.
Currently Selected:
EKSODAS 30: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
