PAKI TEA NI KORINTHO 4
4
1Nalakena tea wanogoe waina au peani nasuasuaana waia, dapala au pei tea dodomiana, au da pei tea p̃op̃otoro mau: 2ma au pasagoro naleo surukiana maga ni namaliereana, au da surata pae namarimanumatuaana mau, go au da pasa sorosoro ki navasaana ki Sup̃e mau; ma au dum̃agami pasap̃iakinoa gami ki namaridokolinaana ni nalomauana paki sara natum̃ada‐ataeana ni naatam̃oli maga namata ni Sup̃e. 3Ma narogorogoana wia aginami e pe vei tea kovagoroana, e pei tea kovagoroana nalo ni tea maga waina eu do mate puoli: 4waina sup̃e ni maramana waia e mari namidodoana maga ki tea maga waina eu da saralomau mau eu kesa, naga namarama ni narogorogoana wia ni nasamasamaana ki Kristo, waina e pei nunu ni Sup̃e, ega ta dola ara mau. 5Nalakena au da dum̃agami dogorogo ki gami mau, ma au dogorogo ki Kristo Yesu Nawota, go au dum̃agami dogorogo ki gami tea suasua animu maga nalakena Yesu. 6Nalakena e pei Sup̃e, waina e naga, Namarama ega wo maramalaga m̃elu dua ki namaligo, waina e maramalaga nap̃op̃ogida, naga ega vitua ki namarama ni naataeana ni nasamasamaana ni Sup̃e doko narae ni Yesu Kristo.
7Ma au peani naloriki tauakiana wia waia doko lasa maga ni naruku, naga nawarualiuana ni nakasuaana ega vei tea ni Sup̃e, go naga ega ta m̃elu gami mau; 8au pei tea riesokiana nalo ni sara naleo, ma au da pei tea riesokipulutiana mau; au midoakiputuaki, ma nap̃op̃ogami e da pelepele mau; 9au pei tea kopaleleana, ma au da pei tea toropusiana au madoko mau; au pei tea nadikiana pakitano, ma au da pei tea maripuolikiana mau; 10sara ragi au do dapetape pasara doko nap̃atokogami namateana ki Yesu, naga namauriana ki Yesu ega vei tea mariana ega toko lina nap̃atokogami. 11Nalakena kinami waina au mauri au pei tea vituakiana paki namateana sara ragi nalakena Yesu, naga namauriana ma ki Yesu ega vei tea mariana ega toko lina nap̃okasigami waina ega wo mate. 12Dapala nogoe namateana e p̃osiwosi doko gami, ma namauriana e p̃osiwosi doko mu. 13Ma au peani Naatana sikai maau ni nasaralomauana, pae tea waina e pei tea midiriana, A saralomau, nalakena tea wanogoe a pasa; kinami ma au saralomau, go nalakena tea wanogoe au pasa; 14au atae naga tea waina e sike Nawota Yesu e duleana ega wo sike gami ma auga wo duleana sikoti Yesu, go ega wo mari gami auga wo lawodu naraena sikoti mu. 15Nalakena naleo maga mamau puti eu doko nalakena nimu, naga nasaup̃iaana, waina e laapa pae tea laapa, ega mari navasadodom̃atakiana ega laapa paki nasamasamaana ki Sup̃e.
16Nalakena tea wanogoe au da pei tea p̃op̃otoro mau; ma naatam̃oli ni natakugami e pe to madada, ma naatam̃oli ni nap̃alaugami e do pei tea maripaukiana naaleatia paki naaleatia. 17Nalakena nariesoki‐gamiana, waina e masalesale, go waina e pei tea ni ragi kiki, e do maginami p̃osiwosi p̃aruwarua liu ki nasamasamaana waina e madaga go waina e du mau du; 18ragi waina au da do leopunusi naleo maga mau waina eu pei tea vunusiana, ma au do leopunusi naleo maga waina eu da pei tea vunusiana mau: nalakena naleo maga waina eu pei tea vunusiana eu pei tea ni ragi kiki; ma naleo maga waina eu da pei tea vunusiana mau eu du mau du.
Currently Selected:
PAKI TEA NI KORINTHO 4: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
