APOSTOLO MAGA 20

1Go edaku ki navasap̃araiana e nopu, Paulo e dip̃aki lua paraki tea vasapiseikiana maga euga umai, go e pasa paratiki da, po pasa dule ki da, po m̃elu pano naga ega vaki Masedonia pano. 2Go ragi waina e surata duaduru sua tokora maga wanogoe, po pasa paratiki p̃arua ki sua ra, e umai paki Hellas. 3Go ragi waina e doko sua asa atelagi dolu, go tea ni Yudea eu seke ki nia, ragi waina e naga ega vorau paki Siria pano, e midoaki p̃otae naga ega liliu duaduru Masedonia pano. 4Go Sopater ni Beria, natu ni Pirro, e sikoti a pano pa pa paki Asia; nara ma Aristarko go Sekundo ni naka ni Thessalonika; go Caio ni Derbe, go Timotheo; go tea ni Asia, Tikiko go Trofimo. 5Ma nara eu pea pano, po doko raki gami Troas. 6Go kinami au porau pae Filippi edaku ki naaleatia maga ni bred waina leven e dika asa, go au rumai paki Troas punusi ra naaleatia kelima; go au doko tokora wanogoe naaleatia larua.

7Go naaleatia vea ni wiik, ragi waina au pei tea saisaikiana naga auga tova p̃orae bred, Paulo e pasa piseiki pululu ki da, e midoaki nia naga ega vano matamai ki nia; go e pasa parau pa pa p̃ogi matua. 8Go nasulu laapa eu doko em̃ago ni tagona ni elagi, waina au pei tea saisaikiana asa. 9Go natureai sikai nagisana Eutiko e dasake namata leo sikai, waina e pei tea vuatiana ki namaturuana daratara; go ragi waina Paulo e ko do pasa piseiki paraurau, e pei tea vuatiana pakitano ki namaturuana aneana po dowo pae tagona ketolu siwo pakitano, po pei tea tapedakatiana e mate. 10Go Paulo e siwo, po dowo asa, po doti a po naga, kuga ta p̃arai mau; nalakena naatana e doko asa. 11Go ragi waina e m̃oro sake, po dova p̃orae bred, po ganikani, po pasa ki da ragi varau, pa pa paki ragi ni namakotokotoana, e dapala nogoe pano. 12Go eu piragi natureai wanogoe e mauri, go eu pei tea vakavakaleana e da kiki mau.

13Ma kinami au pea paki shipe pano, po porau naga auga vaki Asso, waina au midoaki nia naga auga musagi Paulo asa: nalakena e dawonaki dapala nogoe, nae e midoaki nia naga ega vae euta. 14Go ragi waina e sua gami Asso, au musagi a, po umai paki Mitilene. 15Go au porau pae tokora wanogoe, go matamai ki nia au rumai doko kivea ki Kio; go matamai ki nia au paki euta Samo ragi kiki; go matamai ki nia au rumai paki Mileto. 16Nalakena Paulo e midoaki p̃otae naga ega vorau liu Efeso, naga ega ta pakilina ki nia mau naga ega toko parau doko Asia; nalakena e do mari m̃araverave, naga e pe mari atae, ega toko Yerusalem naaleatia ni Pentekoste.

17Go e dip̃aki lua pae Mileto paki Efeso, po soso tea matua maga ni ekalesia naga euga umai punusi a. 18Go ragi waina eu rumai punusi a, e noa ki da, e naga.

Nimu ku dum̃amu atae, dapala waina a doko sikoti mu doko ragi mamau, pae naaleatia waina a pea umai pasi Asia asa, 19naga a do magi Nawota suasua ki sara naveip̃op̃ovakitanoana, go ki naririmata maga, go ki namaridogoana maga waina eu pakilina ki nau nalakena nasekeana maga ki tea ni Yudea: 20naga a da suka ki noa ki sai mu mau tea maga waina eu p̃ia ki mu, po pasa piseiki mu lina, go pae nasum̃a animu maga, 21po do noasokisoki kasua paki tea ni Yudea go tea ni Hellas namidoakidoaana paki Sup̃e, go nasaralomauana paki Nawota anigida Yesu Kristo. 22Go ragi waia, kuga leo, kinau a pei tea soliana naatagu paki Yerusalem pano, a da atae tea maga waina euga wo pakilina ki nau asa mau: 23ma a atae tea waia sikai maau, naga Naatana Tapu e do noa sokisoki kasua paki nau sara natokoana, e noa naga natali solisoli maga go nariesokiana maga eu doko raki nau doko. 24Ma a mari namauriana aginau e pei tea m̃oli, e da maginau pei tea lomau mau, naga aga mari sua nasavaana ni namalopa aginau, go nasuasuaana waina a dape a ki Nawota Yesu, naga aga noa sokisoki kasua ki narogorogoana wia ni nasaup̃iaana ki Sup̃e. 25Go ragi waia, kuga leo, kinau a atae naga nimu maga tea mamau puti, waina a surata m̃aleoputo kakamu po dogorogo ki namarakiana, kuga wo da moro punusi naraegu mau. 26Nalakena tea wanogoe a noa sokisoki kasua paki mu naaleatia waia, naga a dautau pa dua ki nada ni tea maga mamau puti. 27Nalakena a da suka ki noa ki sai mu namidoakip̃otaeana mamau ki Sup̃e mau. 28Kuga tum̃amu leo paratiki mu, go ki navata mamau, waina Naatana Tapu e mari mu ku pei tea leo paratiki kakana, naga kuga leo paratiki pakale ekalesia ki Sup̃e, waina e dalua e ki nadana aneana. 29Kinau a atae naga edaku ki navanoana aginau wulf mari pavakoto maga euga wo umai paki m̃aleoputo kakamu waina euga wo da p̃op̃osoki navata mau; 30go nimu naatam̃oli seara kakamu euga wo pakilina, po pasa tea sa maga, naga euga viragi lua tea vasapiseikiana maga euga rausi ra. 31Nalakena tea wanogoe kuga to leleogoro, po midoaki nia naga natau dolu a do dapavanau sara naatam̃oli sikasikai p̃ogi go aleati pilake naririmata maga a da makoto ki nia mau. 32Go ragi waia a pitua ki mu paki Sup̃e, go paki navasaana ni nasaup̃iaana aneana, waina e mari atae davagi mu, po dua mu tea veaniana m̃aleoputo ni tea maga mamau puti waina eu pei tea maridautaukiana. 33A da matam̃agura ki silver, kite kold, kite sugoro maga ki te naata sikai mau. 34Ku dum̃amu atae naga nam̃elearugu maga waia ero magi natikaana aginau maga suasua, go ero magi tea maga waina eu sikoti au suasua. 35A piseiki mu pae naleo maga mamau puti naga e one mu one naga kuga wosiwosi‐mawosa ega tapala nogoe, po silae tea manainai maga, po midoaki navasaana ki Nawota Yesu, naga nae e noa, naga Namaropaana ni navituaana e p̃arua liu tea ni natapeana.

36Go ragi waina e noa sua tea maga wanogoe, e ditip̃atua, po dapasavasa nae ma nara mamau puti eu mamau. 37Go eu mamau puti dagi p̃arua, po dowo nanoa ni Paulo, po dum̃ili a, 38eu dogo kite sa p̃arua liu nalakena navasaana waina e noa e, naga euga ta moro leopunusi naraena mau. Go eu pitana ki nia paki shipe pano.

Currently Selected:

APOSTOLO MAGA 20: NTB

Highlight

Copy