EKSODAS 15
15
1Ragi wanogoe Moses go Israel natuna maga eu lega ki Yehovah nalegaana waia, po pasa, eu naga,
Aga wo lega ki Yehovah, nalakena e pakilagi p̃arua liu:
Horse go naatam̃oli kakana e po nadi ki da paki natasi.
2Yah e pei nakasuaana go nalegaana aginau,
Go e po maginau pei namautiana:
Nae e pei Sup̃e aginau, go aga wo samasama ni a;
Sup̃e ki tamagu, go aga wo pasa pakilagi ki nia.
3Yehovah e pei naatam̃oli sikai ni navakalo:
Nagisana e pei Yehovah.
4Kariot maga ki Faraoh go taua ni naatam̃oli navakalo aneana maga e po nadi ki da paki natasi:
Go m̃aau matadoaana aneana maga eu po diro Natasi ni Nam̃om̃o.
5Epua maga eu dap̃augoro ra:
Eu siwo paki epua maga dakiusi vatu.
6Nam̃elearum̃a ni matua, Yehovah O, e pei tea rogoana ki nakasuaana,
Nam̃elearum̃a ni matua, Yehovah O, e duki p̃oraworae tea kokona maga.
7Go ki nawaruaana ni navakilagiana anigo ku mari matua ki tea maga waina eu duleana dip̃a ko:
Ku dip̃aki lua namaetoana anigo, e gani ra dakiusi stro.
8Go noai maga eu pei tea tauakiana ki namero ni nagisum̃a,
Noaisara maga eu lawodu dakiusi taua;
Epua maga eu gagataki nap̃alau ni natasi.
9Tea kokona e naga,
Aga wo sava dausi, aga wo pa parati ki, aga wo dap̃otae tea tape‐pavakotoana:
Naatagu ega wo puka ara;
Aga wo sai ki lova aginau, nam̃elearugu ega wo mari sa ki da.
10Ku sui ki nalagi anigo, natasi e dap̃augoro ra:
Eu pei tea maluluakiana siwo dakiusi led noai kasua maga.
11Sei e dakiusi ko, Yehovah O, m̃aleoputo ni sup̃e maga?
Sei e dakiusi ko, tea rogoana ki natapuana,
Tea mataukiana ki nasamasamaniana, tea mari tea ni namagaana maga?
12Ku sai ki nam̃elearum̃a ni matua,
Maramana e dinomi ra.
13Narei waina ku po daulua ra ku po maraki ra ki nadodomiana anigo:
Ku po pitana ki da ki nakasuaana anigo paki natokoana tapu anigo.
14Nalauna maga eu po dogo, eu duruuru:
Navitinuana e po puati tea maga waina eu doko Filistia.
15Ragi wanogoe tea maraki maga ni Edom eu saram̃akoto;
Tea marimatua maga ni Moab, naruruuruana e do puati ra:
Tea mamau puti waina eu doko Kanaan eu po sara.
16Namatakuana go nam̃anaunauana ero do dowo ara;
Eu matadorogo doko dakiusi vatu ki nawaruaana ni narum̃a;
Pa pa narei anigo euga wo surata duaduru, Yehovah O.
Pa pa narei waina ku pakotovi ra euga wo surata duaduru.
17P̃a wo piragi ra umai, po lawo ki da tava ni naveaniana anigo,
Tokora waina ku po manigo mari a naga p̃a toko asa doko, Yehovah O,
Nasum̃a tapu, Nawota O, waina nam̃elearum̃a ero po lawo‐kilaketoko asa.
18Yehovah ega wo maramara pa pa ega wo du du po du mau du.
19Nalakena horse maga ki Faraoh go kariot aneana maga go naatam̃oli ni horse aneana maga eu siwo paki natasi, go Yehovah e piragi noai maga ni natasi eu moro liliu paki da; ma Israel natuna maga eu surata natano garagara m̃aleoputo ni natasi. 20Go Miriam profeta nagoroi, Aaron gorena, e dape timbrel sikai e doko nam̃elearuna; go nagoroi mamau puti eu dausi a pano eu puati timbrel maga po sale ki nasaleana maga. 21Go Miriam e pasadara ra, e naga,
Kuga lega ki Yehovah, nalakena e pakilagi p̃arua liu;
Horse go naatam̃oli kakana e po nadi ki da paki natasi.
22Go Moses e piragi lua Israel m̃elu dua ki Natasi ni Nam̃om̃o pano, go eu paki masop̃alo ni Shur pano; go eu surata masop̃alo naaleatia dolu, go eu da pap̃ai te noai mau. 23Go eu rumai paki Marah, go eu mari sa munu noai ni Marah, nalakena nara eu kokona: nalakena tea wanogoe nagisana e pei tea sosoana ki Marah. 24Go narei eu daururu dip̃a Moses, po naga, Tuga wo munu nasava? 25Go e pioso paki Yehovah; go Yehovah e pisei ki nia nakau sikai, go e nadi ki nia paki noai maga, go noai maga eu po mami. Tokora wanogoe e madeada mari natawonakiana sikai go navasap̃otaeana sikai asa, go tokora wanogoe e maridogo ra asa; 26Go e naga, Ku pe wo dogo parati ki nadaleo ni Yehovah Sup̃e anigo, po mari tea waina e leana namatana, po dakidorogo natip̃akiana aneana maga, po pavaigoro natawonakiana mamau puti aneana, nasasanaana maga waina a doropusi ra naka ni Ityipt, a pe wo da doropusi ra ako mau: nalakena kinau a pei Yehovah waina a maripauri ko.
27Go eu rumai paki Elim, waina namata noai rualima sikai tamate dua, go paama rualima larua eu doko asa: go eu m̃enaki tokora wanogoe doko pisari noai maga.
Currently Selected:
EKSODAS 15: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
