PAKI TEA NI KORINTHO 5
5
1Nalakena au atae naga nasum̃a ni tap̃aup̃au aginami ni maramana e pe vei tea rakaiana, au pe veani nasum̃a tavagiana sikai waina e m̃elu Sup̃e, nasum̃a sikai waina e da pei tea mariana ki nam̃elearu maga mau, waina e du mau du, doko nakoroatelagi. 2Nalakena lomau au do gi doko tea waia, au do masau p̃arua ki naga auga vei tea sugorokovagoroana ki natokoana aginami waina e m̃elu nakoroatelagi: 3nalakena au pe vei tea sugoroana au pe ta pei tea vap̃aiana au pei tea m̃alam̃ala mau. 4Nalakena lomau kinami waina au doko tap̃aup̃au waia au do gi, nalakena au pei tea sokiana pakitano ki tea madaga; au da masauna nalakena tea wanogoe naga auga sawo lua e mau, ma au masauna naga auga vei tea sugorokovagoroana, naga tea waina e mate atae ega vei tea tinomiana pae namauriana. 5Ma tea waina e mari m̃ataki gami raki tea wanogoe e pei Sup̃e, waina e dua gami nanadisokiana ni Naatana. 6Nalakena tea wanogoe au do marasike sara ragi, go au atae naga, ragi waina au doko kiagami ni nap̃atokogami, au puoli ki kiagami 7sikoti Nawota (nalakena au surata pae nasaralomauana, au da surata pae tea vunusiana mau); 8ma au marasike, go au suasua naga auga va dua ki kiagami ni nap̃atokogami, go naga auga va doko kiagami sikoti Nawota. 9Go nalakena tea wanogoe au do maridutuaki naga, au pe toko kiagami kite au pe vuoli ki nia, auga vei tea midoakim̃atakiana aneana. 10Nalakena e one gida maga mamau puti one naga tuga vei tea mariana tuga toko lina narae ni malo tasake ni navasap̃otaeana ki Kristo; naga sara naata euga sikasikai dape naleo maga waina eu pei tea mariana pae nap̃atokoda, ega vae tea maga waina eu mari ra, e pe vei tea wia kite tea sa.
11Nalakena tea wanogoe go waina au atae namatau‐ki‐Nawota‐ana, au do pasa die naatam̃oli maga, ma au pei tea mariana au doko lina ki Sup̃e; go a pavatu naga au pei tea mariana au doko lina natum̃amuatae‐ana. 12Au da moro dum̃agami pasap̃iakinoa gami paki mu mau, ma au pasa dapala au dua mu tea ni navakavakacana nalo kakagami, naga kuga veani a dip̃a tea maga waina eu pakavakae tea ni naraeda, go eu da pakavakae tea ni nap̃op̃oda mau. 13Nalakena au pe daratara, e magi Sup̃e; kite au pe midodoa p̃ia, e manimu. 14Nalakena nadodomiana ki Kristo e do die disua ki gami; nalakena au midoaki p̃otae dapala waia, naga sikai e mate oli tea maga mamau puti, nalakena tea wanogoe tea maga mamau puti eu mate; 15go e mate oli tea maga mamau puti, naga tea maga waina eu mauri euga ta moro dum̃ada madeada mauri mau, ma euga magi tea waina e mate oli ra po moro duleana mauri. 16Nalakena tea wanogoe au da atae pae ragi waia pa pa te naata pae nap̃okasi mau: go au pe atae sua Kristo pae nap̃okasi, ma ragi waia au da moro atae a dapala nogoe mau. 17Nalakena tea wanogoe te naata e pe toko Kristo e pei tea tawonakiana vau: naleo tuai maga eu pano puoli, kuga leo, eu po pei tea vau. 18Ma naleo maga mamau puti eu m̃elu Sup̃e, waina e mari gida tu pei p̃op̃o wia paki nia pae Kristo, po dua gami nasuasuaana ni namarip̃op̃owiaana; 19nalakena Sup̃e doko Kristo e do mari maramana eu pei p̃op̃o wia paki nia, e da midoaki dip̃a ra natapiriana adeada maga mau, go e doropusi doko gami navasaana ni namarip̃op̃owiaana.
20Nalakena tea wanogoe au pei tea tautauana maga oli Kristo, dapala Sup̃e e do pasa parati ki mu pae gami, au pavarani mu oli Kristo, kuga vei p̃op̃o wia paki Sup̃e. 21E mari tea waina e da atae te namarinaleosaana mau, e pei namarinaleosaana oli gida, naga nigida tuga vei namarinaleoleanaana ki Sup̃e doko asa.
Currently Selected:
PAKI TEA NI KORINTHO 5: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
