DANIEL 1
1
1Natau ketolu ni namaramaraana ki Yehoiakim nawota ni Yudah, Nebukadnessar nawota ni Babelon e umai paki Yerusalem, po kelugoro e. 2Go Nawota e pitua ki Yehoiakim nawota ni Yudah, paki nam̃elearuna, go namagovai ni lasa maga ni nasum̃a ki Sup̃e; go e dape ra paki navanua ni Shinar paki nasum̃a ki sup̃e aneana: go e dape lasa maga wanogoe paki ekopu ni nasum̃a ni natauakiana ni nalo wia maga ni sup̃e aneana. 3Go nawota e pasa ki Ashpenas nap̃au ni atavau aneana maga, naga ega viragi umai paki ekopu Israel natuna maga seara kakada, go nawora ni nawota seara kakada go navarapule maga seara kakada; 4Natureai maga waina te wotu sikai e da doko ara mau, ma waina eu pei tea leom̃atakiana, go tea midoakiatae nalo ni sara namanumatuaana, po atae naataeana, po pei tea midoakiatae naataeana, go waina nakasuaana e doko ara naga euga lawodu ekopu ni nasum̃a warua ki nawota; go naga ega vasa pisei ki da namidiriana go namena ni tea ni Kaldea. 5Go nawota e madeada dawona ki namagovai ni navinaga ki nawota, go ni waine munuana aneana, tea ni naaleatia sikai tea kakana, go naga euga vei tea viseikiana natau dolu; go ragi waina natau maga wanogoe euga nopu euga wo lawodu narae ni nawota. 6Go m̃aleoputo ni tea maga wanogoe, tea ni Yudah natuna maga, Daniel, Hananiah, Mishael, go Asariah eu doko. 7Go nap̃au ni atavau maga e dua ra nagisa maga: go e dua Daniel nagisa ni Belteshassar, go e dua Hananiah nagisa ni Shadrak; go e dua Mishael nagisa ni Meshak go e dua Asariah nagisa ni Abed‐neco. 8Ma Daniel e midoa ki nia nap̃op̃ona naga ega ta dum̃ana mari a ega loa ki navinaga ki nawota mau, go ki waine munuana aneana mau: go e pavara ni nap̃au ni atavau maga naga ega ta dum̃ana mari a ega loa mau. 9Go Sup̃e e mari Daniel e pap̃ai nasaup̃iaana go namaritadodomiana narae ni nap̃au ni atavau maga. 10Go nap̃au ni atavau maga e noa ki Daniel, Kinau a matau ki nawota aginau nawota, waina e dawona ki navinaga animu go tea munuana animu: nalakena ekasana ega vunusi naraemu euga sa liu narae ni natureai maga waina eu pei tea ni natau animu maga? Go kuga wo mari au aga lagati dua nawota nap̃augu. 11Go Daniel e noa ki tasiga leoparatiki, waina nap̃au ni atavau maga e dawona ki nia e dap̃au Daniel, Hananiah, Mishael, go Asariah: 12P̃a maridogo tea suasua anigo maga, a pavara ni ko asa, naaleatia rualima sikai; go euga tua gami navinaga m̃oli auga kani a, go noai auga munugi a. 13Go naraegami auga vei tea leopunusiana, go narae maga ni natureai maga waina eu do gani navinaga ki nawota: go p̃a mari paki tea suasua anigo maga ega tapala waina p̃a wo punusi a. 14Go e dogo parati ki da nalo ni naleo wanogoe, po maridogo ra naaleatia rualima sikai. 15Go ragi waina naaleatia rualima sikai eu nopu naraeda eu pei tea leom̃atakiana go eu m̃anopunopu ki nap̃okasida p̃arua liu natureai maga waina eu do gani navinaga ki nawota. 16Go tasiga leoparatiki e dape lua navinaga adeada, go waine munuana adeada, po dua ra navinaga m̃oli. 17Go natureai pati wanogoe, Sup̃e e dua ra naataeana go namidoakiataeana nalo ni sara namidiriana go ni sara namanumatuaana: go Daniel e midoakiatae nalo ni sara navunusiana go ni sara nap̃ereana. 18Go ragi waina naaleatia maga waina nawota e noa e naga ega viragi ra paki ekopu eu nopu, nap̃au ni atavau maga e piragi ra paki ekopu paki narae ni Nebukadnessar. 19Go nawota e pasa ki da; go tea sikai waina e dakiusi Daniel, Hananiah, Mishael, go Asariah, e da pei tea vap̃aiana m̃aleoputo kakada mamau puti mau: go eu lawodu narae ni nawota. 20Go sara naleo ni namanumatuaana go ni namidoakiataeana, waina nawota e pusuusu paki da asa, e pap̃ai ra eu paka rualima sikai p̃ia liu tea midiri tapu maga go tea kikita maga mamau puti waina eu doko namarakiana mamau aneana. 21Go Daniel e doko pa pa paki natau vea ki nawota Sairus.
Currently Selected:
DANIEL 1: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
