APOSTOLO MAGA 19

1Go e pakilina, naga, ragi waina Apollo e doko Korintho doko, Paulo waina e surata duaduru sua tokora maga ni elagi, e umai paki Efeso, po pap̃ai tea vasapiseikiana seara: 2go e noa ki da, Ku dape Naatana Tapu ragi waina ku saralomau kite? Go eu noa ki nia, Ee, au da dogo mau naga Naatana Tapu e doko. 3Go e naga, Go ku pei tea bapetisoana paki nasava? Go eu naga, Paki nabapetisoana ki Yoane. 4Go Paulo e naga, Yoane e bapetiso nabapetisoana ni namidoakidoaana, e do noa ki narei, naga euga saralomau tea waina ega wo edakugoro e umai, tea wanogoe e pei, naga euga saralomau Yesu. 5Go ragi waina eu dogo tea wanogoe, eu pei tea bapetisoana paki nagisa ni Nawota Yesu. 6Go ragi waina Paulo e pusake sua nam̃elearuna maga ara, Naatana Tapu e umai doko ara; go eu pasa ki namena maga, po pea noa sai. 7Go eu mamau puti eu alagoro pei naanoai rualima sikai tamate dua.

8Go e paki ekopu ni nasum̃a ni nasaisaiana, po pasa piviari atelagi dolu, e do pasa piseiki pululu po do pasa die nalo ni naleo maga ni namarakiana ki Sup̃e. 9Ma ragi waina te seara eu pei tea mariana eu kasua po da saralomau mau, po pasa sa ki Napua narae ni taua ni naatam̃oli maga e m̃elu dua ki da pano, po piragi masale ki tea vasapiseikiana maga, e do pasa piseiki pululu sara naaleatia ekopu ni sukulu ki Tiranno. 10Go tea wanogoe e doko natau dua; dapala waina tea maga mamau puti waina eu doko Asia doko eu dogo navasaana ki Nawota, tea ni Yudea maga go tea ni Hellas maga. 11Go Sup̃e e mari nawosiana kasua maga waina eu da pei tea m̃oli mau pae nam̃elearu ni Paulo: 12dapala waina eu dape tea kasitoro maga go nakovakova maga m̃elu nap̃atokona paki tea sasana maga, go nasasanaana maga eu marua ki da, go naatana sa maga eu dave pano. 13Ma tea ni Yudea waina eu surata pasara seara kakada, waina eu pei tea mari pivisa ki, eu mari dogo naga euga noa nagisa ni Nawota Yesu elagi ki tea maga waina eu peani naatana sa maga, eu naga, A mari pivisa ki mu pae Yesu waina Paulo e dogorogo ki nia. 14Go tea ni Yudea sikai e doko nagisana Sekeva, tea viri warua sikai, waina natuna naanoai larua eu mari tea wanogoe. 15Go naatana sa e pasa dara po noa ki da, e naga, A atae Yesu, go a atae Paulo; ma nimu ku pei sei? 16Go naatam̃oli waina naatana sa e doko asa e soka darup̃a ra, po mari kasua ki liu sokata ki da, po mari matua ki da, dapala waina ero sava dave nasum̃a wanogoe ero m̃alam̃ala po pei wotu. 17Go tea wanogoe e pei tea ataeana paki tea maga mamau puti waina eu doko Efeso doko, tea ni Yudea maga go tea ni Hellas maga; go namatakuana e dowo puti ara, go nagisa ni Nawota Yesu e pei tea dodomadaganiana. 18Go tea laapa ni tea maga waina eu saralomau sua eu rumai, po noa sai, po dogorogo ki nawosiana adeada maga. 19Go tea ta pisa mau ni tea maga waina eu mari nawosiana sa sili ki munuai eu dape saisai ki tusi adeada maga, po dap̃ara ki da narae ni tea maga mamau puti: go eu peve naulu ni navakokotoana kakada, po pap̃ai a e pei matele ni silver tivilia lima. 20Dapala nogoe navasaana ki Nawota e disu kasua po p̃arua po mari matua.

21Go edaku ki tea maga wanogoe eu nopu, Paulo e midoaki nia naatana, naga ragi waina ega ko surata duaduru sua Masedonia go Akaia, ega vaki Yerusalem pano, e naga, Aga vea paki asa, go e one au one naga aga edaku punusi Roma. 22Go ragi waina e dipaki lua sua tea rua ni tea maga waina eu maneana suasua, Timotheo go Erasto, naga eroga vaki Masedonia pano, nae e ko doko Asia doko pa pa te ragi.

23Go ragi wanogoe naparivariana waina e da kiki mau e pakilina nalo ni Napua. 24Nalakena naatam̃oli sikai nagisana Demetrio, tea vei mataisau ni silver, waina e mari nasum̃a tapu maga ni silver ki Diana, e magi tea maga waina eu pei mataisau kakana piragi nawosiana waina e da kiki mau; 25go e saisai ki da, nara ma tea wosiwosi maga nalo ni tea tapala nogoe maga eu mamau, go e naga, Maariki maga, ku atae naga tu peani nasogolapaana anigida pae nawosiana waia. 26Go ku punusi po dogo, naga Paulo waia e pasa die po pua doa taua warua ni naatam̃oli maga, e da mari a Efeso sikina mau, ma e mari a m̃aladigi usuraki Asia mamau, e noa naga tea maga waina eu pei tea mariana pae nam̃elearu maga, eu da pei sup̃e maga mau: 27go e pe tapala nogoe nawosiana anigida tega vei tea dododaoana; go tea wanogoe e pe ta sikina mau, ma nasum̃a tapu ki sup̃e nagoroi warua Diana tega vei tea sarateap̃aloana, go nae e pe vei tea rakaiana m̃elu dua ki natatap̃auana aneana, waina Asia mamau go maramana eu lotu ki nia. 28Go ragi waina eu dogo tea wanogoe, eu pura ki namaritausuana, po pioso, po naga, Diana ki naka ni Efeso e p̃arua. 29Go natokoana e pei tea vakavuroana ki navinovinoiana: go eu sava paki ekopu ni nasum̃a ni naleopunusiana nap̃op̃oda sikai maau asa, eu pua soki sua Caio go Aristarko, naatam̃oli dua ni Masedonia, waina ero do surata sikoti Paulo. 30Go ragi waina Paulo e masauna naga ega vaki ekopu punusi narei, tea vasapiseikiana maga eu da suasua ki nia mau. 31Go naatam̃oli warua seara ni Asia, waina eu pei tana ri, eu dip̃aki lua pa punusi a, po pavarani a naga ega ta paki ekopu ni nasum̃a ni naleopunusiana mau. 32Go te seara eu pioso tea sikai, go te seara eu pioso tea p̃ota; nalakena nasaisaiana e pinovinoi; go tea laapa kakada eu da atae tea waina e pei nalakena eu saisai mau. 33Go eu piragi Alexander m̃elu dua ki taua ni naatam̃oli maga, tea ni Yudea eu do digotigo e. Go Alexander e alosoki ki nam̃elearuna, po masauna naga ega tum̃ana maneana pasa korokoro e paki narei. 34Ma ragi waina eu atae naga e pei tea ni Yudea, eu mamau puti pioso ki nadaleo sikai maau e alagoro pei aura dua, eu naga, Diana ki naka ni Efeso e p̃arua. 35Go ragi waina tea midiri ni natokoana e mari taua ni naatam̃oli maga eu matadorogo, e naga, Naatam̃oli ni Efeso maga, sei ni naatam̃oli maga e doko waina e da atae naga natokoana ki naka ni Efeso e pei tea leo paratiki nasum̃a tapu ki Diana warua, go ki nasup̃e waina e dowo m̃elu Yupiter umai? 36Go nalakena tea maga wanogoe eu mari sa pei tea vasapaaruakiana, e one mu one naga kuga matadorogo, po da mari p̃aragoto te navatuna mau. 37Nalakena ku po piragi naatam̃oli maga waia umai, waina eu da pei tea tapepavakoto nasum̃a tapu maga mau, go waina eu da pasa sa ki sup̃e nagoroi anigida mau. 38Nalakena tea wanogoe Demetrio, go tea vei mataisau maga waina eu sikoti a doko, eu pe veani te navatuna dip̃a te naata sikai, naaleatia ni navasap̃otaeana maga eu doko, go nawota vasa p̃otae maga eu doko: euga tum̃ada pasa dip̃a ra. 39Ma ku pe laaga te navatuna nalo ni tea p̃ota maga, ega vei tea vasap̃otaeana nasaisaiana leana. 40Nalakena tu pei tea waina tu pe vei tea vasadip̃aana nalo ni natuleanaana ni masoso, nalakena kakana e dika: 41go tuga wo mari sa atusi nalo ni nasaisaiana waia. Go ragi waina e pasa sua dapala nogoe e dapera ki nasaisaiana.

Currently Selected:

APOSTOLO MAGA 19: NTB

Highlight

Copy