PAKI TEA NI KORINTHO 1
1
1Paulo, apostolo sikai ki Kristo Yesu pae namasauana ki Sup̃e, go Timotheo taigida, aro midiri paki ekalesia ki Sup̃e waina e doko Korintho, nara go tea tautau maga mamau puti waina eu doko Akaia mamau; 2nasaup̃iaana ega vei animu go natam̃ateana m̃elu Sup̃e Tamagida go Nawota Yesu Kristo.
3Sup̃e ega vei tea vasap̃iakiana go Tama ni Nawota anigida Yesu Kristo, Tama ni namaritadodomiana maga go Sup̃e ni sara navakavakaleana; 4waina e do pakavakale gami doko nariesoki‐gami‐ana mamau, naga kinami auga mari atae pasa pakavakale tea maga waina eu doko te nariesokiana, pae navakavakaleana waina kinami au pei tea vakavakaleana asa pae Sup̃e. 5Nalakena dapala waina narogokitesaana maga ki Kristo eu laapa paki gami, dapala nogoe navakavakalegami‐ana ma eu laapa pae Kristo. 6Ma au pe vei tea riesokiana, e magi navakavakale‐mu‐ana go namautipauri‐mu‐ana; kite au pe vei tea vakavakaleana, e magi navakavakalemu‐ana waina e do p̃osiwosi doko nasokiana ni narogokitesaana maga sikai maau waina kinami ma au sua ra: 7go naleogoroana aginami manimu e kasua; au atae naga dapala waina ku pei tea saisai peani narogokitesaana maga, dapala nogoe ku moro pei tea saisai peani navakavakaleana maga. 8Nalakena au da masauna mau naga nimu kuga vei sap̃o, tai maga, nalo ni nariesoki gami‐ana, waina e pakilina ki gami Asia, naga au pei tea sokiana paki tano p̃arua liu ki tea madaga, liu nakasuaana aginami, dapala waina au midoaki putuaki p̃arua ki namauriana: 9ma kinami au peani navasadaraana ni namateana doko nap̃alaugami, naga auga ta dum̃agami pavatu gami mau, ma auga vavatu Sup̃e waina e sike tea mate maga eu duleana: 10waina e pua lua gami m̃elu dua ki namateana warua dapala nogoe, go ega wo pua lua gami: waina au do leogoro pavatu asa naga ega wo do pua lua gami; 11nimu ma ku do maginami saisai silae ki navavaraniana animu; naga navasadodom̃atakiana ega maginami pei tea vituakiana m̃elu naatam̃oli laapa, nalakena navituam̃olikiana paki gami pae tea laapa.
12Nalakena navakavakaeana aginami e pei tea waia, nanoasokisokiana ni natum̃agami‐atae‐ana, naga namariana aginami doko maramana, go p̃arua liu paki mu, e doko natautauana go nam̃aruana ki Sup̃e, e da doko namanumatuaana ni nap̃okasigami mau, ma e doko nasaup̃iaana ki Sup̃e. 13Nalakena au da midiri naleo p̃ota maga paki mu mau, ma tea sikai maau waina ku peve a kite waina ku atae m̃ata ki nia, go a leogoro naga kuga wo atae m̃ata ki nia pa pa paki ragi edaku: 14dapala waina ku atae m̃ata ki sua gami pae namagovai, naga au pei tea vakavakaeana animu, dakiusi waina nimu ma ku pei tea vakavakaeana aginami, naaleatia ki Nawota anigida Yesu.
15Go a peani navavatuana wanogoe po midoaki nia naga aga vea paloti punusi mu, naga kuga veani nasaup̃iaana kerua; 16go naga aga surata duaduru pae mu paki Masedonia pano, go naga aga moro pae Masedonia paloti punusi mu, go naga aga vei tea morimoriana pae mu naga aga vaki Yudea pano. 17Nalakena tea wanogoe ragi waina a midoaki tea wanogoe a mari pae namagadaraana, kite naleo maga waina a midoaki da, a midoaki da pae nap̃okasi, naga io,io, go ee,ee, ragi sikai mau? 18Ma Sup̃e e pei lomau, naga navasaana aginami paki mu e da pei io go ee mau. 19Nalakena Sup̃e Natuna, Yesu Kristo, waina e pei tea rogorogokiana m̃aleoputo kakamu pae gami, pae au go Silvano go Timotheo, e da pei io go ee mau, ma io e doko asa doko. 20Nalakena nasaiana maga ki Sup̃e, waina eu laapa, eu pei io doko Kristo: nalakena tea wanogoe Amen ma e doko pae asa raki nasamasamaana ki Sup̃e pae gami. 21Ma tea waina e do lawo soki gami sikoti mu doko Kristo, go waina e puvurai ki gida, e pei Sup̃e; 22go waina e pulusoki gida, po dua gida nanadisokiana ni Naatana doko nap̃op̃ogida.
23Ma kinau a soso Sup̃e ega vei tea noa sokisoki dip̃a naatagu, naga nalakena a do marimalemale mu, a ko da moro paloti paki Korintho mau. 24E da pei naga au peani naveinawotaana dap̃au nasaralomauana animu mau, ma au pei tea wosiwosi sikoti mu silae nalaelaeaana animu: nalakena ku lawodu ki nasaralomauana.
Currently Selected:
PAKI TEA NI KORINTHO 1: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
