EKSODAS 19
19
1Atelagi ketolu edaku ki Israel natuna maga eu m̃elu dua ki navanua ni Ityipt, naaleatia wanogoe eu rumai paki masop̃alo ni Sinai asa. 2Go eu surata m̃elu dua ki Refidim, po umai paki masop̃alo ni Sinai, po m̃enaki masop̃alo; go tokora wanogoe Israel e m̃enaki asa kivea ki tava. 3Go Moses e sake pano punusi Sup̃e, go Yehovah e pioso pae tava paki nia, po naga, P̃a noa dapala waia paki nasum̃a ni Yakob, po noakisai Israel natuna maga; 4Nimu ku punusi tea waina a mari a paki naka ni Ityipt, go naga a dapetape mu ku doko nalivaru ni ikila maga, po piragi mu umai punusi au. 5Go ragi waia, ku pe wo dogo parati ki lomau ki nadaleogu, po pavaigoro navasasokiana aginau, ku pe wo pei aginau naloriki wia liu nalauna p̃ota maga: nalakena maramana mamau e pei aginau: 6Go nimu ku pe wo pei aginau namarakiana ni tea viri maga, go nalauna tapu. Navasaana maga wanogoe p̃a noa ki Israel natuna maga asa. 7Go Moses e umai po soso tea matua maga ni narei, po doropusi naraeda navasaana mamau puti wanogoe waina Yehovah e dip̃aki nia asa. 8Go narei eu mamau puti pasadara raka sikai, po naga, Tea mamau puti waina Yehovah e po noa e tuga wo mari a. Go Moses e dape navasaana ki narei liliu paki Yehovah. 9Go Yehovah e noa ki Moses, e naga, Kinau aga valoti punusi ko aga toko namaligo ni napopouru sikai, naga narei euga rogo ragi waina aga wo pasa ki‐go, go naga euga saralomau ako pa pa ega tu du po du mau du. Go Moses e noa ki Yehovah navasaana maga ki narei. 10Go Yehovah e noa ki Moses, e naga, P̃a va punusi narei, go p̃a tapugoro ra masoso go matamai, go euga sarue sugoro adeada maga, 11Go euga vei tea marim̃atakiana sua raki naaleatia ketolu: nalakena naaleatia ketolu Yehovah ega wo siwo namata maga ni narei mamau puti paki tava ni Sinai. 12Go p̃a kokoigoro narei daliviri, po naga, Kuga tum̃amu pavaigoro mu naga kuga ta sake paki tava mau, go naga kuga ta kisidogo namatap̃agona kakana mau: te naata e pe kisidogo tava e pe vei tea maripunueana lomau: 13Nam̃elearu ni te naata ega ta kisidogo e mau, ma ega vei tea nadiana ki vatu, kite tea tipeana lomau; e pe vei nalo tuavati kite e pe vei naatam̃oli, e pe wo da mauri mau: ragi waina paiga ega tagi varau, nara euga sake umai paki tava. 14Go Moses e siwo pae tava pakitano punusi narei, po dapugoro narei; go eu sarue sugoro adeada maga. 15Go e noa ki narei, e naga, Kuga vei tea marim̃atakisuaana raki naaleatia ketolu: kuga ta paki m̃aladigi ki nagoroi mau. 16Go naaleatia ketolu, ragi waina e po pei malip̃ogi, tovae maga go navila maga go napopouru madaga sikai eu doko tava, go nadaleo ni paiga sikai e kasua p̃arua; go narei mamau waina eu doko tokora ni nam̃enakiana eu durururu. 17Go Moses e piragi lua narei m̃elu dua ki tokora ni nam̃enakiana naga euga sua Sup̃e; go eu lawodu pisari natua ni tava. 18Go tava ni Sinai e asua puti, nalakena Yehovah e siwo paki asa e doko nakapu: go naasua kakana e sake dakiusi naasua ni upu ni nakapu, go tava mamau e durururu p̃arua. 19Go ragi waina nadaleo ni paiga e po kasua p̃arua sa, Moses e pasa, go Sup̃e e pasadara e ki nadaleona sikai. 20Go Yehovah e siwo umai paki tava ni Sinai, paki nap̃au ni tava; go Yehovah e soso Moses naga ega vaki nap̃au ni tava pano; go Moses e sake pano. 21Go Yehovah e noa ki Moses, e naga, P̃a siwo pano, p̃a vasa parati ki narei, eu pe vap̃ora paki Yehovah naga euga leo punusi, go tea laapa kakada eu pe mate. 22Go tea viri maga waina eu rumai paki m̃aladigi ki Yehovah, nara ma euga tum̃ada pakadarumi ra, Yehovah e pe tave duap̃ora paki da. 23Go Moses e noa ki Yehovah, e naga, Narei eu mari sa sake umai paki tava ni Sinai: nalakena nigo ku pasa parati ki gami, po naga, P̃a kokoigoro tava, po dapugoro e. 24Go Yehovah e noa ki nia, e naga, P̃a vano, p̃a siwo; go p̃a wo sake umai, nimu ma Aaron, koroga rua: ma tea viri maga go narei euga ta pap̃ora naga euga sake umai punusi Yehovah mau, e pe tave duap̃ora paki da. 25Go Moses e siwo pano punusi narei, po noa ki da asa.
Currently Selected:
EKSODAS 19: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
