APOSTOLO MAGA 17

1Go ragi waina ero surata duaduru sua Amfipolis go Apollonia, ero umai paki Thessalonika, waina nasum̃a ni nasaisaiana sikai ki tea ni Yudea e doko asa: 2go Paulo e paki ekopu punusi ra, pae natomariana aneana, go e do pululu ki da sabbath dolu pae navasaana midiriana maga, 3e do p̃olagati po do pasa nadi ki nia paki da, naga e one Kristo one naga ega sua navitinumateana, po moro duleana m̃elu dua ki tea mate maga; go naga Yesu waia, waina kinau a dogorogo ki nia paki mu, e pei Kristo. 4Go seara kakada eu saralomau, po puluti Paulo go Sila; nara ma tea ni Hellas waina eu pei tea lotu p̃ia taua warua kakada sikai, go nagoroi vea maga tea ta pisa mau kakada mau. 5Ma tea ni Yudea maga eu dogo naroitoiana, go eu piragi naatam̃oli sigisigileo seara ni tea toko m̃oli maga, po saisai ki taua sikai po mari natokoana e p̃arai: go eu rumai paki nasum̃a ki Yason, po laaga naga euga viragi ra dave punusi narei. 6Go ragi waina eu da pap̃ai ra mau, eu dosagi Yason go taigida seara pano paki narae ni tea maraki maga ni natokoana, eu pioso, naga Nara waina eu mari maramana e dap̃olosiwo eu po umai paki nea; 7waina Yason e po piragi ra: go nara mamau puti eu do mari panop̃ota ki natawonakiana maga ki Kaisar, eu noa naga nawota p̃ota sikai e doko, Yesu. 8Go eu mari taua ni naatam̃oli maga go tea maraki maga ni natokoana eu m̃anaunau, ragi waina eu dogo tea maga wanogoe. 9Go ragi waina eu dape navituakorokoroana ki Yason go ki tea p̃ota maga, eu suasua ki da naga euga vano.

10Go taigida maga eu m̃araverave dip̃aki lua Paulo go Sila p̃ogi paki Beria pano: go ragi waina ero umai paki asa ero paki ekopu ni nasum̃a ni nasaisaiana ki tea ni Yudea. 11Go nara eu p̃ia liu tea maga waina eu doko Thessalonika, nalakena eu dape navasaana pilake sara nap̃op̃osuasuaana, eu do peve usiusi navasaana midiriana maga sara naaleatia, tea maga wanogoe eu pe tapala nogoe kite? 12Nalakena tea wanogoe tea laapa kakada eu saralomau; nara ma nagoroi dodomadaganiana maga ni Hellas, go naanoai maga, tea ta pisa mau kakada mau. 13Ma ragi waina tea ni Yudea ni Thessalonika eu atae naga navasaana ki Sup̃e e moro pei tea rogorogokiana pae Paulo Beria, eu moro umai paki asa, po mari taua maga ni naatam̃oli maga eu pari po m̃anaunau. 14Go ragi wanogoe taigida maga eu dip̃aki lua Paulo m̃araverave naga ega surata pano pa pa paki elau: go Sila go Timotheo ero ko doko Beria doko. 15Ma tea maga waina eu pitana ki Paulo eu piragi a pano pa pa paki Athens: go ragi waina eu dape sua natip̃akiana sikai paki Sila go Timotheo naga eroga umai punusi a m̃araverave sa, eu pano.

16Go ragi waina Paulo e do leogoro ra Athens, naatana e pei tea vakaliana nap̃alauna, nalakena e punusi natokoana e pura ki idolo maga. 17Go e pululu ki tea ni Yudea go ki tea lotu p̃ia maga ekopu ni nasum̃a ni nasaisaiana, go ki tea maga waina eu sua e malo ni navakokotoana sara naaleatia. 18Go tea dodomi namanumatuaana seara ni tea maga waina eu sarausi Epikuro go ni Stoiko maga eu pululu ki nia. Go te seara eu naga, Tea vasa p̃alo waia e masauna naga ega noa nasava? Go te seara eu naga, E alagoro pei tea rogorogo ki sup̃e p̃ota maga: nalakena e do dogorogo ki Yesu go namoroduleanaana. 19Go eu puati a, po piragi a paki Areopaco, po naga, Au mariatae atae navasapiseikiana vau waia, waina ku pasa asa kite? 20Nalakena ku dape tea vanop̃ota seara umai paki nadaligagami: go au masauna naga auga atae tea maga wanogoe eu pei nasava? 21(Go naka ni Athens mamau puti go tea ni navanua p̃ota maga waina eu m̃enaki‐atatoko asa eu do noa kite eu do dogo te navatuna vau sikai ragi ni natokom̃oliana adeada, eu da mari tea p̃ota asa mau.) 22Ma Paulo e lawodu m̃aleoputo ni Areopaco, po naga.

Naatam̃oli maga ni Athens a punusi naga ku matauki p̃arua ki sup̃e maga nalo ni naleo maga mamau puti. 23Nalakena ragi waina a surata duaduru, po punusi tea lotukiana animu maga, a pap̃ai tagura ni naviriana sikai waina namidiriana waia e doko asa, AGI SUP̃E SALUP̃EANA. Tea waina ku salup̃e a po lotu ki nia, tea wanogoe kinau a dogorogo ki nia paki mu. 24Sup̃e waina e mari maramana go tea maga mamau puti waina eu doko asa, nae, waina e pei Nawota ni nakoroatelagi go maramana, e da doko nasum̃a tapu maga waina eu pei tea mariana ki nam̃elearu maga mau; 25go e da pei tea suasuakiana pae nam̃elearu ni naatam̃oli maga mau, dapala e pe tika ki te navatuna, nae e do dua tea maga mamau puti namauriana, go nameroda, go naleo maga mamau puti; 26go e mari sara nalauna ni naatam̃oli maga ni nada sikai maau eu doko narae ni maramana mamau, e dawona ki sua ragi tawonakiana adeada maga, go kokoi maga ni natokoana adeada maga; 27naga euga laaga Sup̃e, mase eu pe totodogo asa, po pap̃ai a, go e da madu uvea ki te naata sikai kakagida mau: nalakena tu mauri asa, 28po parivari asa, po pei natea asa; dakiusi waina aurea animu maga seara kakada eu noa e, eu naga, Nalakena tu pei naworaworana. 29Go nalakena tu pei naworawora ni Sup̃e, e one gida one naga tuga ta midoaki nia naga Sup̃e e dakiusi kold, kite silver, kite vatu, waina e pei tea taeana ki namataisauana go ki namidoakip̃aiana ki naatam̃oli. 30Go ragi maga ni nasalup̃eana Sup̃e e leo kalau ra; ma ragi waia e dip̃a ki naatam̃oli maga ni sara tokora naga euga mamau puti midoaki doa: 31nalakena e lawo ki naaleatia sikai, waina ega wo pasa p̃otae maramana asa pae namarinaleoleanaana pae naatam̃oli waina e dawona ki nia; go e magi tea maga mamau puti pitua ki nasaralomauana kakana, e sike a e duleana m̃elu dua ki tea mate maga.

32Go ragi waina eu dogo namoroduleanaana ni tea mate maga, te seara eu mari saudoa; ma tea p̃ota seara eu naga, Auga wo moro dogo ko nalo ni tea wanogoe te ragi. 33Dapala nogoe Paulo e pa dua ki m̃aleoputo kakada pano. 34Ma naatam̃oli seara eu puluti a, po saralomau: sikai kakada e pei Dionisio tea ni Areopaco, go nagoroi sikai nagisana Damari, nara ma tea p̃ota seara eu mamau.

Currently Selected:

APOSTOLO MAGA 17: NTB

Highlight

Copy