APOSTOLO MAGA 16

1Go e moro umai paki Derbe go Listra; go kuga leo, tea vasapiseikiana sikai e doko asa, nagisana Timotheo, natu ni nagoroi ni Yudea sikai waina e saralomau; ma tamana e pei tea ni Hellas. 2Go nae e pei tea noasokisokiana pae taigida maga waina eu doko Listra go Ikonio. 3Go Paulo e masauna naga nae ega sikoti a pano; go e puati a po dovadavivi asa nalakena naka ni Yudea maga waina eu doko tokora maga wanogoe: nalakena eu mamau puti atae naga tamana e pei tea ni Hellas. 4Go ragi waina eu do surata duaduru natokoana maga, eu pitua ki natawonakiana maga paki da naga euga vavaigoro ra, waina eu pei tea vasadawonakiana pae apostolo maga go tea matua maga waina eu doko Yerusalem. 5Nalakena tea wanogoe ekalesia maga eu pei tea mariana eu kasua ki nasaralomauana, go eu disu ki nalaapaana sara naaleatia.

6Go eu surata duaduru navanua ni Ferucia go ni Calatia, eu pei tea tip̃agoroana pae Naatana Tapu naga euga ta pasa navasaana Asia mau; 7go ragi waina eu rumai paki nadigi ni Misia eu maridogo naga euga vaki Bithinia; go Naata ni Yesu e da suasua ki da asa mau; 8go eu surata liu Misia, po siwo umai paki Troas. 9Go navunusiana sikai e pakilina ki Paulo p̃ogi; Naatam̃oli ni Masedonia sikai e lawodu, po pavarani a, po naga, P̃a tuagoto umai paki Masedonia, po silae gami. 10Go ragi waina e punusi sua navunusiana wanogoe, au m̃araverave laaga naga auga vaki Masedonia pano, au midoaki saisai ki nia naga Sup̃e e soso gami naga auga rogorogo ki narogorogoana wia paki da.

11Nalakena tea wanogoe au porau pae Troas, po sava leana paki Samothrake, go matamai ki nia au paki Neapolis; 12go au pae tokora wanogoe po paki Filippi, waina e pei natokoana sikai ni Masedonia, tea vea ni navanua wanogoe, go kolonia ni Roma sikai: go au doko natokoana wanogoe naaleatia seara. 13Go naaleatia ni sabbath au paki etaku ni namata‐pua paki nadigi ni nap̃ap̃a ni noai sara sikai, waina au midoaki nia naga tokora ni natapasavasaana sikai e doko asa; go au do natano, po pasa ki nagoroi maga waina eu saisai asa. 14Go nagoroi sikai nagisana Lidia, tea sori tea miala kesakesa, ni natokoana ni Tuateira, tea lotu ki Sup̃e, e dogo gami: waina Nawota e p̃olagati nap̃op̃ona, naga ega rogo parati ki tea maga waina e pei tea vasaana pae Paulo. 15Go ragi waina e pei tea bapetisoana, nara ma tea ni nasum̃a aneana maga, e pavarani gami, po naga, Ku pe midoaki p̃otae au naga a saralomau Nawota, kuga umai paki ekopu ni nasum̃a aginau, po doko asa doko. Go e pasa die gami asa.

16Go e pakilina, ragi waina au do surata paki tokora ni natapasavasaana, naga nagoroi atara sikai, waina e peani naatana ni navasapuaana sikai, e sua gami, waina e do pasapua po magi talakeana maga piragi nataluaana warua asa. 17Nae e dausi gami ma Paulo po pioso, po naga. Naatam̃oli maga waia eu pei tea suasua maga ki Sup̃e Vakilagi Mau, waina eu dogorogo ki napua ni namautipauriana paki mu. 18Go e mari tea wanogoe naaleatia laapa. Ma Paulo, waina nap̃op̃ona e dogo kite sa asa, e dum̃ana doa e po noa ki naatana wanogoe, e naga, A dip̃a ki‐go pae nagisa ni Yesu Kristo naga p̃a tave umai m̃elu dua ki nia pano. Go e dave umai aura sikai maau wanogoe.

19Ma ragi waina talakeana maga eu punusi naga naleogoroana ni nataluaana adeada e dave pano, eu pua soki Paulo go Sila, po dosagi ra paki malo ni navakokotoana paki narae ni tea maraki maga, 20go ragi waina eu piragi sua ra pano punusi tea vasa p̃otae maga, eu naga, Naatam̃oli maga waia, waina ero pei tea ni Yudea, ero mari natokoana anigida e pari p̃arua, 21po dogorogo ki natomariana maga waina e da p̃ia naga nigida waina tu pei tea ni Roma tuga tape ra, po mari ra mau. 22Go taua ni naatam̃oli maga eu mamau duleana dip̃a ra: go tea maraki maga eu pua p̃orae lua sugoro adeada maga, po pitip̃aki naga euga varati ra ki nakau varati maga. 23Go ragi waina eu dua sua ra nawokatiana laapa, eu nadi ki da paki ekopu ni nasum̃a ni navavaiana, po dip̃a ki tea vavai ni nasum̃a ni nasolisoliana naga ega vavaigoro kasua ki da: 24go nae, waina e dape natip̃akiana dapala nogoe, e nadi ki da paki ekopu ni nasum̃a ni navavaiana em̃ago tukituki, po mari soki nam̃eleda nakau. 25Ma p̃ogi matua Paulo go Sila ero do dapasavasa po do lega ki Sup̃e nalegaana maga, go tea soliana maga eu do daki dorogo ra; 26go naruru warua sikai e pakilina m̃araverave, dapala laketano maga ni nasum̃a ni nasolisoliana eu pei tea varivariakiana: go namata maga mamau puti eu pei tea wolagatiana m̃araverave; go natali solisoli maga ni sara naata eu maruarua. 27Go tea vavai ni nasum̃a ni nasolisoliana e darapa m̃elu dua ki namaturuana, po punusi namata maga ni nasum̃a ni navavaiana eu dap̃olaga doko, go e sai lua lova aneana, po naga ega tum̃ana mari punue a, e midoaki nia naga tea soliana maga eu sava pano. 28Ma Paulo e pioso ki nadaleo kasua sikai, po naga, P̃a ta dum̃am̃a mari sa ki‐go mau: nalakena au mamau puti doko nea. 29Go e pioso datago nasulu maga, po sokamidi paki ekopu, go e duruuru ki namatakuana, po dowo paki natano narae ni Paulo go Sila, 30po piragi ra dave, po naga, Nawota maga, nasava e one au one naga aga mari a naga aga vei tea mautipauriana? 31Go ero naga, P̃a saralomau Nawota Yesu, go p̃a wo pei tea mautipauriana, nimu ma nasum̃a anigo. 32Go ero pasa ki nia navasaana ki Nawota, ero pasa ki tea maga mamau puti asa waina eu doko nasum̃a aneana. 33Go e piragi lua ra aura sikai maau wanogoe ni nap̃ogiana, po sarue wotu ni nawokatiana kakada maga; po pei tea bapetisoana, nara ma tea maga mamau puti aneana, m̃araverave. 34Go e piragi ra sake paki ekopu ni nasum̃a aneana, po doropusi navinaga naraeda, po laelaea p̃arua, nara ma tea maga mamau puti ni nasum̃a aneana, eu saralomau Sup̃e.

35Go ragi waina e pei aleati, tea maraki maga eu dip̃aki lua tea varati maga, po naga, P̃a suasua ki naatam̃oli maga waina naga eroga vano. 36Go tea vavai ni nasum̃a ni nasolisoliana e dogorogo ki navasaana wanogoe paki Paulo, e naga, Tea maraki maga eu po dip̃aki lua umai naga aga suasua ki mu naga koroga vano: nalakena tea wanogoe koroga tave umai ragi waia, po surata pano doko natam̃ateana. 37Ma Paulo e noa ki da, e naga, Eu parati gami lina, waina aro da pei tea tip̃akotoviana mau, go waina aro pei naatam̃oli maga waina aro pei tea ni Roma, go eu nadi ki gami paki ekopu ni nasum̃a ni navavaiana; go ragi waia euga nadi ki panako gami paki katama kite? Ega ta dapala nogoe mau; ma euga tum̃ada umai po piragi gami paki katama. 38Go tea varati maga eu dogorogo ki navasaana maga wanogoe paki tea maraki maga: go eu mataku, ragi waina eu dogo naga ero pei tea ni Roma; 39go eu rumai po pavarani ra; go ragi waina eu piragi sua ra paki katama, eu pasa parati ki da naga eroga m̃elu dua ki natokoana pano. 40Go ero dave nasum̃a ni navavaiana po paki ekopu ni nasum̃a ki Lidia: go ragi waina ero punusi taigida maga, ero pasa pakavakale ra, po surata pano.

Currently Selected:

APOSTOLO MAGA 16: NTB

Highlight

Copy