PAKI TEA NE EFESO 5
5
1Nalakena tea wanogoe kuga vei tea mari oli Sup̃e, ega tapala natuna dodomiana maga; 2go kuga surata nadodomiana, ega takiusi waina Kristo ma e dodomi mu, po manigida dum̃ana pitua ki nia oli gida, navituaana sikai go naviriana sikai paki Sup̃e naga ega vei nap̃o lolo sikai. 3Ma namaripeleana, go sara naloaana, kite namatam̃aguraana, ega ta pei tea noaana m̃aleoputo kakamu mau, ega takiusi waina e pataka ni tea tautau maga; 4go tea ni namaliereana, go navasaolilalaana, kite navasakalakalaana, waina e da patakamu mau: ma ega vei navasadodom̃atakiana. 5Nalakena ku atae m̃ata ki tea waia, naga te naata sikai waina e maripele, kite waina e da dautau mau, kite waina e matam̃agura, waina e pei tea lotu ki nasup̃e maga, e da peani te naveaniana sikai namarakiana ki Kristo go ki Sup̃e mau. 6Te naata sikai ega ta pilasurue mu ki navasaana p̃alo maga mau: nalakena tea maga wanogoe eu pei nalakena namaetoana ki Sup̃e e umai paki narogopiriana natuna maga. 7Nalakena tea wanogoe kuga ta pei tea veanip̃otae sikoti ra mau; 8nalakena sala vea ku pei namaligo, ma ragi waia ku pei namarama doko Nawota: kuga to surata dapala 9namarama natuna maga (nalakena nawa ni namarama e doko sara nawiaana go sara namarinaleoleanaana go sara nalomauana), 10doko do maridogo tea waina e pei tea midoakim̃atakiana ki Nawota; 11go kuga ta mamau saisaipeani nawosiana oro maga ni namaligo mau, ma kuga vasa kasua ki da: 12nalakena naleo maga waina eu pei tea mariana pae ara dokoloku nanoa‐ra‐ana e pei tea malierekiana. 13Ma naleo maga mamau puti ragi waina eu pei tea vasakasuakiana eu pei tea mariana eu doko lina pae namarama: nalakena sara naleo waina eu pei tea mariana eu doko lina eu pei namarama. 14Nalakena tea wanogoe e naga, P̃a tarapa, tea maturu, go p̃a tuleana m̃elu dua ki tea mate maga, go Kristo ega wo maramalagati ko.
15Nalakena tea wanogoe kuga vunusi m̃ata ki nia dapala waina ku do surata, ega ta dapala tea manumatavusa maga mau, ma ega tapala tea manumatua maga; 16doko do daulua ragi, nalakena naaleatia maga eu sa. 17Nalakena tea wanogoe kuga ta pei tea midoaki sap̃o mau, ma kuga midoaki atae namasauana ki Nawota e pei nasava. 18Go kuga ta matamaloku ki waine mau, waina namaridarataraana e doko asa, ma kuga vei tea vakavuroana ki Naatana. 19Doko do dum̃amu pasa ki mu ki salamo maga go humno maga go nalegaana maga ki Naatana, doko do lega po do mari nalegaana nap̃op̃om̃u paki Nawota. 20Doko do pasadodom̃ata ki Sup̃e, Tama, sara ragi nalakena naleo maga mamau puti doko nagisa ni Nawota anigida Yesu Kristo. 21Po do doko etano dum̃amu paki mu doko namatau ki‐Kristo‐ana.
22Nagoroi maga, kuga toko etano paki naanoai animu maga, ega tapala waina e pe vaki Nawota. 23Nalakena naanoai e pei nap̃au ni nagoroi, dapala waina Kristo e pei nap̃au ni ekalesia, go nae e pei tea mautipauri nap̃atokona. 24Ma dapala waina ekalesia e doko etano paki Kristo, dapala nogoe nagoroi maga euga toko etano paki naanoai adeada maga nalo ni sara naleo. 25Naanoai maga, kuga dodomi nagoroi animu maga, ega tapala waina Kristo e dodomi ekalesia, po maneana dum̃ana pitua ki nia; 26naga ega tapugoro e, po mari a ega tautau ki nasarueana ni noai pae navasaana, 27naga ega tum̃ana maneana mari ekalesia ega lawodu naraena ega vei tea samasamaniana, ega ta pilake te naloaana kite te nasakurukuruana kite te navatuna dapala nogoe mau; ma naga ega vei tea tautau go tea mamaau. 28Dapala nogoe e one naanoai maga one naga euga dodomi nagoroi adeada maga ega tapala waina eu dum̃ada dodomi nap̃atokoda. Tea waina e dodomi anagoroi e dum̃ana dodomi a: 29nalakena te naata e da pilosi nap̃okasina te ragi mau; ma e do pakale a po kulugoro e, dakiusi waina Kristo e do pakale ekalesia. 30Nalakena tu pei naleo maga ni nap̃atokona. 31Nalakena tea wanogoe naatam̃oli sikai ega toropusi tamana go p̃ilana, go ega vuluti anagoroi; go nara dua eroga wo pei nap̃okasi sikai maau. 32P̃aia wanogoe e p̃arua: ma kinau a noa e nalo ni Kristo go nalo ni ekalesia. 33Ma nimu sara naata kakamu euga sikasikai dodomi nagoroi adeada ega tapala waina eu dum̃ada dodomi ra; go nagoroi naga ega matauki anawota.
Currently Selected:
PAKI TEA NE EFESO 5: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
