EKSODAS 14
14
1Go Yehovah e pasa paki Moses, po naga, 2P̃a vasa paki Israel natuna maga, naga euga liliu po m̃enaki narae ni Pi‐hahiroth, namawota ni Mikdol go ni natasi, narae ni Baal sefon: kuga m̃enaki doko p̃ai a m̃aladigi ki natasi. 3Go Faraoh ega wo noa nalo ni Israel natuna maga, ega wo naga, Nara eu sasap̃o navanua, masop̃alo e po kokoro ra. 4Go aga wo mari nap̃op̃o ni Faraoh ega wo kasua, go ega wo dausi ra; go aga wo pei tea dodomadaganiana nalo ni Faraoh, go nalo ni taua mamau ni naatam̃oli navakalo aneana maga; go naka ni Ityipt euga wo atae naga kinau a pei Yehovah. Go eu mari dapala nogoe. 5Go e pei tea noasaiana paki nawota ni Ityipt naga narei eu sava pano: go nap̃op̃o ni Faraoh go ni tea suasua aneana maga eu po panop̃ota paki narei, go eu naga, Nasa sei tu po mari a, waina tu po suasua ki Israel naga euga vano naga euga ta manigida suasua mau? 6Go e likoti kariot aneana, po piragi narei aneana eu sikoti a pano: 7Go e piragi kariot matadoaana p̃onotia latesa, go kariot mamau puti ni Ityipt, go m̃aau maga eu doko puti ara. 8Go Yehovah e mari nap̃op̃o ni Faraoh nawota ni Ityipt e kasua, go e sava dausi Israel natuna maga: go Israel natuna maga eu m̃elu pano ki m̃elearu sikeana sikai. 9Go naka ni Ityipt eu sava dausi ra, horse ni kariot ki Faraoh mamau puti, go naatam̃oli ni horse aneana maga, go taua ni naatam̃oli navakalo aneana maga, po pa parati ki da eu m̃enaki m̃aladigi ki natasi, doko pisari Pi‐hahiroth, narae ni Baal sefon. 10Go Faraoh e umai paki m̃aladigi, go Israel natuna maga eu sike namatada, go p̃a leo, naka ni Ityipt eu surata dausi ra; go eu mataku p̃arua: go Israel natuna maga eu pioso paki Yehovah. 11Go eu noa ki Moses, eu naga, Matigo seara eu da doko Ityipt, waina e pei nalakena ku po piragi lua gami naga auga mate masop̃alo kite? Nasa sei ku po mari a paki gami, waina ku po piragi lua gami m̃elu dua ki Ityipt? 12Tea waia e da pei navasaana waina au noa ki‐go asa Ityipt kite? Au naga, P̃a toropusi gami auga toko naga auga magi naka ni Ityipt suasua. Nalakena e p̃ia ki gami naga auga magi naka ni Ityipt suasua, ma e sa ki gami naga auga mate masop̃alo. 13Go Moses e noa ki narei, e naga, Kuga ta mataku mau, kuga tu dorogo, po punusi namautiana ki Yehovah, waina ega wo manimu mari a masoso: nalakena naka ni Ityipt waina ku po punusi ra masoso, kuga wo da moro punusi ra mau pa pa ega tu du po du mau du. 14Yehovah ega wo manimu marimari, go nimu kuga vunuta. 15Go Yehovah e noa ki Moses, e naga, Ekasana ku pioso paki nau? P̃a vasa paki Israel natuna maga, naga euga surata pano. 16Go nigo, p̃a sike tiko anigo, po sai ki nam̃elearum̃a elagi ni natasi, po dap̃otae a: go Israel natuna maga euga wo paki m̃aleoputo ni natasi natano garagara. 17Go kinau, p̃a leo, aga wo mari nap̃op̃o ni naka ni Ityipt euga wo kasua, go euga wo dausi ra pano: go aga wo pei tea dodomadaganiana nalo ni Faraoh, go nalo ni taua mamau ni naatam̃oli navakalo aneana maga, kariot aneana maga, go naatam̃oli ni horse aneana maga. 18Go naka ni Ityipt euga wo atae naga kinau a pei Yehovah, ragi waina aga wo pei tea dodomadaganiana Faraoh, kariot aneana maga, go naatam̃oli ni horse aneana maga. 19Go agelo ki Sup̃e, waina e pea ki taua ni Israel, e m̃elu pano po edakugoro ra; go napopouru lawodu e m̃elu dua ki naraeda pano, po lawodu natakuda: 20Go e umai paki namawota ni taua ni Ityipt go ni taua ni Israel; go napopouru go namaligo ero doko, ma e pitua ki namarama p̃ogi: go sikai e da umai paki m̃aladigi ki sikai nap̃ogiana wanogoe mamau mau. 21Go Moses e sai ki nam̃elearuna elagi ni natasi; go Yehovah e mari natasi e pano ki nalagi ruatu kasua sikai nap̃ogiana wanogoe mamau, po mari natasi e pei natano garagara, go noai maga eu pei tea tap̃otaeana. 22Go Israel natuna maga eu paki m̃aleoputo ni natasi natano garagara: go noai maga eu madeada pei nakoro sikai taleva ni matua kakada go taleva ni mawiri kakada. 23Go naka ni Ityipt eu sava dausi ra, po edakugoro ra paki m̃aleoputo ni natasi pano, horse mamau puti ki Faraoh, kariot aneana maga, go naatam̃oli ni horse aneana maga. 24Go e pakilina ragi ni navavaigoroana ni malip̃ogi, naga Yehovah e leoduru dave nakapu go napopouru lawodu punusi taua ni naka ni Ityipt, po kopasi taua ni naka ni Ityipt. 25Go e dape lua tea taliepu ni kariot adeada maga, go eu mari ra eu pano kite sa go naka ni Ityipt eu naga, Tuga sava dua ki narae ni Israel pano; nalakena Yehovah e madeada marimari dip̃a naka ni Ityipt.
26Go Yehovah e noa ki Moses, e naga, P̃a sai ki nam̃elearum̃a elagi ni natasi, naga noai maga euga liliu paki naka ni Ityipt, paki kariot adeada maga, go paki naatam̃oli ni horse adeada maga. 27Go Moses e sai ki nam̃elearuna elagi ni natasi, go natasi e liliu paki namuaana tuai kakana malip̃ogi; go naka ni Ityipt eu sava sua e; go Yehovah e paruvaru lua naka ni Ityipt m̃aleoputo ni natasi. 28Go noai maga eu liliu, po dap̃augoro kariot maga, go naatam̃oli ni horse maga, go taua mamau ni naatam̃oli navakalo maga ki Faraoh waina eu dausi ra paki natasi pano; sikai maau kakada e da doko mau. 29Ma Israel natuna maga eu surata natano garagara m̃aleoputo ni natasi; go noai maga eu madeada pei nakoro sikai taleva ni matua kakada go taleva ni mawiri kakada. 30Go Yehovah e mauti Israel m̃elu dua ki nam̃elearu ni naka ni Ityipt naaleatia wanogoe; go Israel e punusi naka ni Ityipt eu mate one nadigi ni natasi. 31Go Israel e punusi nawosiana warua wanogoe waina Yehovah e mari a paki naka ni Ityipt, go narei eu matau ki Yehovah: go eu saralomau Yehovah, go tea suasua aneana Moses.
Currently Selected:
EKSODAS 14: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
