PAKI TEA NI KORINTHO 9
9
1Nalakena nalo ni nasuasuaana paki tea tautau maga, naga aga midiri paki mu asa e pei tea warua liu tea waina e patakana: 2nalakena a atae nap̃op̃osuasuaana animu, waina a do pakavakae asa nalo kakamu paki tea ni Masedonia maga, naga Akaia e pei tea marim̃ata‐ki‐sua‐ana pae natau waina e pano; go nasuisuiana animu e pulevule tea laapa kakada. 3Ma a dip̃aki lua taigida maga paloti, naga navakavakaeana aginami nalo kakamu ega ta pei tea mariana ega vei tea p̃alo mau nalo ni naleo wanogoe; naga, ega tapala waina a noa sua e, kuga vei tea mari‐m̃atakisua‐ana: 4mase te seara ni Masedonia eu pe sikoti au paloti, po pap̃ai mu ku pe ta pei tea mari‐m̃ataki‐sua‐ana mau, kinami, (naga auga ta noa mu mau), au pe vei tea mariana au pe maliere nalo ni navavatuana wanogoe. 5Nalakena tea wanogoe a midoa ki nia naga e one au one naga aga vavarani taigida maga, naga euga vea paloti punusi mu, po pea mari navasap̃iakiana animu ega soko waina e pei tea saiana sala vea, naga tea sikai maau wanogoe ega vei tea marim̃ataki‐sua‐ana, ega tapala navasap̃iakiana sikai, go ega ta dapala namatam̃aguraana mau.
6Ma a noa tea waia, Tea waina e sapuraki pae namatagoroana ega wo dagaukotovi pae namatagoroana; go tea waina e sapuraki pae navasap̃iakiana maga ega wo dagaukotovi pae navasap̃iakiana maga. 7Sara naatam̃oli euga sikasikai mari ega tapala waina eu midoaki nia nap̃op̃oda, ega ta pae nasusueana, kite pae navasadieana mau: nalakena Sup̃e e dodomi tea vitua laelaea. 8Go Sup̃e e mari atae mari sara nasaup̃iaana euga laapa liu paki mu; naga, ragi waina kuga veani sara nasokoana sara ragi nalo ni sara naleo, kuga veani tea warua liu paki sara nawosiana wia: 9dapala waina e pei tea midiriana,
E daperavera, e dua tea tika maga;
Namarinaleoleanaana aneana e du mau du.
10Go tea waina e do pitua ki napati ni nawa ni nakau paki tea sapuraki go ki navinaga kaniana, ega wo pitua ki napati ni nawa ni nakau sapurakiana animu po mari a ega laapa, go ega wo mari nawa maga ni namarinaleoleanaana animu ega risu po laapa: 11kuga wo pei tea mariana kuga vei sogolapa nalo ni sara naleo paki sara navitua‐p̃arua‐ana, waina e do p̃osiwosi pae gami ki navasadodom̃atakiana paki Sup̃e. 12Nalakena nasuasuaana ni nawosiana wanogoe e do pakavuro natikaana maga ki tea tautau maga e da sikina mau, ma e pura sarasaraape pae navasadodom̃atakiana laapa paki Sup̃e; 13eu do samasamani Sup̃e pae namaridogoana ni nasuasuaana wanogoe nalakena natokoetanoana ni nanoasaiana animu paki narogorogoana wia ki Kristo, go nalakena naveilomauna ni naturipituaana animu paki da go paki tea maga mamau puti; 14go nara, ki namanimu‐pavaraana adeada, eu do dodomi p̃arua ki mu nalakena nasaup̃iaana ki Sup̃e waina e p̃arua liu paki mu. 15Navasadodom̃atakiana ega vei agi Sup̃e nalakena navituam̃olikiana aneana waina e mari sa pei tea rogorogokiana.
Currently Selected:
PAKI TEA NI KORINTHO 9: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
