PAKI TEA NE EFESO 1
1
1Paulo, Apostolo sikai ki Kristo Yesu pae namasauana ki Sup̃e, a midiri paki tea tautau maga waina eu doko Efeso, go paki tea saralomau maga waina eu doko Kristo Yesu: 2Nasaup̃iaana ega vei animu go natam̃ateana m̃elu Sup̃e Tamagida go Nawota Yesu Kristo.
3Sup̃e go Tama ni Nawota anigida Yesu Kristo ega vei tea vasap̃iakiana, waina e pasap̃ia ki gida ki sara navasap̃iakiana ki Naatana doko tokora maga ni nakoroatelagi doko Kristo: 4dapala waina e matadoa gida doko asa pea ki nanadiki‐laketano‐ana ni maramana, naga tuga vei tea tautau go tea mamaau naraena doko nadodomiana: 5e pea dawona ki gida paki navakasereana ni navei‐natunaana pae Yesu Kristo dum̃ana paki nia, pae namidoakim̃atakiana ni namasauana aneana, 6paki nasamasamaniana ni nasamasamaana ni nasaup̃iaana aneana, waina e saup̃ia ki gida asa doko Tea Dodomiana: 7waina tu peani natauluaana asa pae nadana, namidoakikorokoroana ni natapiriana anigida maga, pae nasogolapaana ni nasaup̃iaana aneana, 8waina e mari a e p̃arua liu paki gida doko sara namanumatuaana go sara namidoakiataeana, 9e mari gida tu atae p̃aia ni namasauana aneana, pae namidoakim̃atakiana aneana waina e 10midoakisoki a doko asa paki naleoparatikiana sikai ni navakavuroana ni ragi maga, naga ega saisai ki naleo maga mamau puti doko Kristo, naleo maga waina eu doko nakoroatelagi, go naleo maga waina eu doko maramana; 11doko asa, go waina tu pei tea mariana tu pei tea veaniana sikai doko asa, tu pei tea vea dawonakiana pae namidoakisokiana ki tea waina e do p̃osiwosi ki naleo maga mamau puti pae namidoakip̃otaeana ni namasauana aneana. 12Naga kinami auga vei agi nasamasamaniana ni nasamasamaana aneana, kinami waina au pea leogoro‐pavatu Kristo. 13Waina nimu ma ku pavatu asa, ragi waina ku dogo navasaana ni nalomauana, narogorogoana wia ni namautipaurimu‐ana‐waina, ragi waina ku saralomau ku pei tea vulusokiana doko asa ki Naatana ni nasaiana. 14Tea Tapu, waina e pei nanadisokiana ni tea veaniana anigida, raki natauluaana ni tea veaniana taluaana aneana, paki nasamasamaniana ni nasamasamaana aneana.
15Nalakena tea wanogoe kinau ma, ragi waina a dogo nasaralomauana waina e doko m̃aleoputo kakamu doko Nawota Yesu, go nadodomiana paki tea tautau maga mamau puti, 16a da makoto ki navasadodom̃atakiana nalakena nimu mau, a do mari namidoakinoa‐mu‐ana doko natapasavasaana aginau maga; 17naga Sup̃e ki Nawota anigida Yesu Kristo, Tama ni nasamasamaana, ega tua mu Naatana ni namanumatuaana go ni nanoapakasakiana doko naataem̃ataki‐nia‐ana; 18namata maga ni nap̃op̃omu euga vei tea maramalagatiana, naga kuga atae naleogoroana ni nasosoana aneana e pei nasava, go nasogolapaana ni nasamasamaana ni tea veaniana aneana nalo ni tea tautau maga e pei nasava, 19go nawaruaana warua liu ni nakasuaana aneana paki gida waina tu saralomau e pei nasava, pae nawosiwosiana ni namaridagaragaraana ni nakasuaana aneana, 20waina e p̃osiwosi ki nia doko Kristo ragi waina e sike a e duleana m̃elu dua ki tea mate maga, po mari a e dasake pisari nam̃elearuna ni matua tokora maga ni nakoroatelagi, 21pakilagi dap̃au sara namarakiana go sara naveinawotaana go sara nakasuaana go sara naveinavarapuleana, go sara nagisa waina e pei tea noaana, waina eu doko maramana waia e da masikina mau, ma waina eu doko maramana waina ega wo umai: 22go e mari naleo maga mamau puti eu doko etano ki nam̃elena maga, po pitua ki nia e pei nap̃au dap̃au naleo maga mamau puti paki ekalesia, 23waina e pei nap̃atokona, tea vakavuroana ki tea waina e do pakavuro naleo maga mamau puti ki naleo maga mamau puti.
Currently Selected:
PAKI TEA NE EFESO 1: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
