EKSODAS 18
18
1Go Yethro, tea viri ni Midian, Moses m̃ona, e dogo tea mamau puti waina Sup̃e e magi Moses, go waina e magi Israel narei aneana mari a, naga Yehovah e piragi lua Israel m̃elu dua ki Ityipt umai. 2Go Yethro, Moses m̃ona, e piragi Sipporah umai, Moses anagoroi, edaku ki e dip̃aki lua e, nara ma natuna naanoai dua; 3Waina nagisa ni sikai e pei Cershom; nalakena e naga, A po pei nam̃enaki‐atatoko sikai navanua p̃ota: 4Go nagisa ni kerua e pei Elieser; nalakena e naga, Sup̃e ki mama e silae au, po pualua au pa dua ki lova ki Faraoh: 5Go Yethro, Moses m̃ona, e umai nara ma natuna naanoai dua go anagoroi eu mamau umai punusi Moses masop̃alo tokora waina nae e m̃enaki asa, tava ki Sup̃e: 6Go e noa ki Moses, e naga, Kinau m̃om̃a Yethro a po umai punusi ko, kinami ma am̃agoroi, go natuna naanoai dua ero sikoti a umai. 7Go Moses e dave pano naga ega sua m̃ona, go e kolo suai natano, po dum̃ili a; go ero dum̃ada pusuusu paki da ki nawiaana adeada; go eu rumai paki ekopu ni tap̃aup̃au. 8Go Moses e dogorogo paki m̃ona ki tea mamau puti waina Yehovah e mari a paki Faraoh go paki naka ni Ityipt nalakena Israel, namawosaana mamau puti waina e pakilina ki da napua, go naga Yehovah e pualua ra. 9Go Yethro e laelaea nalakena nawiaana mamau puti waina Yehovah e mari a paki Israel, waina e pualua ra m̃elu dua ki nam̃elearu ni naka ni Ityipt. 10Go Yethro e naga, Yehovah ega vei tea vasam̃atakiana, waina e po pualua mu m̃elu dua ki nam̃elearu ni naka ni Ityipt, go ki nam̃elearu ni Faraoh; waina e po pualua narei m̃elu dua ki etano ni nam̃elearu ni naka ni Ityipt. 11Ragi waia a atae naga Yehovah e p̃arua liu sup̃e mamau puti: nalakena naleo waina eu mari madaga paki da asa nae e dap̃au ra. 12Go Yethro, Moses m̃ona, e magi Sup̃e dape naviriana tap̃arakiana sikai go naviriana p̃ota maga: go Aaron e umai, nara ma tea matua mamau puti ni Israel, naga euga kani navinaga sikoti Moses m̃ona narae ni Sup̃e. 13Go matamai ki nia, Moses e doko naga ega vasap̃otae narei: go narei eu lawodu pisari Moses pae malip̃ogi pa pa paki ragi melu. 14Go Moses m̃ona e punusi tea mamau puti waina nae e do mari a paki narei, go e naga, Naleo waia waina nigo ku do mari a paki narei e pei nasava? Ekasana nigo ku masikim̃a doko, go narei mamau eu lawodu pisari ko pae malip̃ogi pa pa paki ragi m̃elu? 15Go Moses e noa ki m̃ona, e naga, Nalakena narei eu rumai punusi au naga euga vusuusu paki Sup̃e: 16Ragi waina eu peani naleo sikai, eu rumai punusi au; go a pasap̃otae namawota ni naatam̃oli sikai go ni tana ri, go a mari ra eu atae natawonakiana maga ki Sup̃e, go nawotaeana aneana maga. 17Go Moses m̃ona e noa ki nia, e naga, Naleo waina nigo ku do mari a e da p̃ia mau. 18P̃a wo pamate lomau, nimu ma narei waia waina eu sikoti ko doko; nalakena naleo waia e madaga ki‐go; ku mari sa masikim̃a mari a. 19Ragi waia p̃a rogo parati ki nadaleogu, aga vusum̃aki paki‐go, go Sup̃e ega sikoti ko doko: nigo p̃a magi narei doko namawota kakada ma Sup̃e, go nigo p̃a viragi naleo maga umai punusi Sup̃e; 20Go p̃a vasa pisei ki da natawonakiana maga go nawotaeana maga, po mari ra euga atae napua waina euga surata asa, go nawosiana waina euga mari a. 21Go nigo p̃a matadoa m̃elu dua ki narei mamau naatam̃oli maga ni namarimatuaana, waina eu matau ki Sup̃e, naatam̃oli maga ni nalomauana, waina eu pilosi natapepavakotoana; go p̃a lawo ki da dap̃au ra, naga euga vei tea maraki manu maga, tea maraki p̃onotia maga, tea maraki rualima lima maga, go tea maraki rualima sikai maga: 22Go euga vasap̃otae narei sara ragi: go ega wo dapala waia, sara naleo warua euga wo piragi a umai punusi ko, ma sara naleo kiki euga wo dum̃ada pasap̃otae a: p̃a mari a ega manainai ki‐go ega tapala nogoe, go euga tapetape sikoti ko. 23Ku pe mari naleo wanogoe, go Sup̃e e pe tip̃aki‐go asa, ku pe wo mariatae du, go narei mamau waia eu pe wo paki tokora adeada natam̃ateana. 24Go Moses e dogo parati ki nadaleo ni m̃ona, po mari tea mamau puti waina e noa e. 25Go Moses e matadoa naatam̃oli maga ni namarimatuaana m̃elu dua ki Israel mamau, po mari ra eu pei nap̃au ni narei, tea maraki manu maga, tea maraki p̃onotia maga, tea maraki rualima lima maga, go tea maraki rualima sikai maga. 26Go eu pasap̃otae narei sara ragi: naleo kasua maga eu piragi a umai punusi Moses, ma sara naleo kiki eu dum̃ada pasap̃otae a. 27Go Moses e suasua ki m̃ona naga ega vano; go e paki navanua aneana pano.
Currently Selected:
EKSODAS 18: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
