1 PAKI TEA NI KORINTHO 3
3
1Go kinau, tai maga, a mari sa pasa ki mu dapala ku pei tea ni Naatana, ma a pasa ki mu dapala ku pei tea ni nap̃okasi, dapala ku pei pipia maga doko Kristo. 2A dua mu milk ku munu, a da dua mu navinaga mau; nalakena ku ko da mari atae mau: go ragi waia ku ko da mari atae mau; 3nalakena ku ko pei tea ni nap̃okasi; nalakena waina naroitoiana go navululuana ero doko m̃aleoputo kakamu, ku da pei tea ni nap̃okasi, po surata pae naatam̃oli maga kite? 4Nalakena ragi waina sikai e naga, Kinau a pei tea ki Paulo; go tea p̃ota sikai e naga, Kinau a pei tea ki Apollo, ku da pei naatam̃oli maga kite? 5Nalakena tea wanogoe Apollo e pei nasava? Go Paulo e pei nasava? Tea suasua maga waina ku saralomau pae ara; go ero sikasikai dapala waina Nawota e dua ra sarasara ra. 6Kinau a lalawo, Apollo e pue; ma Sup̃e e mari a e ulua. 7Nalakena tea wanogoe naata waina e lalawo e da pei te navatuna mau, go tea waina e pue e da pei te navatuna mau, ma Sup̃e sikina waina e mari a e ulua. 8Ma tea waina e lalawo go tea waina e pue ero pei tea sikai maau: ma eroga wo sikasikai dape namoriana adeada sarasara ra ega vataka nawosi‐mawosa‐ana adeada. 9Nalakena au pei tea wosiwosi sikoti Sup̃e: ku pei natano kiliana ki Sup̃e, nasum̃a tavagiana ki Sup̃e.
10Pae nasaup̃iaana ki Sup̃e waina e pei tea vituakiana paki nau, dapala tea vei mataisau matua ni nasum̃a a doropusi laketano sikai; go tea p̃ota sikai e do davagi elagi asa. Ma sara naata euga sikasikai punusi dapala waina eu do davagi elagi asa. 11Nalakena laketano p̃ota sikai te naata e da mari atae doropusi a mau, ma tea waina e pei tea toropusisuaana e sikina, waina e pei Yesu Kristo. 12Ma te naata e pe tavagi elagi ni laketano kold, silver, vatu maga ni navakokotoana warua, nakau, nam̃enau, stro; 13nawosiana ki sara naatam̃oli sikasikai ega wo pei tea mariana ega toko lina: nalakena naaleatia wanogoe ega wo mari a ega toko lina, nalakena e pei tea maripakasakiana ki nakapu; go nakapu ega wo mari dogo nawosiana ki sara naatam̃oli sikasikai e dapale sava? 14Nawosiana ki te naata waina e davagi a asa e pe toko, ega wo dape namoriana sikai. 15Nawosiana ki te naata e pe vei tea tap̃arakiana, ega wo dika namoriana, ma nae ega wo pei tea mautipauriana; ma ega wo dapala waina e pe vae nakapu.
16Ku da atae naga ku pei nasum̃a tapu ki Sup̃e, go naga Naata ni Sup̃e e doko mu doko kite? 17Te naata e pe mari sa ki nasum̃a tapu ki Sup̃e, Sup̃e ega wo mari sa ki naata wanogoe; nalakena nasum̃a tapu ki Sup̃e e dautau, go nimu ku dapala nogoe.
18Te naata ega ta dum̃ana pilasurue a mau. Te naata e pe midoaki nia naga e pei tea manumatua m̃aleoputo kakamu maramana waia, ega vei tea manumatavusa, naga ega vei tea manumatua. 19Nalakena namanumatuaana ni maramana waia e pei namanumatavusaana narae ni Sup̃e. 20Nalakena e pei tea midiriana, e naga, Nae waina e do pua soki tea manumatua maga doko namarimanumatuaana adeada: go e moro naga, Yehovah atae namidodoana maga ki tea manumatua maga naga eu pei tea p̃alo. 21Nalakena tea wanogoe te naata ega ta pakavakae naatam̃oli maga mau. Nalakena naleo maga mamau puti eu pei animu; 22e pe vei Paulo, kite Apollo, kite Kefa, kite maramana, kite namauriana, kite namateana, kite naleo maga waina eu doko ragi waia, kite naleo maga waina euga wo umai; tea maga mamau puti eu pei animu. 23Go nimu ku pei tea ki Kristo; go Kristo e pei tea ki Sup̃e.
Currently Selected:
1 PAKI TEA NI KORINTHO 3: NTB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
