PAKI TEA NI KORINTHO 8
8
1Ma au mari mu kuga atae, tai maga, nasaup̃iaana ki Sup̃e waina e pei tea vituakiana paki ekalesia maga ni Masedonia; 2naga ragi waina eu doko namaridogoana warua ni nariesokiana, nawarua‐liuana ni nalaelaeaana adeada go natikaana sa adeada ero p̃arua liu paki nasogolapaana ni navituap̃aruaana adeada. 3Nalakena pae nakasuaana adeada, a noa sokisoki a, go p̃arua liu nakasuaana adeada, eu dum̃ada pitua, 4doko do pavarani gami ki navasaparatikiana warua nasaup̃iaana wanogoe go nasaisaipeaniana ni nasuasuakiana paki tea tautau maga: 5go e da dapala waina au leogoro asa mau, ma eu dum̃ada pitua ki da paki Nawota pea, go paki gami pae namasauana ki Sup̃e. 6Dapala waina au pasa paratiki Tito, naga dakiusi waina e pea atulake asa, ega mari sua ega tapala nogoe nasaup̃iaana wanogoe m̃aleoputo kakamu. 7Ma dapala waina ku pei tea veani p̃arua nalo ni sara naleo, nasaralomauana, go navasaana, go naataeana, go sara nam̃arekarekaana, go nadodomiana animu paki gami, kuga vunusi naga kuga vei tea veani p̃arua nalo ni nasaup̃iaana wanogoe. 8A da noa e pae natip̃akiana mau, ma a maridogo pae nam̃arekarekaana ki tea p̃ota maga naveilomauana ni nadodomiana animu. 9Nalakena ku atae nasaup̃iaana ki Nawota anigida Yesu Kristo, naga, ragi waina e pei sogolapa e dum̃ana mari a e pei tea tika nalakena nimu, naga nimu kuga vei sogolapa ki natikaana aneana. 10Go a pitua ki namidoakip̃otaeana aginau nalo ni tea wanogoe: nalakena tea wanogoe e p̃ia ki mu, waina ku pei tea waina ku pea atulake, namariana e da masikina mau, ma ku atulake namasauana pae natau waina e pano. 11Ma ragi waia kuga mari sua namariana; naga dakiusi waina nap̃op̃osuasuaana ni namasauana e doko, namarisuaana ma ega tapala nogoe doko pae tea waina ku peani a. 12Nalakena nap̃op̃osuasuaana e pe toko, e pe vei tea tapem̃atakiana ega vae tea waina te naata e peani a, go ega ta pae tea waina e da peani a mau. 13Nalakena a da noa naga tea p̃ota maga euga veani namaromaroana, go nimu nariesokiana mau: ma ega vae navatakasikaiana; 14ragi waia nasogolapaana animu ega vaki natikaana adeada, naga nasogolapaana adeada ma ega vaki natikaana animu; naga navatakasikaiana ega toko: 15ega tapala waina e pei tea midiriana, Tea waina e piladaua ki tea warua e dika ki tea tu pele; go tea waina e piladaua ki tea kiki e da dika mau.
16Ma navasadodom̃atakiana ega vei agi Sup̃e, waina e pitua ki nam̃arekarekaana sikai maau wanogoe e manimu doko nap̃op̃o ni Tito. 17Nalakena e dape soki lomau ki navasaparatikiana aginami; ma e m̃arekareka p̃arua po dum̃ana m̃elu pano paloti punusi mu. 18Go au dip̃aki lua sikoti a taigida waina nasamasamani‐a‐ana nalo ni narogorogoana wia e doko usuraki ekalesia maga mamau puti; 19go tea wanogoe e da sikina mau, ma e pei tea matadoaana pae ekalesia maga naga ega surata sikoti gami nalo ni nasaup̃iaana wanogoe, waina e pei tea suasuakiana pae gami paki nasamasamaana ki Nawota go nap̃op̃osuasuaana aginami: 20doko do daleledao ki tea waia, naga te naata sikai ega ta pasa dip̃a gami mau nalo ni navitua‐p̃arua‐ana wanogoe waina e pei tea suasuakiana pae gami: 21nalakena au pea midoaki naleo dodomadaganiana maga e da doko namata ni Nawota sikina mau, ma e doko namata ni naatam̃oli maga. 22Go au dip̃aki lua sikoti ra taigida, waina au paka laapa maridogo e naga e m̃arekareka nalo ni naleo laapa, ma ragi waia e m̃arekareka p̃arua liu, nalakena navavatuana warua waina e peani a paki mu. 23Eu pe vusuusu nalo ni Tito, e pei tea waina aro saisaipeani go tea wosiwosi sikoti au paki mu; kite nalo ni taigida maga ero pei tea tautauana maga ki ekalesia maga, ero pei nasamasamaana ki Kristo. 24Nalakena tea wanogoe kuga viseiki da narae ni ekalesia maga naviseikiana ni nadodomiana animu, go ni navakavakaeana aginami nalo kakamu.
Currently Selected:
PAKI TEA NI KORINTHO 8: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
