APOSTOLO MAGA 18

1Ragi edaku ki tea maga wanogoe e m̃elu dua ki Athens pano, po umai paki Korintho. 2Go e pap̃ai naatam̃oli ni Yudea sikai nagisana Akula, tea ni Ponto pae namatarau aneana, waina e pae Italia umai m̃aladigi ki ragi wanogoe, nara ma anagoroi Priskilla, nalakena Klaudio e dip̃a ki tea ni Yudea maga mamau puti naga euga m̃elu dua ki Roma pano: go e umai punusi ra; 3go nalakena nae go nara eu pei mataisau sikai maau, e doko sikoti ra doko, go eu do posiwosi nalakena eu pei tea mari tap̃aup̃au ki naveimataisauana. 4Go e pasa piseiki pululu ekopu ni nasum̃a ni nasaisaiana sara sabbath, po pasa die tea ni Yudea go tea ni Hellas naga euga saralomau.

5Ma ragi waina Sila go Timotheo ero pae Masedonia siwo umai, Paulo e pei tea vuasokiana ki navasaana, e do noa sokisoki kasua paki tea ni Yudea naga Yesu e pei Kristo. 6Go ragi waina eu dugoro, po pasa sa ki, e meseura ki sugoro aneana maga po noa paki da, Nadamu ega toko nap̃aumu; kinau a dautau: aga wo pa punusi tea ni nalauna p̃ota maga pae ragi waia pa pa pa. 7Go e m̃elu dua ki tokora wanogoe pano, po paki ekopu ni nasum̃a ki naatam̃oli sikai nagisana Tito Yusto, tea lotu ki Sup̃e, waina nasum̃a aneana e dip̃a sokari nasum̃a ni nasaisaiana. 8Go Krispo, tea maraki ni nasum̃a ni nasaisaiana, e saralomau Nawota nara ma nasum̃a mamau aneana; go naka ni Korintho tea laapa kakada eu dogo po saralomau, po pei tea bapetisoana. 9Go Nawota e noa ki Paulo pae navunusiana sikai p̃ogi, e naga, P̃a ta mataku mau, ma p̃a to pasa, po da punuta mau: nalakena kinau a sikoti ko doko, 10go te naata sikai ega wo da lawodu dip̃a ko naga ega mari sa ki‐go mau: nalakena a peani narei warua natokoana waia. 11Go e doko asa natau sikai go atelagi latesa, e do pasa piseiki navasaana ki Sup̃e m̃aleoputo kakada.

12Ma ragi waina Callio e pei tea maramara ni Akaia, tea ni Yudea eu duleana sava paraki Paulo nap̃op̃oda sikai maau asa, po piragi a umai paki malo tasake ni navasap̃otaeana, po naga, 13Naatam̃oli waia e pasa die naatam̃oli maga naga euga lotu ki Sup̃e ega va pele nawotaeana. 14Ma ragi waina Paulo e naga ega vasa, Callio e noa ki tea ni Yudea maga, e naga, E pe vei te namarisakiana kite te nasigisigileoana, tea ni Yudea maga, e pe wia naga aga soki mu: 15ma e pe vei navusuusuana maga nalo ni navasaana go ni nagisa maga go ni nawotaeana animu, kuga tum̃amu punusi a; kinau a da masauna mau naga aga vei tea vasap̃otae sikai ni tea maga wanogoe. 16Go e kopasi ra eu m̃elu dua ki malo tasake ni navasap̃otaeana pano. 17Go eu mamau puti pua soki Sosthene, tea maraki ni nasum̃a ni nasaisaiana, po p̃okawokati a narae ni malo tasake ni navasap̃otaeana. Go Callio e dodop̃arop̃aro ki tea maga wanogoe.

18Go Paulo, ragi waina e moro doko sua naaleatia laapa, e pasa dule ki taigida maga, po porau paki Siria pano go Priskilla go Akula ero sikoti a pano; e alati naloluna Kegekerea: nalakena e peani nasaiana sikai. 19Go eu rumai paki Efeso, go e doropusi ra ero doko tokora wanogoe; ma nae e paki ekopu ni nasum̃a ni nasaisaiana, po pasa piseiki pululu ki tea ni Yudea. 20Go ragi waina eu pavarani a naga ega toko ragi varau sikai, e da suasua asa mau; 21ma ragi waina e pasa dule ki sua ra, po naga, Sup̃e e pe suasua, a pe wo moro liliu umai punusi mu, e porau pae Efeso pano. 22Go ragi waina e paki euta Kaisarea, e sake po pasa dodomi ekalesia, po siwo paki Antiokia pano. 23Go ragi waina e doko sua ragi sikai asa, e m̃elu pano, po surata duaduru lawolawo ki navanua ni Calatia go Ferucia, e do mari tea vasapiseikiana maga eu kasua puti.

24Go naatam̃oli ni Yudea sikai nagisana Apollo, tea ni Alexandria pae namatarau aneana, naatam̃oli vasa p̃ia sikai, e umai paki Efeso; go e atae p̃arua ki navasaana midiriana maga. 25Naatam̃oli wanogoe e pei tea vasapiseikiana napua ki Nawota; go nalakena e pei tea suisui ki naatana, e pasa po pasa piseiki paratiki tea maga nalo ni Yesu, e atae nabapetisoana ki Yoane sikina: 26go e atulake navasa‐piviari‐ana ekopu ni nasum̃a ni nasaisaiana. Ma ragi waina Priskilla go Akula ero dogo e ero piragi a punusi ra, po pasa lawolawo ki paratiki napua ki Sup̃e paki nia. 27Go ragi waina e masauna naga ega tuagoto paki Akaia pano, taigida maga eu silae a asa, po midiri paki tea vasapiseikiana maga naga euga viragi soki a: go ragi waina e umai, e silae p̃arua ki tea maga waina eu saralomau sua pae nasaup̃iaana: 28nalakena e pasa piseiki pululu ki doa kasua ki tea ni Yudea maga lina, e do pasa piseiki saisai ki nia pae navasaana midiriana maga naga Yesu e pei Kristo.

Currently Selected:

APOSTOLO MAGA 18: NTB

Highlight

Copy