APOSTOLO MAGA 15

1Go te naatam̃oli seara eu pae Yudea siwo umai po pasa piseiki taigida maga, po naga, Ku pe ta pei tea tovadaviviana mau dapala natomariana ki Moses, ku pe mari sa pei tea mautipauriana. 2Go ragi waina Paulo go Barnaba ero peani sua navululuana go navusuusuana paki da e da kiki mau, taigida maga eu dawonaki naga Paulo go Barnaba, go tea p̃ota seara kakada, euga sake paki Yerusalem pano punusi apostolo maga go tea matua maga nalo ni navusuusuana wanogoe. 3Nalakena tea wanogoe nara, waina eu pei tea vusivusiana pae ekalesia pano, eu surata duaduru Foinike go Samaria, eu do dogorogo ki namaradoaana ki tea ni nalauna p̃ota maga: go eu mari taigida maga mamau puti eu laelaea p̃arua. 4Go ragi waina eu rumai paki Yerusalem, eu pei tea viragiana pae ekalesia go apostolo maga go tea matua maga, go eu dogorogo ki naleo maga waina Sup̃e e mari ra sikoti ra. 5Ma te seara ni tagona ni Farisi maga waina eu saralomau eu duleana, po naga, E one ara one naga euga tovadavivi ara, po dip̃aki da naga euga rogo paratiki nawotaeana ki Moses.

6Go apostolo maga go tea matua maga eu pei tea saisaikiana naga euga midoaki usiusi nalo ni naleo wanogoe. 7Go ragi waina navusuusuana warua e doko sua, Petero e duleana, po noa ki da, e naga.

Taigu maga, nimu ku atae naga tuai Sup̃e e matadoa m̃aleoputo kakamu, naga tea ni nalauna p̃ota maga euga rogo navasaana ni narogorogoana wia pae nawokagu, po saralomau. 8Go Sup̃e, waina e atae nap̃op̃o ni naatam̃oli, e madeada noasokisoki, e dua ra Naatana Tapu, dakiusi waina e dua gida asa; 9go e da mari p̃otae gida go nara mau, e mari nap̃op̃oda maga eu dautau ki nasaralomauana. 10Nalakena tea wanogoe ekasana ku mari dogo Sup̃e ragi waia, naga kuga toropusi nakau ni nanoa sikai ega one nanoa ni tea vasapiseikiana maga, waina tamagida maga go nigida tu mari sa ova e? 11Ma tu saralomau naga tuga wo pei tea mautipauriana pae nasaup̃iaana ki Nawota Yesu, dakiusi waina nara eu pei tea mautipauriana.

12Go taua mamau ni naatam̃oli maga eu punuta; go eu dakidorogo Barnaba go Paulo ero dogorogo ki navaivaiana maga go ki tea ni namagaana maga waina Sup̃e e mari ra pae ara m̃aleoputo ni tea ni nalauna p̃ota maga. 13Go edaku ki nara ero punuta, Yakobo e pasa dara, po naga.

14Taigu maga, kuga takidorogo au: Simeon e po dogorogo ki dapala waina Sup̃e e pea umai punusi tea ni nalauna p̃ota maga, naga ega viragi te seara kakada euga magi nagisana pei narei sikai. 15Go navasaana ki profeta maga e dapala tea wanogoe; dakiusi waina e pei tea midiriana, e naga,

16Edaku ki tea maga wanogoe aga wo liliu umai,

Go aga wo moro davagi tap̃aup̃au ki David, waina e dowo;

Go aga wo moro davagi tea sapuraki one kakana maga,

Go aga wo sike a:

17Naga tea toropusiana ni naatam̃oli maga waina eu madoko euga laaga Yehovah,

Go tea ni nalauna p̃ota maga mamau puti, waina eu pei tea sosoana ki nagisagu,

18Yehovah e noa e, waina e mari tea maga wanogoe eu pei tea ataeana pae ragi vea ni maramana pa pa pa.

19Nalakena tea wanogoe kinau a midoaki p̃otae, naga tuga ta mari navitinuana paki tea ni nalauna p̃ota maga waina eu do maradoa paki Sup̃e; 20ma naga tuga midiri paki da, naga euga atutaku ki tea loa ni idolo maga, go ki namaripeleana, go ki tea solipunueana, go ki nada. 21Nalakena Moses e peani te seara sara natokoana waina eu dogorogo ki nia pae tagona tuai maga pa pa, e pei tea veveana ekopu ni nasum̃a ni nasaisaiana maga sara sabbath.

22Ragi wanogoe apostolo maga go tea matua maga, nara ma ekalesia mamau, eu midoaki nia naga e p̃ia naga euga matadoa naatam̃oli dua kakada, po dip̃aki lua ra paki Antiokia eroga sikoti Paulo go Barnaba pano; ero pei Yuda waina e pei tea sosoana ki Barsaba, go Sila, naatam̃oli maraki maga m̃aleoputo ni taigida maga: 23go eu midiri pae nam̃elearuda dapala waia, Apostolo maga go tea matua taimu maga au noa ki taigami ni nalauna p̃ota maga waina ku doko Antiokia go Siria go Kilikia, au naga, Kuga laelaea: 24Nalakena au dogo naga te seara waina eu m̃elu gami pano eu mari mu ku dogo kite sa ki navasaana maga, po mari sa ki naatamu; waina au da dip̃a ki da asa mau; 25kinami au midoaki nia naga e p̃ia, go nap̃op̃ogami e sikai maau asa, naga auga matadoa naatam̃oli dua po dip̃aki lua ra paloti punusi mu eroga sikoti tea dodomiana aginami Barnaba go Paulo, 26naatam̃oli waina ero pitua ki namauriana adeada nalakena nagisa ni Nawota anigida Yesu Kristo. 27Nalakena tea wanogoe au po dip̃aki lua Yuda go Sila paloti, go nara eroga wo dogorogo paki mu pae nawokada ki tea sikai maau maga waia. 28Nalakena Naatana Tapu, go kinami, au midoa ki nia naga e p̃ia, naga auga ta doropusi ega ta one mu mau tea waina e madaga liu tea wia maga waia: 29naga kuga atutaku ki tea maga waina eu pei naviriana paki idolo maga, go ki nada, go ki tea solipunueana maga, go ki namaripeleana; ku pe tum̃amu mauti mu ki tea maga wanogoe ku pe mari p̃ia. Kuga rogo kite p̃ia.

30Nalakena tea wanogoe, ragi waina eu pei tea tip̃akiluaana, eu siwo umai paki Antiokia; go ragi waina eu saisai ki sua taua ni naatam̃oli maga, eu pitua ki tusi wanogoe. 31Go ragi waina eu peve sua e, eu laelaea nalakena navasapakavakaleana wanogoe. 32Go Yuda go Sila, waina nara ma ero pei profeta, ero pasa parati ki taigida maga ki navasaana laapa, po lawo soki ra. 33Go ragi waina ero doko sua pa pa te ragi, ero pei tea tip̃akiluana pilake natam̃ateana m̃elu dua ki taigida maga naga eroga va punusi tea maga waina eu dautau ra pano. 34Ma Paulo go Barnaba ero doko Antiokia doko, ero do pasa piseiki po do dogorogo ki navasaana wia ki Nawota, nara ma tea p̃ota laapa.

35Go edaku ki naaleatia seara Paulo e noa ki Barnaba, e naga, Toroga liliu ragi waia po pa punusi taigida maga waina eu doko sara natokoana waina toro dogorogo ki navasaana ki Nawota ara, eu dapale sava? 36Go Barnaba e midoa ki nia naga eroga moro piragi Yoane, waina e pei tea sosoana ki Marko ega sikoti ra pano. 37Ma Paulo e midoa ki nia naga e da p̃ia mau naga eroga viragi a ega sikoti ra pano waina e m̃elu dua ki da pae Pamfilia pano, po da sikoti ra paki nawosiana mau. 38Go navululuana makali sikai e pakilina, dapala ero pamawota, go Barnaba e piragi lua Marko, po porau paki Kupero pano; 39Go navuluana makali sikai e pakilina, dapala ero pamawota go Barnaba e piragi lua Marko,po porau paki Kupero pano 40Ma Paulo e matadoa Sila, e melu navasaana pae tea saralomau naga naloparatikiana ni nadodomiana ki Yehovah 41Go e surata duaduru Siria go Kilikia, e do lawo soki ekalesia maga.

Currently Selected:

APOSTOLO MAGA 15: NTB

Highlight

Copy