EKSODAS 16
16
1Go eu surata m̃elu dua ki Elim pano, go navata mamau ni Israel natuna maga eu rumai paki masop̃alo ni Sin, waina e doko namawota ni Elim go ni Sinai, naaleatia kerualima sikai tamate kelima ni atelagi kerua edaku ki nam̃elu‐dua‐ki‐navanua‐ni Ityipt‐ana adeada. 2Go navata mamau ni Israel natuna maga eu daururu dip̃a Moses go Aaron masop̃alo: 3Go Israel natuna maga eu noa ki da, eu naga, Ko, au pe mate ki nam̃elearu ni Yehovah navanua ni Ityipt e pe wia, ragi waina au doko pisari pot ni nap̃okasi maga, ragi waina au gani navinaga pa pa au puka; nalakena koro po piragi lua gami umai paki masop̃alo waia, naga koroga mari punue puti nasaisaiana mamau waia ki navitoloana. 4Go Yehovah e noa ki Moses, e naga, P̃a leo, aga wo manimu mari navinaga ega wo p̃owo pae nakoroatelagi umai; go narei euga tave pano po pila daua ki tea ni naaleatia sikai sara naaleatia, naga aga maridogo ra, euga wo surata pae nawotaeana aginau, kite e pe tika. 5Go ega wo pakilina naaleatia kelatesa, naga euga mari m̃ata ki tea waina eu po dape a umai asa, go ega vaka rua pataka ni tea waina eu pila daua ki nia sara naaleatia. 6Go Moses go Aaron ero noa ki Israel natuna mamau puti, ero naga, Ragi melu, kuga wo atae asa naga Yehovah e po piragi lua mu m̃elu dua ki navanua ni Ityipt umai: 7Go malip̃ogi, kuga wo punusi nasamasamaana ki Yehovah asa; nalakena e dogo nataururuana animu maga dip̃a Yehovah: go kinami aro pei nasava, naga ku daururu dip̃a gami? 8Go Moses e naga, Ega wo dapala nogoe, ragi waina Yehovah ega wo dua mu nap̃okasi ragi melu naga kuga kani a, go navinaga malip̃ogi pa pa kuga wo puka; nalakena Yehovah e dogo nataururuana animu maga waina nimu ku do daururu dip̃a e asa: go kinami aro pei nasava? Nataururuana animu maga eu da dip̃a gami mau, ma eu dip̃a Yehovah. 9Go Moses e noa ki Aaron, e naga, P̃a noa ki navata mamau ni Israel natuna maga, p̃a naga, Kuga umai paki m̃aladigi ki narae ni Yehovah: nalakena e po dogo nataururuana animu maga. 10Go e pakilina, ragi waina Aaron e do pasa paki navata mamau ni Israel natuna maga, naga eu leo daki paki masop̃alo, go p̃a leo, nasamasamaana ki Yehovah e pakilina napopouru. 11Go Yehovah e pasa paki Moses, po naga, 12A po dogo nataururuana maga ki Israel natuna maga: p̃a vasa paki da, po naga, Ragi melu kuga wo gani nap̃okasi, go malip̃ogi kuga wo puka ki navinaga; go kuga wo atae naga kinau a pei Yehovah Sup̃e animu. 13Go e pakilina ragi melu, naga kuel maga eu sake umai, po dap̃augoro tokora ni nam̃enakiana: go malip̃ogi nasovaki e one dalivirigoro tokora ni nam̃enakiana. 14Go ragi waina nasovaki waina e one e sake pano, p̃a leo, naleo kiki malaveave e one narae ni masop̃alo, e kiki dakiusi frost tare waina e one natano. 15Go ragi waina Israel natuna maga eu punusi a, eu dum̃ada noa ki da, eu naga, E pei nasava? Nalakena e pei tea waina eu da atae a mau. Go Moses e noa ki da, e naga, E pei navinaga waina Yehovah e po dua mu asa naga kuga kani a. 16Tea waia e pei naleo waina Yehovah e po dip̃aki nia, e naga, Kuga vila daua ki seara kakana, sara naatam̃oli euga vila daua ki tea waina e pataka ni nakaniana adeada; kuga tape omer sikai agi naatam̃oli sikai ega sarasara naatam̃oli animu maga, sara naatam̃oli euga magi tea maga waina eu doko tap̃aup̃au adeada dape a. 17Go Israel natuna maga eu mari dapala nogoe, po pila daua ki, seara eu pila daua ki tea warua, go seara eu pila daua ki tea kiki. 18Go ragi waina eu dowogi a ki omer sikai, tea waina e pila daua ki tea warua e dika tea tupele, go tea waina e pila daua ki tea kiki e da dika mau; sara naatam̃oli eu pila daua ki tea waina e pataka ni nakaniana adeada. 19Go Moses e noa ki da, e naga, Te naata ega ta doropusi seara kakana ega ta doko pa pa paki malip̃ogi mau. 20Ma eu da dogo parati ki Moses mau; ma naatam̃oli seara eu doropusi seara kakana e doko pa pa paki malip̃ogi, go e dape ula maga, po p̃oa: go Moses e maeto ki da. 21Go eu pila daua ki nia sara malip̃ogi, sara naatam̃oli eu pila daua ki tea waina e pataka ni nakaniana adeada: go ragi waina elo e po suisui, e sara. 22Go e pakilina, naga naaleatia kelatesa eu pila daua ki navinaga waina e paka rua patakana, omer eduarua agi naatam̃oli sikasikai, go tea maraki mamau puti ni navata naatam̃oli eu rumai po noakisai Moses asa. 23Go e noa ki da, e naga, Tea waia e pei tea waina Yehovah e po noa e, e naga, Matamai e pei naaleatia ni namaromaroana warua, sabbath tapu sikai ki Yehovah: tea waina kuga wo daoni a kuga taoni a, go tea waina kuga wo peni a ki noai kuga veni a ki noai; go tea mamau puti waina e dupele kuga manimu doropusi a naga ega vei tea mautiana pa pa paki malip̃ogi. 24Go eu doropusi a e doko pa pa paki malip̃ogi, dakiusi waina Moses e pitip̃aki: go e da p̃oa mau, go ula seara e da doko asa mau. 25Go Moses e naga, Kuga kani a masoso; nalakena masoso e pei sabbath sikai ki Yehovah: masoso kuga wo da pap̃ai a namalasi mau. 26Naaleatia latesa kuga vila daua ki nia; ma naaleatia kelarua e pei sabbath, ega wo dika asa. 27Go e pakilina naaleatia kelarua, naga naatam̃oli seara eu dave pano naga euga vila daua ki nia, go eu da pap̃ai seara mau. 28Go Yehovah e noa ki Moses, e naga, Kuga karai pa pa paki seve ragi naga kuga vavaigoro natip̃akiana aginau maga go nawotaeana aginau maga? 29Kuga vunusi, nalakena Yehovah e dua mu sabbath, nalakena tea wanogoe nae e do dua mu naaleatia kelatesa navinaga ni naaleatia dua; kuga toko naliamu doko, te naata sikai ega ta m̃elu dua ki tokora aneana pano naaleatia kelarua mau. 30Go narei eu maromaro naaleatia kelarua. 31Go nasum̃a ni Israel eu soso nagisana ki Manna: go e dakiusi napati ni koriander, e dare; go nakatidogoana kakana e dakiusi keke waina honi e doko asa. 32Go Moses e naga, Tea waia e pei naleo waina Yehovah e po dip̃aki nia, e naga, Navakavuroana ni omer sikai kakana ega magi tagona animu maga pei tea vavaigoroana; naga euga vunusi navinaga waina a pakale mu asa masop̃alo, ragi waina a piragi lua mu m̃elu dua ki navanua ni Ityipt umai. 33Go Moses e noa ki Aaron, e naga, P̃a tape lasa sikai, po doropusi navakavuroana ni omer sikai ni manna asa, po doropusi a narae ni Yehovah, naga ega magi tagona animu maga pei tea vavaigoroana. 34Dakiusi waina Yehovah e dip̃aki Moses asa, dapala nogoe Aaron e doropusi a narae ni Nanoasokisokiana, naga ega vei tea vavaigoroana. 35Go Israel natuna maga eu gani manna natau rualima pati, pa pa eu rumai paki navanua ni natokoana; eu gani manna, pa pa eu rumai paki namatap̃ago ni navanua ni Kanaan. 36Go omer sikai e pei namagovai kerualima ni efah sikai.
Currently Selected:
EKSODAS 16: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
