PAKI TEA NI KOLOSSE 1
1
1Paulo, apostolo sikai ki Kristo Yesu pae namasauana ki Sup̃e, go Timotheo taigida, 2aro midiri paki tea tautau maga go taigida saralomau maga doko Kristo waina eu doko Kolosse: nasaup̃iaana ega vei animu go natam̃ateana m̃elu Sup̃e Tamagida.
3Aro pasadodom̃ataki Sup̃e Tama ni Nawota anigida Yesu Kristo, doko do manimu dapasavasa sara ragi, 4aro dogo nasaralomauana animu doko Kristo Yesu, go nadodomiana waina ku peani a paki tea tautau maga mamau puti, 5nalakena naleogoroana waina e manimu pei tea toropusiana doko nakoroatelagi maga, waina ku pea dogo e doko navasaana ni nalomauana ni narogorogoana wia, 6waina e umai paki mu; dakiusi waina e doko maramana mamau e do dau ki nawana po do disu po p̃arua, dakiusi waina e mari a doko mu, pae naaleatia waina ku dogo e po atae nasaup̃iaana ki Sup̃e doko nalomauana pa pa; 7dakiusi waina ku ataedogo e m̃elu Epafra tea dodomiana aginami waina au mamau pei tea suasua, waina e manimu pei minister lomau sikai ki Kristo, 8go waina e noa ki sai gami nadodomiana animu doko Naatana.
9Nalakena tea wanogoe kinami ma, pae naaleatia waina aro dogo e pa pa, aro do manimu dapasavasa po pavara, aro da makoto ki nia mau, naga kuga vei tea vakavuroana ki naataem̃atakiana ni namasauana aneana doko sara namanumatuaana go sara namidoakiataeana ni Naatana, 10naga kuga surata ega tapala waina e pataka ni Nawota paki sara namidoakim̃atakiana, doko do dau ki nawamu doko sara nawosiana wia, po do disu po p̃arua ki naataem̃ataki‐Sup̃e‐ana; 11doko do pei tea mariana kuga kasua ki sara nakasuaana, pae namaridagaragaraana ni nasamasamaana aneana, paki sara nasokiana go sara naveimarita‐sokiparauana pilake nalaelaeaana; 12doko do pasadodom̃ata ki Tamana, waina e mari gida tu pataka ni waina tuga veani matele ni tea veaniana ki tea tautau maga doko namarama; 13waina e pua lua gida m̃elu dua ki nakasuaana ni namaligo, po piragi gida duagoto paki namarakiana ki Natuna ni nadodomiana aneana. 14Waina tu peani natauluaana doko asa, namidoakikorokoroana ni namarinaleosaana anigida maga: 15waina e pei nunu ni Sup̃e waina e da pei tea vunusiana mau, takalapa ni sara tea tawonakiana; 16nalakena naleo maga mamau puti eu pei tea tawonakiana doko asa, naleo maga waina eu doko nakoroatelagi maga go naleo maga waina eu doko maramana, naleo maga waina eu pei tea vunusiana go naleo maga waina eu da pei tea vunusiana mau, eu pe vei malo tasake maga kite naveinawotaana maga, kite namarakiana maga, kite nakasuaana maga: naleo maga mamau puti eu pei tea tawonakiana pae asa, go maneana; 17go nae e pea ki naleo maga mamau puti, go naleo maga mamau puti eu saisai du asa. 18Go nae e pei nap̃au ni nap̃atokona, nap̃au ni ekalesia: go e pei naatulakeana takalapa m̃elu dua ki tea mate maga; naga nalo ni naleo maga mamau puti nae ega vei tea vea. 19Nalakena Tamana e midoaki m̃ata ki nia naga navakavuroana mamau ega toko asa doko; 20go naga ega mari naleo maga mamau puti euga moro pei p̃op̃o wia paki nia pae asa e mari natam̃ateana pae nada ni nakau valadagoto aneana; pae asa, eu pe vei naleo maga waina eu doko maramana, kite naleo maga waina eu doko nakoroatelagi maga. 21Go nimu, waina sala vea ku pei tea vanop̃ota go tea kokona maga nap̃op̃omu doko nawosiana sa animu maga, 22ma ragi waia e mari mu ku pei p̃op̃o wia doko nap̃atoko ni nap̃okasina pae namateana, naga ega mari mu kuga lawodu naraena kuga vei tea tautau go tea mamaau go tea ta pei tea vasaip̃aana mau: 23ku pe toko nasaralomauana doko lomau, tea laketanokiana go tea toko kasua, doko da pei tea risuakiana mau m̃elu dua ki naleogoroana ni narogorogoana wia waina ku dogo e, waina e pei tea rogorogokiana doko tea tawonakiana mamau etano ki nakoroatelagi; waina kinau Paulo a pei tea mariana a pei tea suasua sikai kakana.
24Ragi waia a laelaea doko narogokitesaana aginau maga waina eu manimu, go a do pakavuro tea maga waina eu ko puoli ki nariesokiana maga ki Kristo doko nap̃okasigu magi nap̃atokona, waina e pei ekalesia; 25waina kinau a pei tea mariana a pei tea suasua sikai kakana, pae naveitasigaleoparatikiana ki Sup̃e waina e manimu pei tea vituakiana paki nau, naga aga vakavuro navasaana ki Sup̃e, 26p̃aia waina e pei tea tasurukiana pae tuai maga go pae tagona maga pa pa: ma ragi waia e pei tea mariana e doko lina paki tea tautau aneana maga, 27waina Sup̃e e masauna naga ega mari ra euga atae nawaruaana ni nasogolapaana ni nasamasamaana ni p̃aia wanogoe m̃aleoputo ni tea ni nalauna maga, waina e pei Kristo m̃aleoputo kakamu, naleogoroana ni nasamasamaana: 28waina kinami au do dogorogo ki nia, doko do dapavanau sara naatam̃oli po do pasa piseiki sara naatam̃oli doko sara namanumatuaana, naga auga mari sara naatam̃oli euga lawodu naraena euga wia lua doko Kristo; 29waina a do p̃osiwosi mawosa paki asa, doko do maripilele pae nawosiwosiana aneana, waina e do p̃osiwosi doko au ki nakasuaana.
Currently Selected:
PAKI TEA NI KOLOSSE 1: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
