PAKI TEA NI KORINTHO 7
7
1Nalakena tea wanogoe waina tu peani nasaiana maga wanogoe, tea dodomiana maga, tuga tum̃agida mari gida tuga tautau m̃elu dua ki sara naloaana ni nap̃okasigida go ni naatagida, doko do mari sua natautauana doko namatau‐ki‐Sup̃eana.
2Kuga maginami p̃olagati nap̃op̃omu maga: au da mari dagelegele paki te naata mau, au da mari sa ki te naata mau, au da m̃aukarolua te naata mau. 3A da noa e raki natip̃akotovi‐mu‐ana mau: nalakena au pea noa sua, naga ku doko nap̃op̃ogami naga auga mate sikoti mu go naga auga mauri sikoti mu. 4Naviviariana aginau paki mu e p̃arua, navakavakaeana aginau nalo kakamu e p̃arua: a pei tea vakavuroana ki navakavakaleana, a pura sarasaraape ki nalaelaeaana doko nariesokiana mamau aginami.
5Go nalakena ragi waina au rumai paki Masedonia, nap̃okasigami e da peani te namaromaroana mau, ma au pei tea riesokiana pisarasara; namarimariana maga etaku ki gami, namatakuana maga nap̃alaugami. 6Ma tea waina e do pakavakale tea vakitano maga, Sup̃e, e pakavakale gami pae naumaiana ki Tito; 7go e da pae naumaiana aneana sikina mau, ma e pae navakavakaleana waina nae e pei tea vakavakaleana asa nalo kakamu, ragi waina e dogorogo paki gami ki namasau‐p̃arua‐ana animu, nalalagaarovaana animu, nasuisuiana animu maginau; dapala waina a laelaea p̃arua asa. 8Nalakena a pe mari mu ku susue ki epistole aginau, go a pe vea midoakidoa, ma ta da moro midoakidoa mau; nalakena a punusi naga epistole wanogoe e mari mu ku susue, e pe vei ragi kiki. 9Ragi waia a laelaea, a da laelaea nalakena ku pei tea mariana ku susue mau, ma nalakena ku pei tea mariana ku susue paki namidoakidoaana: nalakena ku pei tea mariana ku susue pae namasauana ki Sup̃e, naga kuga ta pei tea tapepuolikiana nalo ni te navatuna nalakena kinami mau. 10Nalakena nasusueana waina e pae namasauana ki Sup̃e e do p̃osiwosi ki namidoakidoaana paki namautipauriana, waina ega ta pei tea ni namidoakidoaana mau: ma nasusueana ni maramana e do p̃osiwosi ki namateana. 11Nalakena kuga leo, tea sikai maau wanogoe, waina ku pei tea mariana ku susue pae namasauana ki Sup̃e, e manimu p̃osiwosi ki nam̃arekarekaana warua pa, io, go navasakorokoroana warua pa, io, go namaetoana warua pa, io, go namatakuana warua pa, io, go namasauana warua pa, io, go nasuisuiana warua pa, io, go nasikosikoana warua pa! Nalo ni sara naleo ku dum̃amu mari mu ku doko lina naga ku dautau nalo ni naleo wanogoe. 12Nalakena tea wanogoe go a pe midiri paki mu, a da midiri nalakena naata waina e mari dagele mau, go a da midiri nalakena naata waina e pei tea maridagelekiana mau, ma a midiri nalakena tea waia, naga nam̃arekarekaana aginami manimu ega vei tea mariana ega toko lina paki mu namata ni Sup̃e. 13Nalakena tea waonogoe au pei tea vakavakaleana: ma ragi ni navakavakale‐gami‐ana au laelaea p̃arua liu nalakena nalaelaeaana ki Tito, nalakena naatana e pei tea vakamaromarokiana pae mu mamau puti. 14Nalakena a pe vakavakae te navatuna paki nia nalo kakamu, a pe ta pei tea mariana a pe maliere mau; ma dapala waina au pasa tea maga mamau puti paki mu pae nalomauana, dapala nogoe navakavakaeana aginami ma narae ni Tito e pei nalomauana. 15Go namaritadodomiana aneana paki mu e p̃arua liu, ragi waina e midoa ki narogoparatikiana animu maga mamau puti, dapala waina ku piragi soki a pilake namatakuana go naruruuruana. 16A laelaea nalakena a marasike nalo ni sara naleo nalo kakamu.
Currently Selected:
PAKI TEA NI KORINTHO 7: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
